Mourinho Nih Guardiola Ruahnak A Pek Pah In City Leiba A Cawh

Jose Mourinho hi Manchester United nih rian an chuah hnu in manager rian a tlai rih lo.

Sky Sports nih expert ah an lak i bawlungchuih vialte TV in a zoh i tideuh, cudeuh, mah ti khan tiah puai kip i an chuihning a chimreltu a si. Cucaah zahan i Liverpool nih 3-1 in an teimi hna Guardiola City cu tthadeuh in hnukham an i ven awk a si, tiah a chim.

"Liverpool hi hmai ah zeitluk in an tthawn ti cu zapi theih a si tiah ka ruah. Hopaoh nih an i celhning an theih. Mah hi puai hnu ah i ttahsek ding cu City caah a herh lomi a si," tiah Mourinho nih a chim.

Liverpool le Manchester City hi an chuihning aa lo ngaimi an si, hmaikal i nam, goalsut khawh a si. Cu lio ah City hnukham aa khawngmi an tam pinah zahan an chuihning kha cu a ttha hrim lo, tiah a ruah.

"Gundogan kha tthadeuh in an chuih ding a si. Cun De Bruyne a chuihnak (position) kha a site a si lo," tiah Mourinho nih De Bruyne hmaikal a chuihmi kha a lungtling lo.

RELCHAP: Pathian Aa Bochanmi Klopp

Mourinho a duhning ah cun hnukham pawl kha a si khawh chung in naihte te an dir i an i bawmh ding a si. Atu i Liverpool bantuk he kaa ton caan ah cun hnukham pawl naihte in ka chuihter peng hna, a ti.

"Liverpool an i celhning cu Firmino kha alai ah an chiah i Salah le Mane nih a awngmi lam an kawl, on an i zuam. Cu bantuk caan ah cun hnukham pawl hi a si khawh chung in an i hlat lo a hau."

"Walker le Stone karlak in goal hnih an sut, i a dang pakhat cu Fernandinho le Angelino kar in a lut. Keimah sining ah goal hnih kha cu an goal ding a si lo tiah ka ruah ko. Tulio Liverpool kham cu a fawi theng lai lo, nain hnukham naihte chuihter hneksak ding a si," tiah a chim.

Chelsea-manager a ttuan lio 2014 ah khan Anfield ah Liverpool cu 2-0 in Chelsea nih a rak tei caah Manchester City premier league teinak caah a biapibik bawmtu a rak simi City nih nan philh tiah Sky Sports studio i mileng a simi Vincent Kompany (city ex captain) cu a chimh.

"Mah hrai (title) kan pekmi hna kha tutiang kan i lawm, nan ka ti rih lo. Premier League hrai kan pekmi hna lio ah phone te hmanh chawnh ka rak tong lo," tiah mirh nawn in Mourinho nih a chim.


Cc: Dailymail