Prins Harry le Hertuginne Meghan cu siangpahrang rian le dirhmun in an i zuk cang i UK/England tax ei ti lo in anmah tein khuasaktintuknak an i tuaktan cang lai tiah British media nih zahan khan an ttial.
Siangpahrang te chung hi UK ngunkhuai pekmi in hlawh pek le cawmmi an si. An dihheu ding vialte kum tin Budget ah ceihpiak an si.
UK zong ah um ti lo in Canadah an i tthial lai. Caan saupi an i ruah le an i ceih hnu ah atu bantuk in biakhiahnak an tuah hi a si. Hi bia a than hlan in Canada ah Meghan a nu Doria Ragland tlawn pah in Christmas zong an va hmang.
"Thla tampi kan i ruah, kan i ceih hnu ah lam thar chung ah nunnak thar ser ding in kum thar sinah biakhiahnak kan tuahmi a si." tiah an nuva hmanmi Instagram ah an ttial. Canada i Toronto khua ahhin Meghan Markle hi sau nawn khua a rak sa bal. Hawikom le theihhngalh zong a ngei.
An nuva in anmah te in kawl hawlmi in khuasak ding an duh i a tamdeuh cu Canada ah an um lai, nain UK zong ah caan tampi an hman lai. Cun, siangnuhrang Elizabeth tu cu zaa ah zaa in dirkamh le thapek ding an i tim. Elizabeth zong nih tha a pek ko hna.
British Press(Media) hi an zalen tuk i siangpahrang te chung kong an ttial le an phuanmi pawl theihtlak lo a tam tuk tawn. Meghan hi a tuar khun, American nu England siangpahrang fapa nih a tthit lawng si loin, nuthlawi a rak si pinah an puai lai ah a pa le a unau pawl he an buaimi thawngpang hrim a rak tam i atu tiang hnuzul tuanbia phuanmi a um lengmang. Mail le Sunday zong taza a rak cuai phah hna.
Harry a nu Diana a thih kong he pehtlai zong in Harry nih theih a zuam ti lomi thawngpang, media nih an chuahpi an kawl lengmang fawn. Cucu an celh ti lo. Cucaah an nupa in a si khawh chung in zapi (public) sin ah an chuak ti lonak a sau ngai cang.
Relchih: Vawleicung Passport Tthabik Naa Tlaih Ve Maw?
2018 i Harry he an i um khawh tlawmpal ah Siangpahrang inn i rianttuantu pawl a chawnhbiak hna ning a tthat lo caah Meghan cu "Princess Difficult" timi min pek a rak si. Cu pinah Private Jet in khualtlawn le inn caah phaisa millions dih in a hmanmi pawl ruang ah fakpi in sawisel a rak si.
Atu cu anmah tein chawlehnak pakhat an dirh i rian an ttuan cang lai. Harry hi cu hlan ah upa William he rianttuan tti an rak i tim bal nain atu an nu he an i umh hnu in an i tthen ve.
Comments
Post a Comment