"Tilawng in an ka hlonh."
"Aziah an in hlonh?"
Thin sau a hun i zuam, "Pathian sin in ka zaam ruang ah." tiah a chimh hna.
"Ngapi paw chung na um lio ah na thinphang maw?"
"Um." ti lawng a leh, ngakchia pa nih "Thla na cam lengmang maw?" tiah a hun nolh.
"Um." A thabat par le buhrit buin hmaipanh aa zuam.
"Pathian na zamtak a si ahcun zeiruang ahdah a sinah thla na cam țhan kun?" tiah a hal.
Jonah cu a ar ko. [Jonah cauk ah ummi bia cu an si lo.]
Profet Jonah cu Pathian nih zumlotu asimi Nineveh khuapi ah rawhnak a tlung lai tiah vung chim hna tiah a fial nain a sual tukmi khua a si ruang ah an ka thah ko lai ti a ruat i hmun dang ah Pathian sin in a zam ti kan hmuh.
Pathian cu Israel sin lawng ah a um lo. Van le vawlei hi a ser i a sangbik van ah khin a țhu. Vawlei cu a ke chiahnak a si ti kha cathiang ah kan hmuh. Salm cațialtu nih "Rili tawne i ka um zong ah cuka ah cun na rak um ko." a ti bang khan Jonah cu a thukbik rili chung i ngapi paw chung i a um zong ah khan Bawipa nih cun a hmuh ko. A hngalh ko. A philh lo. Cucaah Jonah cu a zam kho lo.
KA DAWTMI ka hawi pakhat nih "Kan thlacamnak vialte hi Pathian nih a kan ngaih piak dih hnga maw? A kan theih piak dih hnga maw?" tiah a ka hal bal. Jesus nih fiang tuk in Matthai ah a chim, "Zumhnak in nan halmi vialte hi kan hmuh cang tiin thlacam ko u." a ti i Salm 115 ah "Van le vawlei sertu nih kan thlacamnak kha ngaih a duh." tiah a țial.
Jonah cu a muih in muimi rili ne, cu hmanh ah ngapi pawchung i a um lio ah khan Bawpa cu a auh i thla a camnak cu Van le vawlei sertu nih a theih piak. Cu pa cu Pathian a zamtaktu a si. Pathian cu khawika paoh ah a um. Vawlei pumsa duhnak lam kan i thim i thihnak lam cung kan um lio zong ah ngaihchihnak le lungthin takte in amah sinah thla kan cam a si ahcun kan thlacamnak a kan ngaih piak lawng si loin "kan sualnak kha a ngaihthiam i a kan damter, (2.chanrelnak)."
JONAH cauk hi a tawite nain sermon a phunphun a chuak. Pathian vel le lungsaunak fiang ngaiin a lang. Asinain a reltu kan caah a biapi cem tiah ka ruahmi cu thinlung takte in Bawipa sinah i ngaihchih le thlacam lengmang hi a si. Nineveh khuami cu Israel ral an si. Pathian thimmi an si lo. Asinain an siangpahrang in an tlangbawi le upa hna nih Pathian sinah thinlung tak tein thla an cam tikah cun an tuah tawnmi sualnak le țhatlonak kha an mer tak caah Pathian thinhunnak cu meițil titawih bantuk in a dai țhan.
Pathian a zum lo i Pathian nih a thim lomi hna hmanh nih lungthin tak in thla an cam tikah an thlacamnak cu a leh hna a si ahcun kannih a thisen in cawkmi a fale nih kan sual i lam kan tlau cuahmah bu zong ah Jonah bantuk in i phuhrung lote in lungthin tak le sualchirnak he a sin ah thla kan cam ahcun a kan dawtu Pathian nih a kan ngaih piak zungzal ko.
"Ka au ulaw kan leh hna lai." Jeremiah 33:3a
Facebook Page LIKE law fawite in ca rel ve.
Comments
Post a Comment