Chin State Chung Hlei Minthang A Si Ding Kaladan Hlei

Chin State thlanglei i Paletwa ah an ser liomi Kaladan hlei cu an lim cuahmah cang. A tang manthlak hi may 30. i an thlakmi pawl a si. Paletwa peng khua 200 reng lo nih an i tthat hnempi lawng si lo in Chinram caah a biapi ngaimi hlei a si lai tiah ruah a si.

Mah hi Kaladan hlei cu Kyat 27 billions dih in ser ding timh tuah a rak si, june thawk tiang ah 68% cu an liam cang tiah Myanmar Times nih a ttial. An lim tikah cun India, Rakhine, Bangladesh le Chin pehtlaihnak a tthat pinah hlawknak tampi a pe khomi a si lai tiah an ruah.

Kaladan project nih tthathnemnak a pek lai timi hi zeitluk hlawknak dah a si te lai? Atu ah cun mi tampi an lung a hring. India le Tuluk an i hlawknak men a si lai i Rakhine i Rohingya pawl siseh Bangladesh i a zammi Rohingya pawl khi Kaladan hlei hmang in Chin State, in Sagaing le Shan ram pawl ah an vakvai lai, Kachin ah an lut lai timi ruah le phan lo awk a ttha lomi pakhat a chuak.

Abik in Chin miphun hna nih kan ram chung i runven nawlngeihnak upadi Chin State parliament le Naypyitaw hmang in kan i ngeih zau lo ahcun, kan hlawk dingmi hi a tlawmte lai tiah ruah a si.