Lennox Lewis Nih Anthony Joshua An Sawimi Cu A Diklo A Ti

Anthony Joshua nih nai zarh i Andy Ruiz Jr. he an i thongh lio ah a zamtak lengmangmi kha an sawisel tukmi cu  Vawleicung boxing thongh ah minthang Lennox Lewis nih a diklomi a si, sawisel ding a si lo tiah a dirkamh.

Saudi Arabia hi a voih hnihnak Andy Ruiz Jr. he an i thonghmi ah Joshua nih Points in a tei. Joshua nih a chimmi cu a voikhatnak kan i thonghmi ka palhnak kha kaa remh, tiah Andy he naihte in i thongh lo ding in a zaamtak lengmang caah Andy nih tthate in a thong kho lo i teinak a hmuh.

Mah ti a teimi ruang ah cun Joshua hi aa thongh zoh a nuam ti lo, a zam rumro in a zam tiah social media siseh ramkip boxing uartu hna nih an sawisel.

Mah cu sawiselnak cu Lewi nih Twitter ah tihin a chim: "Boxing i thongh paoh ah Knock Out in thongh hrimhrim ding a si lem lo. Joshua aa thonghmi kha Taktik ttha a si tiah ka ruah i Andy Ruiz aa ruah loning in a thongh khawh caah teinak a hmuhmi a si ko." a ti.

"Mah hi a caah hmuhton thar pakhat a si. Fimkhur ngai in aa laak tiah ka ruah." tiah Lewis nih cun a thangtthat.

Mah hna pahnih hi fak nawn in tu kum thawk ah khan bia an rak i al. Asinain tutan ah Lewis nih a hun thangtthat.

"Mipi nih thiseh le KO an duh ti ka theihthiam. Asinain aa thongmi hi siikaan a ngeih a herh i caan rem a bawh zong a herh. Cu caan a phak lo caan tampi a um. A phak a si ahcun fimkhur le a himbik lam ruat i tinhmi kha khen a herh." tiah a chim.

Anthony Joshua Nih Andy Ruiz A Teining A Thei Lomi Caah

Cc: TalkSports