Zayn Malik, kum 25 hi England ah muslim chungkhar in a tthangmi a si i an chuahkehnak cu Pakistan a si. A hmet tein islam biakinn ah Quran a cawng i a relmi a si. Quran cu rawlkhaih in khaihmi a rak si ve.
Asinain tu cu Huffington Post nih a tialning ah mah hi a biaknak he aa tthen cang. Khrihfa in Muslim ah aa thlengmi tu hna an um.
Fashion minthang magazine Vogue nih intervio a tuah lio ah Muslim ka si ti lo ee, tiah a chimmi in theih a si. Asinain muslim a rak sinak nih a nunnak ah tthatnak tampi a pek caah lunglawmhnak zong a chim chih.
Kum 25 lawng a si rihmi Malik nih a chimmi cu ka kum a hung upa deuhdeuh i biaknak nih a dirpimi tungtlang (principles) pawl hi ka ruah tikah ka lungtling lomi a tampi ti ka hngalh ti a si. Biaknak nakin a biapideuhmi cu mi ttha pakhat si hi a si ko, tiah a chim.
"Minung nih a thi thlormi sa phun ei theng a herh tiah ka ruat lo. Cun Ni khat ah voi ngan thengmang thla cem zong a herh ah ka ruat lo. Ka zumhmi cu mi ttha si hi a si. Na tthat ahcun zeipaoh a ttha ko lai (thih hnu zong)," tiah intervio ah cun a chim.
"Biaknak timi cu pumpak pakhat le a zumhmi kar (private kong) a si tiah ka zumh. Pumpak in muslim ka si ti lo nain thlarau lei kap ruah ahcun Pathian hi a um ko ti cu ka zumh ko. Hell-mei a um timi belte hi ka zum lo." tiah a chap.
Biaknak hi aa dawhnak zong a tampi ko tiah a chim i Muslim in a chuahmi kong ah a nu le pa nih an mawhchiat loning le amah duhthimnak a si kong zong a chim.
Asinain a nungak Gigi Hadid te chungkhar hi biaknak lei aa pe ngaimi an si tiah theih a si.
"Pillow Talk" timi hla in model minthang Gigi Hadid (23) he an rak i duh i tu kum thawk ah khan cikhat te an rak i tthen. Asinain atu cu an i fonhtthan cang ee tiah an Instragram in an i duhning le an i fonh tthanmi an langter.
Gigi Hadid cu Palestine in a rami an si, i US ah an chungte an in an um. A pa Mohamed Hadid (70) cu Nazareth ah a chuakmi a si. An biaknak islam lei ah aa pe tukmi le an biaknak a uanthlarpi tukmi a si. A fale hi biakinn a kalpi lengmang hna.
2017 ah khan Gigi Hadid le a nau-nu nih Muslim kan simi hi kan i uang tuk ko tiah an rak chim. Asinain, a tlangval Malik nih an biaknak a chuahtak hnu in Gigi Hadid cu muslim a si ve ti maw si ti lo timi hngalh a si lo.
An i tthen chungmi zong hi Zayn Malik muslim in a chuah ruang ah si dawh ngai in biak a chuak.
Khrihfa (RC) in Muslim ah aa thlengmi hlasa minthang zong an rak um ve.
Hmanthlak hi caan zeimaw an i tthen hnu a auh khawh tthanmi a nungak Gigi Hadid he an si.
Comments
Post a Comment