Ralhrang Kong Kawlram Caah Phan Ding Si Maw?

Thawhthan zing pumh i Sri Lanka Khrihfa 260 a thattu National Thowheeth Jama'ath, a tawinak in NTJ cu ISIS sinah a rak cawng balmi, ISIS thluak ronhmi an si. Sri Lanka khawh in Rohingya muslim a hremtu Myanmar an phomh khawhmi a si tiah media nih an chimrel.

Myanmar cozah aiawh biachim kho U Zaw Htay zong nih kan ram hi ISIS hmuitinh a si tiah Sri Lanka bomb puah khawh khan ralrin peknak a tuah. Zaw Htay chimning ah ISIS pawl cu Iraq le Syria ah ral an sungh caah Rakhine lei ah an i tthial. Asinain biafiang a si rih lo.

Chinram ah cun phan ding a um tuk lo, nain Yangon le Mandalay ti bantuk khuapi pawl ah a chuah ding a lam tamdeuh ngai. Sihmanhsehlaw, phan ding a si lo tiah Anthony Davis nih a chim. Amah hi Bangkok-based security analyst a si i Jane’s defence and security publications ca rian a ttuanmi a si.

Ralhrang / Terrorist he pehtlaih in RELCHAP.

"Atu tiang ah cun ralhrang pawl he pehtlaihnak a hri Kawlram ah kan hmuhmi a um rih lo." tiah Davis nih cun a chim i "Kawlram cu Buddist nan si i Theravadha Buddist cu "mi dang a ing kho lomi" a si i Islam nih an buai hnawh hna ahcun a lehrulh an hman caah, Sri Lanka i a cangmi bantuk hi cu Myanmar ah a can ding a har ngai ko." a tiah Frontier Myanmar ah a chim.

Myanmar ah cun Muslim lunghrinhnak (ttihnak/huatnak) te hi an i chuahpimi phunkhat ah a si caah i runvennak lei ruah tikah aa runveng cia bantuk an si. Muslim pawl cung lung hngialnak a um ruang ah Rakhine i Rohingya buainak zong a chuah phah hi a si i Myanmar ralkap (runvennak) le sungthoh hna nih a hlei in Muslim hi an ngiat khun hna tiah Davis nih cun a chim.

Myanmar cu muslim ram a si lo. Cu tikah mi tlawm a simi Islam pawl an lal ngam lo. Cucaah an biaknak an i dan tuk ko bu ah remdaihnak te in khuasak le Kawl lak ah um kha an duh ko tiah Anthony Davis nih cun a ruah.

A chimmi lak ah pakhat te ruah awk ngai a simi cu: "Extremist timi Islam biaknak (ihruh pi/ a chungluh tuk lehpek) fektuk i tlaihnak, asiloah zeithil poah hi thingkung cung ah aa thlaimi a si lo. Chungkhar le zatlang ah a nungmi a si i mah ah cun aa hngat." ti a si. Chungkhar ah hin Khrihfa nun zong siseh ziaza zong a hram aa bunh ti bantuk a chim duhmi a si.

Myanmar ah Muslim ralhrang cu fawite in an cawl cang kho lai tiah ruah a si lo, nain anmah Kawlmi lila chung hin Islam huat ruang le ralkap ttanh ruang ah Buddist biaknak hmang hin a cawlcang mi ralhrang te hna um khawh a si tthiam.



Frontier Myanmar