Ca Na Relmi A Hman Le Hman Lo Theih Khawhnak

Chinmi nih thawngpang le ca kan relnak hmun cu Facebook a si cang. Chin website/blogg pawl nih ni khat i ca an thlahmi hi a tlawmbik sawmnga hrawng a si. Mah blogg/website pawl cu News/media le journalist phun in an um i Chinmi Facebook ah rawl fah in a kan fahtu an si.

Mah hi Chinmi kan vanthatnak zong a si bantuk in kan vanchiatnak zong a si chih. Zeica tiah kan miphun, kan zatlangnun le pumpak caah a herh lomi ca thlah a tam tuk. Tthanchonak a pe lomi, thlennak a pe lomi ca hi a tam ngaingai. Cun thawngpang dik a si lomi, phuahchom le ttawnchommi thawngpang, mi kong ceihnak, mi mualphohnak cathlah hi Chin min pu News/media aa timi le blogger pawl an tam tuk. 

Cu bantuk ca pawl kha ruat set lem lo in caan pek in a rel lengmangtu kan si ahcun mi vanchia taktak kan si hna lai. 

Zeitindah Facebook i cathlahmi pawl a hman le hman lo, a dik le dik lo timi kan thleidan khawh lai? Mah hi na caah a biapi biahalnak a si maw? 

Mirang nih "Source Critic" an ti, i ca/thawngpang a hram zoh in a hman le hman lo thleidan khawhnak ah a tanglei biahalnak pasarih hi ruahchih a hau: 

1.) Na relmi ca/information/news hi zei website/blogger le aho nihdah a ttial?

- Na rel le zohmi thawngpang, ca le information a thlah/ttialtu hi hodah a si na thei  maw? Mi dang nih ta an theihmi a si maw? 

2.) Mi dang nih ta an ttial ve maw? 

- Na relmi ca/news/information hi website dang le hmundang ah an ttial cio maw? 

3.) Ahodah mah information le ca/thawngpang a petu/ a hram a si? 

- Thawngpang asiloah thil pakhat kong kha a ttialtu, a petu le a thlahtu hi a biapi ngai. Zeibantuk lungput in dah a thlah, a pek? 

FAKE NEWS (thawngpang deu) cu zeidah a si? 

4.) An thlahni ca kong he pehtlai in Journalist le editor min an ttial chih maw?

- Information/ thawngpang dik ttial tikah cu thawngpang an laknak he pehtlai in a chimrel hmasatu Journalist le editor min te hna telh chih lo cun zumh a har.

5.) An thlah/ chuahmi ca/thawngpang hi politics hmuitinh a ngei maw?

- Chinmi le bang hi cu ca kan rel tikah kan relmi ca nih kan miphun chung ah zeibantuk tthencheunak politics dah a tuah timi ruah chih a herh ngai. 

6.) A ttialmi/ thlahmi pawl hi amah pumpak ruahnak an si maw? 

- Ca kan rel tikah an ttialmi kong ah anmah pumpak ruahnak a si le si lo zoh ding a biapi tuk. 

7.) An tarmi hmanthlak hi an ttialmi ca/thawngpang kong i an thlakmi a si maw? 

- Facebook i a kaimi Ca le hmanthlak kan hmuh tikah a ca asiloah thawngpang le a hmanthlak hi ruah chih a herh ngai. Hmanthlak si lopi hna tar, i a biatlang le a chung ca he aa tlak lomi a si cun cucu a poi ngaimi a si. 

Aung San Suu Kyi FAKE NEWS

A ttha tiah na ruah ahcun na hawile, na chungkhat pawl theihter ve hna. Khrihfabu le community pawl zong ah mah hi ceih le ruahpi ngai cio kan hau hna tiah na ruat maw?



Cc: NRK.NO, AP