Vawleicung i democracy ram nganbik si hi thil fawi cu a si lai lo. Cucaah vote a thla kho ding million 900 umnak India cu an cozah thimnak hi April 11. in a thawk in may 23. tiang an tuah.
May 23. zan ah tulio an Prime Minister Narendra Modi nih Gandhi te dawng in aa cuh vemi Rahul Gandhi cu a tei tthan hna i a peh lai ti a hun fiang. Modi hi India Hindu Nationalist a si i a tthawngttha ngaingaimi a si. India cozah a tlaih hnu in fawite in hohmanh nih an tawng kho theng ti lai lo.
India cozah thimnak an thawk hlanpi in tei ding an rak i zuam cang i Paskitan he er-taunak in India mipi sinah vote kawl a rak thawk cang tiah leicung ramkhel thiamsang hna nih an rak chim. Pakistan le India hi Muslim le Hindu biaknak ruang ah aa tthenmi an rak si i Hindu biaknak biatak tein a dirpitu party le prime minsiter nih ram an uk tik ahcun India i Muslim pawl caah a har ngaingai. Human Rights Watch nih report an tuahmi ah India i Muslim pawl hi Hindu Nationalist phu nih an thah lengmang hna ti a si. Cucaah Modi nih teinak a hmuh tthanmi cu Muslim pawl an i lawm lo ngaingai.
India Democracy a biapit ning:
India hi Vawleicung ah a biapi tukmi ram a si. Democracy ram ciocio ah milu an tambiknak a si lawng si loin hriamnam, sipuazi, technology/ nuclear, fimthiamnak le khuacaan thlennak kong ah an hun biapi chin lengmang.
Asia ah India cawlcanghnak hi a herh taktak. Mah hi ram cu democracy lamthluan ah a fek rih lomi le aa zuam cuahmahmi Pakistan, Bangladesh, Nepal, Myanmar, Sri Lanka le Afghanistan nih an kulh caah hin India politik hi biapi ngai a si ko.
India ah vote a thla khomi million 900 an um. An milu taktak cun 1.450 billion hrawng an si. Cu vialte minung vote thlak khawhnak ding caah cakuang hmun 1.1 million a um, i vote thlak caan an i ting sual lai lo tiah vote thlak ni- ni sarih an awnh: April 11., 18., 23. le 29., cun may 6., 12. le 19. tiang hi ram tthen pawl le khuate kip ah vote thlak caan a si.
Vote relnak seh million pali hrawng a um i an ram khuate vialte, a kenne tiang vanlawng, mawtaw le a herh ahcun kalauk le vui hna zong an hman i an phakter dih. Vote relnak seh pawl an hun i an rel tikah a congtu minung an um, CCTV a hun i vote relnak hmun i a cawlcangmi vialte tlaih dih khawh aa zuam. A ruang bik cu India cozah thimnak ah lih, hrokhrawl le vote fir um hlah seh ti an duh caah a si.
Modi cu Bharatiya Janata Party a si i 2014 in cozah an tlaih. Anmah hlante ah kum 10 chung Indian National Congress nih czoah an rak tlaih. Nehru le Gandhi te dawng party a simi Indian National Congress party cu tutan zong a sung tthan i Hindu biaknak pakhatnak ah a chiami Modi party nih ram a hruai tthan lai.
Comments
Post a Comment