Nihin tiang Thailand ralkap nih uknak an tlaih rihnak a ruang cu Thaksin te ttafar dinlonak ruangah a si. South Korea an president hlun Park zong thong kum 30 chung thlak ding in tazacuaitu nih an hal i theihtlak lo ngaiin khua a rak sak ning cu theih cio a si. Democrasy ram hna ah cun ramhun le cozah tlaitu hna zong an dinlonak ruang i an tuar hnga ding an luat kho lo. Iceland Prime Minister zong ram dang ah phaisa aa khon ruangah a rian phuah a si ko.
Israel Prime Minister Netanyahu a luat kho lai maw?
Nihin i USA ah an conglawmh lenmi Israel Prime Minister Benjamin Netanyahu cu a ukmi ram Israel ah cun eihmuarnak (Corroption) a tuah tiah puh le mawhchiat a si. Cu kong he pehtlai in Netanyahu a mizumh le naihte in rian a ttuanmi zong nih eihmuarnak a dotu hna le a cozah lei ttang ding in lungthlehnak an ngei cang. Netanyahu eihmuar le ziknawh a hmang tiah an puhnak hi kum khat hrawng a hun si cang i tu thla thawk ah khan a fanu Sarah Netanyahu he suimilam panga leng palekzung nih biahalnak an rak tuah hna.
Netanyahu hi ramkhel rian le Prime Minister a ttuan chung ah cozah rianttuanmi hna nih a man an liam hrimhrim ding a simi thil zong a liam tawn lo lawng si lo in laksawng a cohlan tawnmi ruangah Justic Department hi an rian a tamter tuk hna ti a si. Asinain mit-hmuh kut-tongh in an tlaih khawh lo caah taza an cawi kho tawn lo. Asinain tutan cu a hun lang tuk cang. Prime Minister pakhat palek nih suimilam panga leng bia an halmi cu a dintuaimi a si lo caah a si. Kan hnu thla ah khan cun Israel palek nih Netanyahu hi tlaih i biaceihzung ah chuahpi ding an rak duh cang.
RELCHIH: ISRAEL NIH MYANMAR RALKAP SINAH HRIAMNAM A ZUAR
Myanmar i Hillary Clinton a rak tlawn lio ah Kawlram mirum nih laksawng an rak pek nain a rak cohlang lo tiah rak theih a si. Cu bantuk cun hruaitu a dingfelmi hna nih an khualtlawnnak ah siseh an ram chung i rian an ttuannak ah laksawng an cohlang duh lo. Vok rak thah donh zong an duh lo, i a sa zong an ei lo.
Billionaire pahnih sin in Israel prime minister Netanyahu nih a manfak tukmi laksawng a cohlan tiah theih a si caah atu bantuk in palek nih an hlathlai le bia an hal hi a si. Laksawng petu hna cu Hollywood i mirum Arnon Milchan le Australian chawlet James Packer an si. Cu laksawng man ah Netanyahu nih hi hna pahnih cu chawlehnak caah a ttha tukmi lam a onh piak hna tiah theih a si.
Israel Press nih an tialning ah James Packer cu hlasak thiam Mariah Carey he ai duh le tthium ding timhnak an rak ngei. Carey hlasaknak (Concert) paoh cu Netanyahu le a chungkhar hi alak tein a zohter peng hna. Cun Netanyahu a fa upabik, Yair hi khual a tlawn tikah First-class vanlawng man a liam piak peng i Five-stars Hotel ah a tthumhter peng ti a si. Laksawng pawl ah Zuu thawthaw, a man fakmi kuak le vanlawng ticket pinah a fanu Sarah chuahni laksawng ah a man fakmi ttamhnak pawl a pek. Mah cucu "Hawikom i dawtnak a langhnak a si," tiah Netanyahu nih cun fiannak a tuah.
Netanyahu nih a kong ttha lawngte ttial ding in Yedioth Ahronot timi thawngthanhca cu phaisa a pek hna tiah theih a si rih. Mah cu ko cu phunglam (law and justic department) lei a tlaitu hna nih ziknawh, eihmuar le zumhtlak si lonak taktak a si an ti. Palek report pakhat ah "Prime minister pa le Israel ram chuak Arnon Milchan an i pehtlaining cu phung a buarmi (Criminal) tuahsernak a si kho i an i pehtlaihnak hi hawikom men cu a si lo," tiah aa tialmi cu Haaretz nih a ttial chin.
Netanyahu phungbuar an puhnak a hong tam tuk cang i kum khat leng Palek nih an hlat cuahmah caah amah he naihniam tein rian a ttuanmi cheukhat cu an i zukphiak cang. Palek nih hlathlainak an tuahmi kong ah bawmh ding in le an puhmi pawl a si le si lo chim ding in Palek lei ah an ttang cang hna. Shlomo Filber timi pa zong Netanyaho tang a rak ummi a si nain palek lei ah a ttang ve.
USA a tlawn kar ah Nir Hefetz timi amah he naite in rian a rak ttuan i a siibawi zong a rak simi pa cu Palek lei ah a ttang ve cang tiah theih a si. Cozah nih Netanyahu an puhmi kong he pehtlai in "Tehte" lianbik ah an hman cang lai ti a si. A ruang cu Hefetz hi Netanyahu thil tuahmi vialte cozah/palek nih an theih lonak ding caah a fimhlawmtu a si tiah theih a si caah a si. Asinain NIr Hefetz hi a luat ve hlei rih lo, palek rianttuannak a donh lawng si loin ziknawh a hmanmi ruangah thong ah a um lio a si ve tthiam. Netanyahu caah a tuahmi vialte phuan ding biakhiahnak a ngei i cozah nih a nunnak ven ding an kamh ve.
Hi siibawi pa nih a chimmi chung ah a boss pa Netanyahu nih Teleom-company "Bezeq" timi cu a chawlehnak lam a tluan khawhnak ding a tuah piak timi hi a si. Cu ti a tuahnak a ruang zong cu mah cu Company nih an ngeihmi minngei Website "Walla" ah a kong a tthami le sawiselnak um lo tein a kong ttial ding in hnatlaknak an ngeih caah a si, ti a si. - Mah cucu Netanyahu nih a thiangmi chawlehnak a si pinah sihni (lawyer) nih theihpimi a si, tiah a chim.
Netanyahu tlaih khawhnak phung a buarmi Tehte kan ngeihmi hi a za cang ko tiah Palek nih an chim i Party dang nih cun Netanyahu hi a rian in a chuah cang awk a si tiah an chim ve.
Netanyahu hi a no lio tein USA ah a rak um i Boston i USA sianginn tthabik MIT ah ca a rak cawn lawng si loin Washington ah Israel Ambassy ah rian a rak ttuan balmi a si. USA cu Netanyahu caah a ram pahnihnak a si. Tutan i USA a tlawnnak ah lumsa ngai in an rak don ko. Hi a tlawn chung hi cu an puhmi phungbuarnak vialte in ai hlikphuak chung. Asinain an puhnak vialte le a kong i a buaimi cu a dih hlei lai lo. A kir tikah i muai cawk lo in Palek le Press nih an rak don te lai. WashingtonPost.
ISRAEL cu Vawleicung Khrifa paoh nih ttanhmi a si nain a tuanbia zoh tikah hruaitu dingfel lo, uktu ttha lo cu an chan a sau lo i cu bantuk uktu le hruaitu nih an miphun cu sal an taanpi hna lo hmanh ah fahnak an phurh hna.
FOTO: NIR ELIAS / REUTERS / NRK
Comments
Post a Comment