Mah hihi tu kum chung ah Israel palek nih Netanyahu tazacuai ding voithumnak an chuahpi a si tiah NYT nih a ttial.
Israel ah uknak saupi a tlai cangmi Netanyahu hi an ram palek nih phung a buar tiah voi tam ngai an chimrel i a tuahmi pawl zong an langhter a tam ngai cang. Asinain phaisa siseh ralkap a rak si lio in mi theihhngalh a ngeihmi ruang ah nihin tiang a nawlngeihnak fek ngai in a tlaih khawh rih ko.
Palek nih phung a buar an timi cu a tanglei bantuk hin a si.
Pakhatnak ah Netanyahu le a nupi Sara nih an ram i a pahnihnak lianbik a simi Media cu phaisa tampi pek in an kong a tthami lawngte ttial le chim ding in pehtlaihnak an ngeih hna. Journalist pawl le editor hna nih an nupa le an chungkhar tthatnak tete zei an tuah poah in media dang in an sining sawiselnak le a si takmi an ttial zong ah cu media-phu nih cun an kong a tthatnak le media dang chimrelmi he i kalh in "Positive" lawngte an ttial/chim piak hna.
Mah cu media cu Netanyahu-te nupa nih editor-phu zong ah an i thlak ttheo i journalist rian pek dingmi kong zong ah an i thlak i anmah a dotu si lomi le an duhning in rian a ttuan dingmi kha rian an pekter hna.
Cucaah prime minister lawng si loin cu media "Walla News" hrim zong cu tazacuai awk ding palek nih duhsaknak an chim. Mah hi Walla News ngeitu Shau Elovitch le a nupi Iris hi Netanyahu le a nupi he hawikom tthatuk an si fawn, i Democracy ram ah a hleihluai in hi bantuk media phaisa pek in rianttuan cu a dik lo ti a si. Cucu Media dang caah thil ttha lo ngaingai zong a si. A ruang cu Walla News hi mah ti Netanyahu te kong an ttial/chim hnu in kum khat ah dollar million in an tthangchodeuh.
Mah hi kong cu "Case4000" tiah palek nih min an pek i phung a buarmi a pathumnak a si, an ti.
A dang pakhat cu "Case1000" ti a si i prime minister nih win/champagne, sigar(kuak) le mirum dangdang sin in laksawng tamtuk a cohlanmi kong a si. Mah hihi democracy ram ah cun an duh bak lomi, ziknawh ei phun khat a si.
"Case2000" cu an ram i media lei min ngeituk a simi Arnon Mozes cu Netanyahu nih a kong a tthatnak, colawmhnak le thangtthatnak chimrel ding in a chawnhbiak balmi kong a si.
A nupi Sara zong phung a buarnak a tam ngai i cu lakah a vapa Netanyahu prime minister a si chung i Offcial-in zanriah siseh chuncaw danghnak ah a hleihluat in thil manfak le phaisa dih in a tawlrel ti a si. Cucu an ram/cozah phung ri a lonhmi a si caah voitampi cu aa pheh i a thlithup in a tuah caah a palhtuk ti a si.
 |
| Israel prime minister phungbuarnak le palek nih bia an halnak pawl. |
Palek nih a sualnak an hlat-hlaimi le a sining an hun naihdeuh paoh ah ram innpa ah ral a tho, an ram ah buainak le ralhrang a chuak tiah media cheukhat le party dang nih an chim ttheo. Ram buainak hmang in a sualnak thuh le sawtphalh aa zuammi uktu hi an rak tampi timi tuanbia rel khawh a si ve.
Amah Netanyahu nih cun hi Palek chimmi vialte hi "a si lo" tiah lehrulhnak a tuah.
Cc: Haaretz, Telegraph, Jerusalem Post,
Comments
Post a Comment