October i Denmark ah an rak tuahmi Europe Champions 2019 ah Middle Weight in aa paimi Norway tlangval Van Lian Ceu cu a paih aa dawh ngai caah USA in aa tel khomi World Paih Champions (WPC) upa nih USA ah a sawm tiah theih a si. Heavy le Middle Weight pakhatnak pinah WPC upa nih Europe Champions hi aa paihmi chung in a duhbikmi pakhat aa thimmi a si.
Van Lian Ceu (26) cu 2004 ah Norway a rak phan i atu hi Bible sianginn a kai liomi a si. Pu Hmun Ceu le Pi Cer Cin i an fale pathum lakah upabik a si, i Norway i Egersund ah khuasami an si. A tung 5'5" a sang, i a khing 159lbs a si caah Middle Weight in aa pai ding lai.
Tutan World Paih Champions a kalnak kong he pehtlai in biahalnak 10 kan hun tuah:
1. Europe Paih Champions 2019 ah a paih aa dawhbik tiah USA Paih Kawmeti nih an sawm tiah kan theih i zeitindah na ruah?
- Kai lawm tuk. Paih ka thiam lo tuk nain paih dawh cem hna ka hmuh cu kai lawm tuk.
2. Thantlang peng hi paih a thiam tiah minthang an um lo tluk a si, i zeitindah paih hi na thiamning a si?
- Kei hi, paih thiam ti cun kai hmu ve lo. Nain paih ka vun zuamnak hi cu NORWAY CND ah kai pai ve i pariat ka tei hna hnu in ka lung ah a um thai kan ti lai cu. Cu hnu ah Youtube i Rung Lian Ceu le Uk Ling Thang te pawl an i paihnak ka zoh lengmang i mah cu hman khawh kai zuam.
3. USA kal naa thawh hlan le na phak hnu na ruahnak le lungthin aa dang maw?
- Zeihmanh ai dang lo. Paih club pawl an cawnnak tete ah ka va kal le an thiam ngai hna nain ka ttih hna lo. Pasal veve i paih ahcun zeipaoh a cang khomi a si ko tiah ka ruah i tutan ka rat cu keimah pumpak hmuhton kauhnak caah biapi in ka chiah.
4. Pumrua le taksa dawhnak ah Gym nan kal tikah eidin le thilri caah phaisa a dih, cun caan pekin an i timhtuah ciomi hi a phu ko na ti maw?
- Kei hi cu paih ruah ah ka tuahmi a si lo. Paih a lar hlan in pumpak ngandamnak le keimah le keimah zuamcawhnak caah ka rak tuah cangmi a si.
5. Paih in Laimi kan i cawm kho te lai tiah na ruat maw?
- Mah hi cu chim a har ngai. Atu ning hin cun i cawm khawh cu a si rih men lai lo. Amah belte kan naule hna nih an huam ve i gym hna an kaldeuh ve hnu ah MMA/UFC tibantuk phun in tuah lawlaw a si ahcun ai cawm khomi an um te ko hnga. Atu hi cu phaisa zong hmuhmi a tlawm tikah i caawmnak ding cu a si rih lo.
6. Paih hi na uarmi zong a si tikah na khing a simi "Middle/ Heavy Weight" ah USA le Europe Champion ka si khote lai tiah na ruat maw?
- Champions hmu ding in biatak tein kai zuam ahcun a si kho tiah ka zumh ko. Atu tiang cu Lai miphun ni lawng ah kai pai rih. Ka chim cia bantuk in atu zong hmuhton ngeihnak hi biapi ah ka chiahmi a si. Hmailei kong kan chim kho lo nain zuamnak paoh ah caan ttha ka ngeih ahcun kai zuam ko lai.
7. Lai tuanbia (tuanphung) chung patthawng na theihmi an um maw, hodah na uar?
- Kalaymyo in a tthangmi ka si i Lai tuanbia hi ka thei lo. Asinain tu chan i Lai pa tthawng ah cun Rung Lian Ceu hi a tthawngcem ka theihmi a si. Cun Sang Hlei Thang hi thazang cun a tthawng bak tiah ka hmuh i RLC tu hi cu paih zong a thiam, a tthawn zong a tthawng.
8. Bible sianginn na kai lio a si tikah hi bantuk taksa thazang lentecelhnak hi na zumhnak he zeitindah na kalpi? Football na thiam tuk ko nain Ziah paih hi nai thim?
- Paih le bawlung chuih hi thazang i celh an si veve ko le ai khat in ka hmuh ko caah Bible cawn a dawnhnak ka hmu lo. Cun Pastor ka ttuan lai ti zong kai timhmi a si theng lo. Sianginn ah Bible le Pathian kong chimtu saya si te hi ka saduhthah a si. Pathian cu kan ruah khawh leng in rian a ttuandeuhmi a si i bawlung chuih pah zong in aa phuang kho, i paih zong hi a sunparnak caah a hman khawh ko. Zei kan tuahmi paoh Bawipa sunparnak caah a si ahcun a ttha dih.
9. Hmai kum CND ah Laitlang i tlun in paih hna saduh na that maw?
- Kai tim lo. Mah cu hna cu keimah tuah tawk a si rih rua lo tiah ka ruah. Kai paihmi hi cu i hawikomhnak le nuamhnak sawh a si ko. Laitlang tiang va tlun i vai i paih cu kai tim lo. Cun mah lio caan khi kai manh lo ngai lio a si lai.
10. World Paih Champion nih Europe i paih aa dawhbik tiah an in kawhmi na si tikah hmuhton ngeihnak le nuamhnak sawh cun maw na kal ko? Teinak tiang naa zum lo maw?
- Kei ka lungput cu paih hi hawikomhnak le i nuamhnak a si ko, i sungh zong poilo i aung zong a ttha tthiam ko tiah ka chiah. Ai pai dingmi pawl hi leicung Middle Weight ah anih timi lawngte an si lai caah ka thiamnak hi zei tlukdah a si timi theihnak hi biapi ah ka chiah. A ruang cu kei hna hi cu bual zong ka co bal lo tikah USA WPC i kai tel khawh hmanh hi ka caah a za tuk cang tiah ka ruah. Asinain kai thawkka lawng a si rih. Norway le Europe in thazang a ka petu le paisa laksawng a ka petu nan zapi cung ah kai lawm tuk. Kan i paihnak zong rak kan zoh te ulaw, Norway le Europe minthatnak ding in kai zuam ve lai.
Lykke Til. A lang in tha kan rak in pek ve lai.
Comments
Post a Comment