Atu hi Israel prime minister Benjamin Netanyahu le voi hnih a peh in a tei khawh lomi Blue and White party hruaitu ralbawi hlun Benny Gantz cu White House ah hun ka tlawng u tiah Trump nih a sawm hna, i hmai zarh chung ah USA an phan lai. Cucu NYP le international media nih an hun ttial.
Israel tuanbia ah prime minister (PM) saubik a ttuanmi Benjamin Netanyahu cu an ram palek nih ziknawh-eihmuar a tuah tiin tazacuai ding ah an ram biaceihzung ruahnak an rak pek hna. Atu hi an bawmh cuahmah rih ko, i Netanyahu nih zeiti hmanh in PM in tthumh a si ding kha a duh lo. Cucaah voi hnih tiang teinak hmu lo in thimnak ah an party a hruai hna caah an party Likud nih hruaitu thar an thim nain Netanyahu ttheo an thim.
Relchih: Benjamin Netanyahu hi taza an cuai ngam lai maw?
USA president nih cun Israel cu a dirkamh zungzalmi a si i a hlei in Donald Trump nih hin Israel a hnakkar ah a tenhnak a langhter ngaingai. Jerusalem ah Embassy a tthial lawng si loin Israel ram kauh ding fiang ngaiin tha a pekmi a langhter.
Tutan ah Trump saduhthah hi Israel pm paoh i an saduhthah a si maw timi ngiatthlai duh pah zong ah maw a kawh hna timi ruahnak a chuak. Aruang cu a rauh hlan ah Israel le Palestine remdaihnak cathluan chuahpi aa tim i cu hlan te ah Israel hruaitu hna a kawh hna hi a si lai tiah zumh a si.
Benjamin Netanyahu zong ralkap hlun a si ve, i a upa an rak thah ruang ah pumpak huat hrim zong in Palestine/Hamas hi a huat hna. Ni kum cozah thimnak an tuah laite ah "Keimah hi pm ka tlin tthan a si ahcun Israel ram ka kauh hrimhrim lai," tiah a rak chim ruang ah Palestinian an thinhung tuk i UN zong a thin a rak i domh. Cun Palestine he remdaihnak hi kap hnih hnatlak a herh lo, kanmah duhning an zulh paoh cun remdaihnak a si ko, a titu a si.
Blue and White party hruaitu Benny Gantz hi Netanyahu cozah ah Chief of General Staff of the Israel Defense Forces a rak si. Netanyahu he an idannak cu Palestine pawl he hmunkhat to i biaruahnak in remdaihnak ser a duh. Kap hnih hnatlaknak tello in zei bantuk daihnak hmanh ser khawh a si lo tiah Trump le Netanyahu i kap-khat duhnak lawng in daihnak ser an i timhmi kha a cohlang kho lo.
2019 Israel cozah thimnak ah Benjamin Netanyahu le Benny Gantz cu an i tluk tuk caah voi hnih tiang thimnak an rak tuah. A sullam cu ral thawh rumro a hiar i an ram palek hmanh nih ziknawh le eihmuar a tuah an timi PM hi an uarnak a hun zor tinak a si.
Cun Israel cu Pathian nih a dawt nain Hruaitu nih tthatlonak an tuah i dinnak an ttanh lo tikah cun Pathian nih a kaltak ttheo ko hna.
Comments
Post a Comment