Tu kum november cu USA ah i thim thla (Eelection month) a si. President thimnak a si lai lo. Laiholh in "caan karlak thimnak" ti khawh a si. Cucaah Trump hi thimnak ah aa zuam lai lo, nain hi thimnak cu Trump kong deuh a si lai.
Zeiruang ahdah "Caan karlak thimnak" an ti?
USA president thim caan pahnih karlak thlak in an tuahmi thimnak a si caah "Caan karlak thimnak" tiah an ti. Mah cu Congress member thimnak a si. Congress ah House of Representatives le the Senate an um. Kum ruk dan in thimnak an tuah. Congress kong fiang deuh in rel ve.
President Donald Trump cu tutan thimnak ah a min um lo. A sung kho lo. Asinain november 7. i thimnak phichuak nih a taangmi a president ttuan kum hnih caah zeimawzat lai a rel ding a si ruangah a caah a biapi ngai ve.
Hi thimnak nih president sinak in Trump a thla kho lai maw?
Nihin tiang cu president Trump party a simi republican pawl hi House of Representatives le Senate ah milurel an tamdeuh. Atu tiang i Gallup/poll ning ah Democratic nih House of Representatives ah teinak an hmuh khawh ti a si. Cuti a si tak ahcun Senate zong ah teinak an hmuh ding an i ruahchan ngai. Asinain thil fawi a si lai lo, republican nih Senate cu an uk rih ko lai timi State kip thawngpang zoh in a ruah khawh a si. Cucaah zakhat ah zakhat in Democratic party nih Trump hi an do kho lai lo.
USA president zeitindah a rian in chuah "impeachment" khawh a si timi kahin kan rak ttial cang.
President pakhat tthumh khawh nakding ah House lawng nih biakhiahnak a tuah kho lo, zeibantuk sualnak an hmuh zong ah Senate nih biachahnak a tuah ve a herh. Republican nih Senate an uk rih ko a si ahcun an party minung President a simi kha aa ttha lo tukmi sualnak a tuah dah ti lo ahcun an ttanh in an chanh peng ko lai.
House le Senate ah Democratic nih an uk ahcun president Trump nih biatung a dirhmi a tamdeuh cu an kham/thluk khawh lai. Cu a si lo le zeidang a biapimi thil pawl ah rianttuan tti an i zuam lai. Hi caan karlak thimnak nih hin president a hnursuan khawh ngai nain, president in tthumh khawh nakding cu a lam bi tuk.
Rel chih: USA president a nawlngeihnak
Trump hi an phuah kho lai lo, nain a ralaimi kum hnih chung ah White House politik kha hna an hnawh khawh. Cuaah 2020 president election caah Trump harnak an pek khawh. Aruang cu 2024 tiang khi tutan caan karlak thimnak i thimmi pawl hi an to ding a si caah a si.
House le Senate ah Republican nih uknak an tlaih tthan ah teh?
Republican nih ruah lopi in House he Senate he teinak a hmuh tthan a si ahcun a luancia kum hnih i kan hmuhmi bantuk deng hi aa pehzulh rih lai. Asinain 2020 ah hodah president aa cuh lai i a tling lai timi ah khin hmailei caan cu aa hngat hnga.
Democrat pawl an sungh ahcun an ingpuang lai, an sivang lai. Republican pawl belte teinak taktak an co tinak a si lai i Trump nih USA hi a hmanmi lam ah a hruai ko timi tehte pakhat bantuk ah a cang lai. Cucaah a ralaimi 2020 ah mah le mah i zumhnak thazang a pek hna lai.
 |
Birthright Citizenship Le Cu Covo A Ngeimi Ram Hna |
Note: Ka blog le Facebook page ca pawl hi zangfah tein copy past ka tuah piak ti hlah u, nan siaherh si ahcun Share ulaw hawi dang nih an rel cio ko lai.
Cc: NRK, NBCNews, VG, Wikipedia
Comments
Post a Comment