Biahalnak 10: "Thinlung Dor Tete" Tiin Biazai Cauk Chuahtu Kevin Thang

Lai cazual, mekazin siseh Fidiphu biaruahnak zong biazai a rak ṭial lengmang nain zapi nih aho si kan rak theih lomi Kevin Thang a si. Careltu he i naihniam le i theihnak ah an zuar chuahmah i a rel lai kan i ngaihtuk ciomi a biazai cauk he pehtlai in biaruahnak kan hun tuah.

1. Na min in Biazai cauk a chuah khawh cu kan i lawm tuk.
- Kaa lawm tuk ve. Intervio na ka tuahmi hrim zong hi kaa lawm.

2. Aho nihdah mah hi cauk "Thinlung Dor Tete" an chuahpiak i zei kong dah a si?
- Kum kul chung ka phanmi pawl kha cauk ah bungh in Fingrei Phu nih careltu hmai ah a muisam an hmuhsakmi a si.

3. Caholh a duhmi chungkhar in a rami na si maw?
- Ka pa hi caholh a thawtnam a thei ka ti lai maw a kan liam taak hin bizu pahnih le thingkuang pathum khat in a cauk hmuh khawh an si. Ka pa hi caholh lei tiah cun, hnipuan le rawlthaw nakin aa thimdeuh ka ti ko lai. Cun, Zahau holh hi a ka hnek lo. Tanghnih ka kai lio ah Laica ah mark 98 ka ngah caah Thantlang in a rung tlung i pedan in voi hnih a rak ka tuk. Mark 94 ka hmuh ṭhan i voi ruk a rak ka tuk. A ka hlemh pah khin, Laimi nih Laica kan upat i kan hmaizah lo cun aho nihdah a dawt hnga? Ka fa kan caholh a si, a rak ka timi hi kaa cinken peng. Cun ka pu Sazaci Van Awi nih mirangca rel a thawt zia kha a ka rawnh fawn.

4. Zeitindah biazai ṭial naa rak thawk, i lenhloi ta na ṭial maw?
- Kawlca in biazai hi kaa thawk. Lai in cun Rangoon LBC pumh hnu khin, kan Caholh a hmet tuk kha mi hmuh a si tikah rii, dun le dan zong hngal loin kaa tel ve. Kan Caholh ka dawt ve ruangah a si bik. Kawl Biazai bang lung li hnuai pawl khi khat tung in kaa rak i hrawt ve. Mah hnu ah, blank verse timi zalong tein hloi biazai khi kaa thim. Aruang cu kan Lai Biazai karh vima seh ti ka duh. Cu ti, kha tin, biazai phan a si lai tiin rii chiah ka pom lo. Lenhloi zong hi ka ṭial ve ko.

5. Caṭial hi a olzang tiah na ruat maw?
- Kei cu caṭial hi ka uar ngai. Asinain, biazai le lenhloi hi hmunhma le minung covo, hmuh tonmi pawl fonh in phai tawn si caah pumpak ruahnak in a olzaang ka ti ngam lo.

6. Miphun lian si usih law laica caṭial hi pawcawmnak ah ka hmang lai tiah naa ruat ma?
- Miphun lian cu si usihlaw cu atu Lai Caholh zong hi tungki pangki muai in a um hnga maw? Caṭial cu kaa nunpi mi a si caah, vawlei killi cul in cafang le biafang ka thil hnga.

7. Tu kum chung na relmi cauk pawl, atu na rel liomi?
- Pu Ro Thang (2019) cauk thar kha Christmas laksawng ah Pu Thlasui Tluangneh nih a ka kuat. Ka rel cingling lio ko hih. Cun caholh kan timi "literature" kap deuh hi kaa thim. Tu kum chung, Cathiang ah atu hi The Gospel of John hrilhfiah hi ka lim. Cun, Nicolas Sparks hi ka uar bik. Tu kum chung ah, Valinta (ebook) le Every Breath ka lim.

8. Na cauk an zamh i kan rel dingmi hi na ngaih maw?
- Uite luahchuak ka lo. Ka ning hna zak. Nain, Facebook Status lawng le Cazual tete lawng cun hmakal lo.

9. Zeiruang ahdah Biazai hi a biapit?
- Caholh i muru bik a si caah a si.

10. Ahodah na si?
- Pu Lal Sann le Pi Carren Luis i an fapa Lal Thang Vung (Kevin Thang) ka si. April 22nd 2016 ah Stroke in ka zeng i Vista Ridge Nursing & Rehabilitation ah kaa hraam lio. USA, Texas i Lewisville ah khua kan sa.
___
Kan ca le holh runvennak caah Laiholh chuak cauk pawl hi cawk le rel in tha pe cio hna usih. December 15. hrawng cun Kawlram cu zuar an thawk cang lai. Kan i lawm.

USA i cawk khawhnak pawl: