Mah cu kong he pehtlai in Myanmar News Media Council cu president sin ah report an tuah. President Win Myint pumpak nih MNMCouncil hruaitu cu a chawnh i november 29 ah press conference nan tuah a herh ti a si.
Zeiruang ahdah an report hna ti ahcun The Speaker nih an thawngpang ttialmi a biahram an lakmi hi president zung he aa naihniam mi rianttuantu pakhat nih an kan pekmi thawngpang a si an ti, nain president nih a fehter lomi thawngpang a si ruang a si. Cucu a fekmi le a dikmi thawngpang si loin hna theihnak sawh in thawngpang an ttial caah a si. President nih careltu le president zung rianttuantu hna ngaihthiam nan hal hna a herh tiah a chimh hna. - USA i White House rianttuan pakhat asilole Congress/ruahnak petu asiloah cu zungpawl he aa naihniam mi sin in kan theih; tiah American media nih an ttialmi khi a tamdeuh cu fehter ciami offcial in thanh hlan ah an hawile journalist/media agency an pek hna, asiloah an zuarmi khi a si.
Mah hi zawn ahhin CM pali le minister cheukhat rian dinhter an si lai tiah thawng a chuak, tiah an ttialmi tiang khi cu tampi aa ning. Asinain Jornalist min ngei, zumhtlak journal pakhat nih a hlei in a ttialmi; Maan-taing CM le Dr. Win Myat Aye cu an i tel lo, timi hi thil lo taktak cu a si. The Speaker hna cu ttawn-cop siloah a si kho timi Conspiracy Theories a ttialmi an si lo ahcun mah Maan-taing CM le Dr. Win M. Aye kong an ttial chapmi te hi Journalistic moral le ethics kong ah biahal lo awk a ttha lomi a si. Mi tawsawh hi media/journalist rian a si hrimhrim lo.
Kawlram ah media zalennak a um lo tiah heh kan chimrel. A zalen lo taktak ko. Asinain hi aa hungmi innka te hmanh ahhin ning cang lo in a rian a ttuanmi media pawl an tam tuk. Khatlei in vanchiat vantthat ah IT- Social Media kan phanh ve cang caah FAKE NEWS tamtuk a chuak i cozah hi an mawh tawn lo.
Nihin kan ram khi politician le party pawl lawng nih an thleng kho lo. Media le journalist an biapi tuk. Ram tampi hi Journalist nih an rak thlen. Asinain a dikmi le a dingmi thil a phuang le a chim khomi media si cu a biapi taktak.
Napoleon nih "Ral million khat nakin thawngca (newspaper) pathum hi ka ttihdeuh" tiah a rak chim. Journalist rian a ttuanmi tampi an tuanbia zoh tikah cattial sawh le pawcawmnak sawh a rak si lo, ram an rak dawt ruang ah a simi a tampi hmuh an si.
Nihin kan media pawl cu Cozah Secretary ko an lo. Cozah thil tuahmi, sermi le an chimmi lawng an ttial, an chimrel. A bikmi Lai media ko hi an zual. An thawngpang ttialmi zakhat ah pahra hrawng te lawng hi rian a ttuan (impact) kho tiah ka hmuhning a si. Cu lo cu mi tuah cia tial le thanh, secretary fa tete an si ko. Napolean nih a ttih lo tuk hna lai.Lai website a tam u cu theihtlei le zerkong hna nan rel huam cun rel ding, a sinian thawngpang le zatlang kong an ttialmi belte a reltu khua ruat ngai le lunghrinhnak he rel a biapi ngaingai. Mah hi a si kho maw, a sitak hnga maw, a dang nih teh zeitindah an ttial timi kha a ruat khomi careltu le mipi kan si a herh ngaimi a si. Mah ti cun democracy lam karhlannak ah i bawmhchanh cio a si.
Fake News kong ah tulio Kawlram Deputy Minister for Information U Aung Hla Tun cu BBC nih biaruahnak a ngeih i Fake News nih zeidah a chuahpi khawh timi tlawmte a chim. A tthat loning zong a chim. Media hi kan herh tuk, a sinain cawnnak tampi le upadi zong tampi theih a herh tiah a ruah.
A tang ca hi na rel cang maw?
BBC nih Aung Hla Tun interivo-Kawlca. Cc: VOA
Caan pek in na rel i kai lawm.
Comments
Post a Comment