Isreal Prime Minister Benjamin Netanyahu nih tu zarh chung ah Iran lih a puhnak a chimmi le ralsa terhnak a tuahmi ruang ah Gaza ah siseh hmuntampi ah buainak a chuak. Israel himnak siseh, Palestine le Middle East pawl he an i rem lonak kong ah ah thin i domh lengmang a si. Cutin a si ko nain, Netanyahu nih Israel hi ram innpa he ralthawh ding in a hruai cuahmah hna tiah ka ruah.
Iran he i ertau-nak mei alh chin lengmang ding in a hon chemmi nih hin ziknawh-eihmuar a tuah tiah an hlathlai i bia an hal liomi hnahnawhnak a tuah he aa lo. Israel hruaitu Netanyahu nih Ziknawh a cohlan tiah Israel palek nih voi thum li biahalnak le hlatnak an tuah cang. A tuanbia zong HIKA hin ka rak ttial. Hruaitu si hna seh, mi pakhat khat nih a sullam um lo in a thinhun tuk tik, buainak a chuahter a si ahcun palhnak a tuah caah maw a si? Thil sining a puang lai i mithmai a tlau ding nakin ralthawh, buainak chuahter i "vom nih a thau aa hrankan." an ti bantuk in thin i hunter a si tawn.
Zei si hmanh ah Netanyahu hi ralbawi hlun aa hngalh nakah Prime Minister a ttuanka in raltuk nih a hiar tukmi a lo peng. Thazang in ttan lawng ah Middle East he an buainak hi a dai lai tiah a zumh taktak tiah ka ruah. Ral ituk ding hi Israeli-Palestinian le Israeli-Arab buainak ah a chim i aa thim lengmang ko. Kap hnih biaruahnak i remdaihnak ser timi hi a zum kho lo i aa tim ballo timi PM a ttuan chung ah hmuh khawh a si. Netanyahu cun an kar buainak hi zeiti hmanh in remnak a um kho lo tiah ruah. A tuanbia a sau tuk cang. An buainak a sau tuk cang.
Relchih: Teitu A Um Lomi Raltuknak
Palestine le Arab pawl he an buai paoh ah Nitlak rampawl an taw a sawh hna. A hnursuan hna. Nitlak ram pawl le Islam kar ah i suk-khaknak a tam ve tikah le Israel cu Bible tuanbia an si caah an ttanh ding a fiang. Cucaah Israel nih hi buainak ah a tuah a herhmi pakhat lawng a um tiah Netanyahu nih a ruah: cucu nitlak ram pawl i sawm, forh hna hi Arab pawl he ral ituk hi a si.
Cu ruang ah Iran kong i "International Agreement" ramkipfonh bu lungtlinnak ngeihmi paohpaoh a doh. Cucu a duh lo ruangah si lo in "lungtlinnak" a si caah a dohmi a si. Iran daite le cawlcang kho lo in a um khawh nakding cu thazang (by force) hman lawnglawng hi a lam a si timi a lung ah fek tuk in aa chiah. Mah caah cun "lungtlinnak" a um tik paoh ah USA bochan in a palhnak a kawl peng ve.
Tutan i Iran "nuclear lungtlinnak" biatak in a palhnak a kawl i lih a puhnak nih hin an karlak ah ralkap thazang hman tiang in buainak (conflict) a chuahter chin lai. Iran he ral an i tuk a si ahcun, USA hmanh nih bawm sehlaw Iran Nuclear Program cu a tlau thai kho lai lo. A thar tu an chuah lai i an i hnawh lai. American he i bawm in an tuk ruangah Iran cu a derdeuh lai lo, USA le Israel a huatu tampi an sawm khawh hna lai. Ral nih a chuahpi ding cu Islam ralhrang (extremist) rampi an karh lai i huatnak tiva a luang lai. Cucu Iraq le Afghanistan in kan hmuh cangmi a si.
Ruahchannak a um tukmi Korea hi zoh ah lung a dam tuk. Politics ah iral lawngte a si lo timi South Korean president Moon Jae-in nih a kan hmuhsak, i atu nuclear kong zong a dai i ralkap thazang in i hrocer zong a hong dai. Suimilam caan hman aa khat in an hon hmang kho. South Korea nih an president an thim ahhin thin tthumh i North Korea he biaruahnak ngeih ding hi biapi in an rak chiah timi a hong lang. Kum 70 i ralnak le i tthennak cu a hong dai deuh cang i zeibantuk lungtlinnak dah an ngeih hna timi lawng kan cuan cio.
Korea buainak hi Iran nakin ttih a rak nungdeuh. Atu le tu Rocket a hneksak, i ralthawhnak rim lawng a rak nam. North Korea hna cu Nuclear a ngei cang i a dang siivai bomb zong a ngei cang. Cuti a si ko bu ah politics nih zeitluk aa ralmi aa domi le a kuai dih cangmi zong fonhkhawhnak le remter khawhnak thazang a ngeih awk a si.
Iran kong zongah a tthabik cu Korea bantuk hi a si. Vawleipi nih hnatlakpi mi Iran Nuclear Deal nih tthalei a panhpi ko tiah ka ruah. Thazang pek ding a si. Netanyahu ruahnak le kalpimi Policy nih hin Israel himnak a chuahpi lai lo. Zeithil paoh hi kap hnih in a um dih. Raltuk lawng a ruatmi caah cun mah le mah i nawn a si ko lai. Rawhnak lawng a chuak ko lai.
Netanyahu hi Israel nih an thimtu lo a hau. Netanyahu ruahnak bantuk in si ti lo in aa ralkahmi ruahnak dirpi caan a si. Israel a him khawh nakding le a hmunh khawh nakding ah cun an ram innpa pawl he biaruahnak in a lam an kawl a herhmi a si. Voi khat bia an i ruah cang i aa hlei lo ti ding a si lo, a herh cun kum tin zong remdaihnak caah i chawnh an hau.
Note: ka blog capar vialte hi ka ruahning lawng an si.
Comments
Post a Comment