Corrona-Virus Aa Thawknak Million 11 Umnak Khua An Phih Lai

Tulio i ttihnung ngaiin ruahmi Corrona-Virus nih minung 17 a nawn cang hna, i a thong in an i chonh cang. Vawleicung ngandamnak bu (WHO) cu zahan in tuni tiang a peh in lakhruak tonnak le hi Virus kong ah zohfelnak an ngeih lio a si.

Tuluk ram, Wuhan timi milu million 11 khuasaknak khuapi ah mah Virus hi an hmuh hmasabik, nain tuante in cozah nih mipi theihternak le ralrin peknak an tuah lo tiah atu hi mawhchiat an tong. December khan hi Virus in a zawmi an rak um cang.

Atu i biatak tein vawleipi nih an hun theihnak a ruang zong hi Tuluk cozah nih an thanh ruang ah a si lo, internet le social media ah a kai tuk cang caah theih lo awk a tthat ti lo hnu in Tuluk cozah nih a tawlrelmi a si tiah Beijing i sihni pa Xie Yanji nih a chim.

Mah ti internet le social media i an langhtermi hmanh cu palek nih "lih le lih in mi an tthihpheih hna," tiah Hongkong Post ah an rak chim.

Tuluk cozah nih Wuhan khua in a chuak ding vanlawng le tlanglawng vialte nilini zingka in an phih dih cang lai. Cun hi khua ah khua dang zong luh lo ding in thawng an thanh. 

Mah hi Virus cu minung pakhat le pakhat kar i chonh khawhmi a si. Thawh chuah a har lai, i lung/thin zawtnak bantuk in Corrona-virus a ngeimi cu a lang lai ti a si.

Wuhan khua hi uico sa, chizawh sa, cun ram-ui, ramchizawh tibantuk pawl le a dang sa kip biatak tuk in an zuarnak a si i cu bantuk an zuarnak bazar in a chuak lai tiah an zumh.

WHO nih zeitindah kan kham lai, zeitindah kan thlawp lai ti le zeibantuk hrikdah a si ti zong fiang in an hngalh rih lo caah biatak tein a ralaimi ni le caan chung zohfel ding an i zuam lio cu a si.

NOTE: Hi blog kau loin Facebook ah Thawngpang rel na duh ahcun Teirialcatialtu Page hi LIKE/FOLLOW ve