Mipi A Kamh Hna Ningte In Rianttuan A Thawkmi Mexico President Thar

Mexico thimnak a tei i preisident a hun simi Andres Manuel Lopez Obrador nih thimnak aa cuh lio ah mipi a rak kamhmi hna cu president a si ni hnih ah a tlinter taktak tiah media nih an ttial.

"Kan ram president ka si ahcun khualtlawnnak ah president nih a hmanmi vanlawng hi ka zuar lai i cozah phaisa a si lai." tiah thimnak ah bia a rak i kam. Cu lawng si loin Vawleicung i ttih a nungbik ram panga ah aa telmi Mexico hi a thuh khawh chung thuk in purh i thlen khawh kaa zuam lai tiah a rak chim.

Atu i a zuar dingmi Mexico president-vanlawng cu Boeing 787-8 timi a si i a min ah Dreamliner tiin tampi nih an theihmi a manfak ngaingaimi a si. Tu zarhpini ah khan president thar a hun simi Lopez Obrador nih kan zuar tiah thawng an thanh. Atu hi USA ah check-up an tuah lio a si i a cawtu an um cun an zuar colh lai. An cawknak kum khat-hnih lawng a si rih i US$ 218 million in an rak cawk.

Mah ti an president thar in ram cozah caah phaisa kan herhdeuh tiah zuar a timhmi vanlawng cun president in a chuak cang ding Enrique Pena Nieto nih cun Argentina i G20 tonnak ah a hman hoii cucu a hnubik an hman a si ve. Mah G20 thimnak a dih in Enrique cu president ttuan caan a dih ve.

Atu an president hi a luancia kum 90 chung ah cozah a tlaimi party hna chungtel a si lo. An ram nih a herh tukmi Criminals, Sifahnak le ziknawh-eihmuar do ding fekte in a aupi caah an party fate nih thimnak ah tampi a tei. Parliament/ Congress zong ah amah party an tamdeuh.

Finance minister Carlos Urzúa nih cozah ngeihmi vanlawng 60 le Helicopter 70 zong zuar ding ah kan chiah rih lai, a duhmi cawk khawh a si tiah thawng a thanh.

Mexico hi leiba tampi a ngei ve, an cozah ah ziknawh le criminals/gang/ mafia he rianttuan tti a si lengmang caah atu an president thar nih a biakam ning a tuah ahcun an ram a ttha ngaingai lai, aa thleng ngaingai lai. Asinain ritsii zuar pawl le mafia pawl kut in zeicandah a nunnak a him lai timi biahalnak a um.

President Lopez Obrador nih "rammi nih an hman ciomi vanlawng in khualtlawn khawh a si ko, i mawttaw zong atu ka hmanmi mawttaw Volkswagen te hi ka hman ko lai, tiah a chim.

President hna lakah a siifak bikmi Uruguay president kong na rel cang maw?

Myanmar cozah/ NLD pawl nih cawn tlak ngai a si lo maw?

Foto: AP/Scanpix