"Keimah zong president Trump dodalnak ah an rak ka sawm ve," tiah a ttial a cauk rel hmasami AP News Agency nih a ttial. A cauk min cu "With All Due Respect" ti a si.
Relcap: Trump Foundation Phaisa Pumpakca An Hman
Nikki Haley cu 2017 kum thawk in 2018 december tiang UN ah USA Ambassador a rak ttuanmi a si. Amah tein rian a phuak tiah theih a si, i tu a cauk chung ah Donald Trump cung ah zumhtlak a rak si lomi hna kong a ttial.
"John Kelly le Rex Tillerson nih president ralchan in rian an ttuanmi hi zumhtlak lo an si caah si lo in ram caah a herh (USA chanhchuahnak) caah kan tuahmi a si lai, tiah an lei ttang ding an kan sawm lio ah an chim," tiah Nikki ttialmi AP nih a rel chung in an langhter.
John Kelly cu 2017 july in 2019 january tiang kha White House Chief of Staff a rak ttuan. General hlun a si. Pa duh lo, siikaan a ngeimi le pa dingfel tiah Trump le Rep. party chungtel pawl nih an rak upat taktakmi a si.
Rex Wayne Tillerson cu Engineer a si i mirum a si. United States Secretary of State 69nak a si i 2017 kum thawk in 2018 march tiang a ttuan.
An pahnih in Trump a dotu an si tiah Nikki nih a ttial. Rex le John hi White House in an chuah hnu ah Trump a tthatnak a chim kho lomi an si pinah Trump nih Rex cu "mihrut pa" tiah Twitter ah a rak ti.
Nikki Haley nih a ttialmi AP nih a langhtermi ah "John le Rex nih Trump doh ding an ka sawmmi cu ka rak ar (lautuk) ko," a ti. Donald Trump rianttuannak dohdalh ding ah timhtuahnak (plan) zong an rak ngei cang i suimilam pakhat leng an ka ruah, tiah a ttial chih.
"Keimah an ka sawm a herh lo. President a rianttuanmi an lungtlin lo ahcun hmaitonh tein an ton i an chimh, an al ding a si ko," tiah Nikki nih a ttial.
Mah hi lio hrawng 2017 august le 2018 september ah BBC le NYT tel in American media pawl nih "White House chung ah Trump he ralkah in rianttuanmi an um," tiah an rak phuan pinah "Trump a rian in chuah aa zuammi an um," an rak ti caah 2018 ah khan White House rianttuanmi tampi cu hlathlai le biahal an rak si. Vice president Mike Pence tiang an rak purhdah.
Hi kong a theih tikah Nikki hi a um thiam rua lo, a rannak in USA Ambassador to UN a rian cu a chuahtak. Cun mah hi cauk hi a ttial.
"President a rianttuannak dodal cu ttih a nungtuk. Phunghram he zong aa kalh, i American mipi an duhnak he zong a kalhmi a si," tiah a cauk ah cun a ttial.
Cu a si caah Nikki Haley nih cun Rex Tillerson le John Kelly sawmnak cu a rak cohlang hna lo. Cu hnu cun zeitik hmanh ah mah hna pahnih nih Trump kong an ka ceihpi ti lo, tiah a ttial chih.
John Kelly nih Washington Examiner ah Nikki cauk kong cu comment a tuah.
FACEBOOK NA HMAN AH CUN TEIRIALCATIALTU PAGE LIKE LE THAWNGPANG THAR REL VE.
FOTO: EDUARDO MUNOZ / REUTERS
Comments
Post a Comment