A tang ah Youtube Video, Highlight zoh khawh a si.
Bualupa hna nih Round 12 chung Point an pekning 118-1010 le 119-109 in Joshua tei ah an chiah. A hmun zohtu 15000 an si.
"K.O in mi tei hi kaa ziak tukmi a si. A dih lai hrawng kha cu ka thluk deng ko nain a ka tlaih manh i a si. Thluak hman a herh tiah ka ruah i ka palhnak kaa remh. Andy le a trainer pawl ka upat hna. Mah hi Sport cu mi khen (thongh khawh) le mi nih khen lo hi a biapi bikmi a si," tiah voi 25 aa thong i 24 teinak a hmu cangmi tulio thongh thiambik Joshua nih a chim.
Voi 22 hi Knock Out (KO) in mi a tei hna, i tutan hi a voikhatnak bik Point in mi tei aa zuam a si tiah Experts siseh TV Commtators nih an chim. A ruang cu naihte in an um ahcun Ruiz nih a thongh tuk i a voikhatnak an rak i thonghmi khan aa fiang tuk cang, cucaah Joshua nih a hlaat lengmangmi a si.
Joshua nih bia a chim lio ah Ruiz nih a au hnawh i:
"A voi thumnak i thongh tthan ka duh," a ti.
"A ngah tuk ko," tiah Joshua nih a leh i "Khawhka paoh ah ka ngamh ko," tiah a chim chih.
"Tutan hi cu hlannak in ka ritdeuh, nain mah cu kaa sonhternak a si lo. Tu zan cu a ka teideuh ko," tiah Ruiz nih a chim ve.
Joshua nih Round nga tiang ah a khen deuh nain an pahnih in an i hngak veve. A Round ruknak le sarihnak ah cun dih sehlaw Joshua nih a tei hnga, nain Round 12 tiang an i thong. Naihte in an i thongh a si ahcun Ruiz nih a khendeuh caah Knock Out in a ka tei tthan lai ti a ruat i Joshua nih a zamtakdeuh peng.
Round riatnak in cun Ruiz nih a naih, a dawipeng. Voi tamngai an i kheng.
Joshua nih Round kua, hra le hleikhatnak ah a khenning an fak ngai. Asinain Ruiz nih cun ttha tthi in kheng kho loin a dawi peng rih. A Round hleihnihnak zong ah Ruiz nih a dawi, K.O kha aa zuam tuk nain Joshua nih voi khat-hnih a khenmi ah tthatuk in a thongh caah Point in a tei hi a si, tiah Commentators nih an hun chim.
Tu kum juni 1. ah khan New York ah World Champion a simi Joshua cu pa thaute Mexico pa Andy Ruiz nih K.O in a rak tei i Boxing vawlei cu a rak hninh. Mah lio ah Joshua taisawm pathum WBA, WBF le IBF a rak chuh.
Tu zan khan Joshua nih a taisawm vialte a lak khawh tthan. Anthony Joshua hi British a si.
A dang World Champion taisawm pakhat a tangmi (WBC) cu american pa Deontay Wilder nih aa sawmh rih i a ralaimi February ah Tyson Fury he Las Vegas ah an i thong lai. 2015 ah khan Fury nih Vladimir Klitsjko a rak tei i World Champion a si ve.
Facebook ah Vawleicung thawngpang le Sports rel na duh cun TeirialCatialtu Paga Like/Follow
Foto: ANDREW COULDRIDGE / X03808
Comments
Post a Comment