Asinain Nelson Mandela nih a thih tak hna hnu ah South Africa cu ANC chunmang a tlinh kho ti lo. Tu chun thimnak an tuah hlan tiang ah ANC a uarmi zatuak in tamtuk a zor tiah African media pawl nih an ttial. A ruang tampi a um.
Minak le mirang thleidang in ram a rak uktu Apartheid pawl a rak do i thong zong saupi a rak tlami Nelson Mandela Party ANC nih an ram mipi hna lung an lak khawh lonak a ruang le an ram an tthanchoter khawh lonak a ruang hna lak ah pakhat cu Ziknawh, cozah nih phaisa vialte mah chungkhar le zalsenh ah an i lak dihmi hi a si.
Jacob Zuma cu Nelson Mandela president rian a chawngtu a si i tuni tiang a ttuan, nain cozah phaisa kha mah pumpak inn saknak le remhnak, puai tuahnak, dumchung tilionak, ar zuatnak tibantuk ah aa hman. Zuma president a ttuan chung ahhin an ram phaisa Trillions (USD million a zaza) in a lotlau. Mah phaisa cu rammi nih ngunkhuai an pekmi cozah phaisa an si.
Sout-Africa ah siifak le mirum an thleidang tuk. A rummi an rumtuk i a siifakmi caah zawnruah a um lo caah Nelson Mandela chunmang he aa pialkan. (Kan page Photo Album ah Mirum le Sifak i Tonnak timi ah khin Africa mirum le sifak dirhmun a lang ngai.) Mandela hnu ah Zuma nih kum 10 a uk manh cang. Ziknawh le eihmuarnak amah nih a tuah caah an ram ah eihmuarnak a do kho lo. Cu tikah kum 25 chung ram an uk cang nain zei lam dah a zawhpi hna, khawidah a pialpi hna?
ANC party chung ah tthencheunak a chuak. An i zum hna lo. Sual an i phaw hna. An kalpi duhmi pawlasi aa dang hna. Mah lakah cun ANC party i an president Cyril Ramaphosa hi mipi nih an uar tuk. Amah belte an ram siipuazi zeitin a kaiter lai timi biahalnak a lungre thei khim, a fawi ding a si lo, a ti. ANC nih za ah za in tha an pek a si ahcun ANC caah ruahchannak a um ngai rih.
Aruang cu Democratic Alliance (DA) nih an tthawng ngai nain 24% hrawng ah an um i Economic Freedom Fighters (EFF) hi 14% hrawng an hmu ve. Tuning a si ahcun ANC nih 60% leng an hmuh lai caah ruahchannak a um, cozah an tlai kho lai nain Parliament ah hlan bantuk in nawl ngeih ti dawh an si lo.
--
A tawinak in ttialmi a si. Na siaherhmi Share ve hna. Blogg kau na huam lo cun FACEBOOK PAGE Like/follow tuah khawh a si.
Foto: Nelson Mandela UN i bia chim lio.
Cc: Wikipedia, UN, NRK, Aftenposten
Comments
Post a Comment