USA Nih Africa A Chuahtak Lio Ah Russia A Lut

Africa ah amah tein aa ukmi ram 54 hrawng an um i a luancia kum li chungte ah a zatceo hrawng cu Russia he ralkap lei rianttuan ttinak an ngei cang. [Hmanthlak: Russia ralkap Egypt i training an tuah lio. Nrk]

Cu hlan cu USA nih a ralkap tambik a chiah hna i ralkap lei rianttuan ttinak lian le kaubik a rak ser nain Trump cozah kai thawk cun an rianttuannak an ngol thluahmah hna. Cucaah Africa ram tamdeuh nih hawikom thar le rianttuan tti hawi an kawl i Russia nih lunglawm tein a cohlan.

Africa hi vawlei chuak thil man sung si seh, an ram chuak thilri man ngei tamtuk a si caah Tuluk le bang nih cun a lamkip in a hramsihnak a tuah cuahmah. Vawleicung i ral a tamnak, ram chuak thilri i cuhnak a tamnak pakhat a si i ralhrang le tapung, mifir an tamnak a si caah uktu pawl nih ralkap lei fimthiamnak tampi an herhnak ram a si i cucu Super-power ram timi USA, Russia le Tuluk pawl an i bochan hna.

Africa i Khrihfa pawl hi Muslim pawl nih nawn dih an duh hna, an i do peng. Mah kong hrim ahhin Khrihfa ram a simi le Khrihfa a rak si balmi ram pawl nih bawmh a herh ngaimi a si. USA nih a chuahtakmi hi zumhnak lei in siseh vawlei chuak thilri duhnak (interest) in siseh, vawleicung pehtlaihnak le nawlngeihnak hna in ruah tikah a ttha lo ngai tiah nitlak lei fimthiam hna nih an ruah.

UN ralkap a thongthong in an chiah hna nain a za lo. USA he ralkap lei hnatlaknak an ngeih lio ah ram cheukhat cu an him, a daideuh. Cu bantuk cu US nih an chuahtak hna hnu zong ah Russia he rianttuan ttinak nih an ram a daihter i a himterdeuh ve hna ti a si.


Tapung le ralhrang pawl do ning, thah ning le cihmih ning kha biatak tein an cawnpiak hna.

Africa ram tampi le Soviet-union timi Cold War hrawng tiang kha pehtlaihnak an rak ngei nain sipuazi ruang ah phaisa an rak har i Russia nih a rak ngol. Atu cu a thar in a hun pehtlaih tthan hna.

Russia nih Ukraine a buai hnawh hnu in G20/ G7 siseh nitlak ram pawl nih biatak tein Russia cu an hrial, an phih, pehtlaihnak an chah. Asinain Russia nih zeipi ah a ruat tuk lo, hmunkip tu ah ram kip he pehtlaihnak ttha ngaih aa zuam, i Super-power ram lian si kha aa zuam chin lengmang ve.

Cc: Reuters, Nrk, wikipedia