Netherland TV RTL7 nih Ronaldo aa tel lomi cu zuamcawh ding tlawmdeuh na ngei tinak a si cu, tiah a hal i Van Dijk nih "Eh! Ballon d'Or co ding aa zuammi maw a rak si ve?" tiah a leh. Asinain Ronaldo le Messi thangtthatnak a hun chim chih i Virgil van Dijk nih Ronaldo a rat lonak a ruang cu Milano ah Serie A player of the year peknak ah a kal caah a si, tiah a chim chih.
Asinain Ronaldo te chungkhar caah lungfak ngai a rak si i a farnu Katia Aveiro nih Twitter ah tihin biahri a hun terh:
– Dawtmi Virgil, atu na phaknak kha Cristiano Ronaldo cu voi thong tamtuk a phan cang. Dawtmi Virgil, Cristiano Ronaldo nih atu na chuihnak League (premier league) ah khan Cup voi thum a thlir cang, nain nang cu voi khat hmanh thlir lo in kum sautuk na chuih cang. Cristiano Ronaldo cu atu na chuihnak ram (England) ah a rak chuih lio ah cun goal tambik suttu zong a rak si i kum khat chung a thiambik zong a rak si tawn. Culio ah cun nangmah nakin ngakchiadeuh tuk a rak si rih, tiah Ronaldo far nih cun Twitter ah a ttial.
Mah cu lawng a si lo:
"Champions League final siseh Nations League final ah an tei kha na philh maw? Ka ttapa a kum vui lo cem kum hmanh ah nangmah nakin Cup tamdeuh a thlir. Virgil nih kanmah chung he biaruah a duh a si ahcun Cup(title) tamdeuhpi a thlir hmasa a herh. Na zapei khat in na ngeih tik lawng ah C. Ronaldo he cabuai khat ah na tthu kho te lai, cu hmanh cu a fiang lo."
Katia Aveiro nih "Ronaldo nakin bawlung chuih a thiammi vawleicung ah an um rih lo." tiah a bia a donghter.
Piers Morgan timi TV-personal nih Virgil van dijk cu Twitter ah a hei mawhchiat ve i Virgil nih tihin a leh:
"Social media i an ttialmi i hngat lo in Intervio kha ttha te na ngaih a si ahcun capo a si kha na fiang ko lai. Mah hna pahnih (Ronaldo le Messi) cung ah upatnak ka ngeihmi dah ti lo zeihmanh a um lo, tiah van Dijk nih Morgan cu a leh.
Morgan zong a hun fiang i "A ttha tuk, Virgil. Tihin na ka leh lai tiah ka rak i ruahchan ko," tiah a leh tthan.
Katia cu nu a si le atu tiang cu a let lo.
Virgil van Dijk nih hin tu kum Champions League semi i Barca an sungh ah khan, hodah Ballon d'Or co ding ah aa tlak tiah an rak hal i "Messi hi pumpak in cun a thiambik a si rih ko, a chuih chung cu amah pek ding a si ko," tiah a rak chim.
_____
Vawleicung thawngpang, Sports le theihtlei fawi tein Facebook ah rel na duh ahcun TeirialCatialtu Page rak LIKE ve.
Cc: Inews, Metro
Comments
Post a Comment