C. Ronaldo Le Suibawlung Kong Biathli

January 13, zanlei cu ahodah suibawlung an pek lai tiah bawlungchuih a huammi le a uartu paoh nih theih duh ngai le thinphang ngai in an hna an rak tun cio. December 2013 ah khan suibawlung a co kho ding minung pathum Ronaldo, Messi le Ribery lakah pakhat a si lai, tiah FIFA nih a rak thanh. Kan uar hleimi bawlungchuihtu a si lo hmanh ah uardeuhmi kan rak ngei cio. Cheukhat cu aa betting (i dangh ding) tiang in an zumhmi an rak chim hna.

Kum li chung peh in bawlung vawlei ah siangpahrang bantuk in a dirmi Messi cu 2013 ah Ronaldo nih a von pawnchuah khawh. Leicung ah bawlungchuih thiambik le World Cup voithum pakhatnak a laktu Pele nih "2013 Suibawlung cotu cu Ronaldo." tiah a von chim i ka kut ka bengh ve. Asinain Ronaldo cu a ttap thluahmah ko. Aa lawm, a nu a hmuh ah a lunghno i a fapa te nih a von dawi ah cun a ik pah, a mitthli kurkur in a tla.

Ahohmanh nih a suibawlung cu an chut kho ti lai lo. Asinain hi suibawlung he pehtlai in bawlung media le vawlei ah ceih supsapmi biathli tete nitin in a hong chuak. Cu biathli tlawmte kong luh hlan ah nihin bawlung vawlei tlwamte in von zoh hmanh sih.

FIFA President Sepp Blatter
Bawlung vawlei ka ti ttheomi bawlung he ai pehtlaimi bu pawl a simi FIFA, UEFA le a dangdang bu pawl hi cozah bantuk an si cang hna. Ahlei in FIFA hna cu nawl an ngei kho tuk, phaisa lehthal cawk lo in an luhchuahter khawh. Cu tikah an karlak ah politics rim a nammi a tam tuk ee, tiah media le a chung rianttuantu tampi nih an phuan pah cuahmah cang. Cu bantuk hmun paoh ah eihmuarnak le ziknawhnak hna nih a rak zulh peng hna.

Atu lio FIFA preisident Sepp Blatter cu 1998 in nihin tiang president a ttuan, i tu hnu kum thum (2011 ah thim tthan a si caah term khat a simi kum 5 chung ttuan lai.) a peh rih lai. Phaisa a ngeih tuk caah le leicung awh hawi a ngeih tuk caah a si. 2011 lio ah khan vote/thimfung a cawk tiah leicung media lianlian nih an rak chim. Cucaah vic-president zong a rian a rak chuah tak. Democracy a si lomi ralkap a si loah siangpahrang uknak bantuk a si, tiah an rak sawimi a si. World Cup tuahnak ram an i cuh i an sok cio hna lio ah Qatar (Arab lei) nih 2022 World Cup an tinmi cu ziknawh a lak caah a si, tiah an puh tthan.

Cu tluk i phaisa a ngei le nawl a ngeimi pa cu oct. 2013 ah khan, England a rak tlawng i Oxford ah bia a chim lio ah Ronaldo kong capo le nihchuak in a rak chim. Messi kong tu cu a tthatnak in a rak chim tikah FIFA president nih a chim ding bia a si lo, an rak ti. Ahlei in a rauh hlan ah suibawlung caah thimfung thlak a za cang ding a rak si caah leicung ah min sunglawi le a lianbik a simi suibawlung petu ding FIFA i an lubik nih a uar hleimi pa kong a chim i a dang a sawimi cu a poi ko. Portugal ram le Real Madrid a sawi a si, an rak ti i FIFA tiang ah Portugal nih ca an rak kuat. Real Madrid zong nih an kuat ve.

Suibawlung (Ballon d'Or)
Golden Ball tiin mi tambik nih theihmi a si. European Footballer of the Year tiin 1956 thawk khan 2009 tiang cu France Footballs (weekly magazine) nih a rak pekmi a si. Mekazin editor nih Europe i a hawile a simi journalist le editor pawl kha kum khat chung i bawlung chuih a thiambikmi a rak thimter hna i thimfung tambik a hmutu kha mah hi suibawlung (golden ball) cu an rak pek hna. Europe minung lawng an rak thim ve hna i tahchunnak ah Maradona cu Italy ah a rak chuih ve ko nain European a si lo caah an rak thim bal lo. Cu bantuk in leicung ah a thiambik a simi Pele zong Europe ah a rak chuih bal lo caah an pe bal lo.

1995 thawk cun European lawng si lo in leicung i bawlungchuih a thiambik thim cang hna usih tiah phung cu an rak thlen i an thlen kum bak ah European a si lomi AC Milan ah a rak chuihmi George Weah an rak pek. Cu lawng si lo in Europe chung i journalist 52 nih an rak thim tawnmi kha leicung ram kip i journalist 96 an i chap ve. 2009 kha a hnubik France Football nih suibawlung a pek a rak si, i 2010 thawk in cun FIFA Ballon d'Or tiah a min an thlen i FIFA a tlaih cang. FIFA chungtel ramkip i coach, captain le journalist 96 ifonh in thimnak an tuah cang. Nain FIFA nih a tlaihmi a si. Suibawlung a co tambik cu Netherlands le Germany an si i voithum a cotu pathum lawng an rak um ve. Cu hna cu Johan Cruyff, Michel Platini (atu lio UEFA president) le Marco van Basten an si i voili a cotu cu Messi lawng hi a si rih.

FIFA World Player of the Year

Ballon d'Or hi le FIFA World Player of the Year 1991 thawk in 2009 tiang an pekmi hi cawh lo ding a si. FIFA nih hin 1991 hnu lawng in leicung i bawlungchuih a thiambik timi pawl kha minthatnak laksawng pek a thawk hna i UEFA nih a tuah khawh a siloah, a tuah hnu ni tlawmpal ah an pek ve tawn hna.

FIFA World Player of the Year (FIFAWPY) nih cun Suibawlung a rak pe hna lo i naite i FIFA World's Team tiin minung 11 an thimmi hna an pekmi hna bantuk le Women's World Player of the Year i an pekmi bantuk lawng kha an rak pek hna. Cun pakhatnak in pathumnak tiang kha Sui, Ngun le Dar in tuahmi a rak pek hna i Ballon d'Or tu cu a thiambik pakhat lawng kha Suibawlung a pek. Ballon d'Or cotu hi FIFAWPY zong an pek chih caan an um, i tahchunnak ah 2006 ah khan Italy nih World Cup an tei i an hnukham Cannarova cu Ballon d'Or le FIFAWPY an pek. FIFAWPY cu Ronaldo (Brasil) le Zidane nih voithum veve an co manh, i Ronaldinho nih voihnih a co manh ve.

Ballon d'Or hi UEFA hmang in France Football magazine nih a pek mi kha FIFA Ballon d'Or tiin an pek cang i FIFAWPY timi cu a um ti lo. FIFAWPY nih hin suibawlung hrim a rak tuah bal lo caah nihin tiang ah Suibawlung a co tambik cu Messi a si i 4 a co. Cun pathum a cotu cu minung pathum khi an si ve.

Cristian Ronaldo
Zapi theihmi a si. Manchester United i a rak chuih lio 2007 ah suibawlung (FIFA nih a tlaih hlan) cu a rak co ve. Cu khawh in cun Messi nih kum li a von peh, i Messi maw Ronaldo timi hi bawlung uartu hna hmurka in ceihbik pakhat a si zungzal. A thiam bak, a tthawngbak i nungak zong nih an uar bakmi pa a si. 2013 i suibawlung co ding ah ai tlak taktak maw? Messi nih voili a peh in a lak cang caah Ronaldo pe ve cang usih ti awk a ttha fawn lai lo si kaw, tutan i suibawlung a co cu Messi a ttanh tukmi pawl hmanh an lung a tling ngaingai.

Amah he aa zuamcawhmi Messi kong von chim lo awk a ttha tawn lo. Maradona bantuk an chuak ti lai lo, an rak ti ko nain Messi hi a thiambak vemi amah bantuk cu an chuak ti lai lo, an ti ve mi a si ve. Nain 2013 chung kha amah ve lobang ai khawn le a dam lo a tam ngai. Tthatthi in a rak chuih kho lo. Cu pinah Barcelona FC cu anmah Spain-LaLiga lawng an tei.

Ronaldo cu a ngandam, aa cheih saling (kum 28) a si. A bawlung chuih a ttha i 2013 chung kha a lang khun. TV in  kan zohnak i kan hmuhmi lawng si lo in media hrim ah hmunhma a rak la deuh ving. 2013 chung a lamtluan zoh hmanh usih:

- Ram le Club caah 56games a chuih le 66goals a sut khawh. A chuihmi zatnak in a goalmi tamdeuh.
- Hat trick (puai khat ah goal thum - a tamdeuh sutmi) voi riat (8) a ngei.
- Amah nih a chanh/pekmi hna in a hawile nih goal 15 an goal.
- Goal chung ah voi 160 a chuih.
- Goal sut khawhnak ding ah lam a sermi 94 a si.

Ribery a buai ngaingai.
A cung i kum khat chung ah Ronaldo nih a tuahmi khi zoh tikah khuaruahhar ngai a si i suibawlung an pek cu a phu tuk hringhran ko. Asinain amah nakin ka zumhdeuhmi (a thiam ruang ah a si lo.) pakhat a simi cu Ribery hi a rak si. Amah Ribery zong aa zum taktak. Aruang cu a chuihnak club a simi Bayern nih Champions League tel in Germany i Club pawl zuamnak pahnih, a zate pathum an tei caah a si. Ribery cu alaikal a si nain 2013 chung ah 52games a chuih le 22goals a sut khawh. Voi 56 goal ah a chuih, i amah pekmi in a hawile nih 18goals senh khawh.

Champions League ah siseh Germany club pawl ah a langh tuk kum a si i a hlei in media pawl ah a langh tuk caah Ribery hi ka rak zumhbik. Ka hawile sin zong ah Ronaldo hi a thiamtuk ko nain Ribery nih a lak te lai, tiah ka rak chim len. Asinain Ribery cu suibawlung peknak puai an tuah lio ah a ngaihchia, a deuh tuk hringhran. Zarh tlawmpal a rauh hnu ah fakpi in FIFA sawinak le suibawlung sawinak bia a hon chim. Ziknawh a um ko, a ti ve cang i keimah nakin ahohmanh suibawlung co a tlakmi an um lo, a ti peng rih.

Asinain amah, Ribery hi kum 18 tling lomi nu a ihpi, a nuamhpi caah taza an cuai liomi a si. Leicung mino tampi le bawlung uartu hna zohchunh awk le upat awk in anmah bantuk minthang pawl nih cun an um awk a si nain atu bantuk nupi he um ko bu ah cun buainak a chuah lo ding a rak i zuam awk a si. A nupi Muslim a si i muslim ah a lut ve. Bayear nih pakhatnak an lak lio i beer an tawih sual hmanh ah a thin a rak hung. Cucaah amah hi cu suibawlung co awk ah ai tlak lem lo tiah ka ruah.

FIFA tel lo in journalist pawl lawng nih vote pe hna sehlaw,...
Cristian Ronaldo nih suibawlung ai lawipi thaizing ah bia a chuakmi cu "2013 i Suibawlung co ding ah journalist pawl nih thimfung an pekmi cu Frank Ribery a si." timi a si. Journalist 80 nih Ribery cu vote 5 cio an pek caah 2009 le cu hlan bantuk in journalist lawng nih thim si sehlaw amah nih a co ko lai, tiah goal.com nih a ttial.

Cu a si caah 2013 hi journalist lawng nih thim si rih seh law suibawlung ai lawipitu Ronaldo hi pahnihnak lawng a si lai. Journalist 48 lawng nih Ronaldo an thim i pathumnak a simi Messi cu 31 lawng nih an thim ve. Hika ahhin zeitindah suibawlung cotu an thim, timi zoh khawh a si. 2010 thawk cun ram-coach le captain cio nih vote thlak an ngah cang caah journalist lawng an si ti lo i Ronaldo sinah a kal diam.

2010, avoi khatnak bik ram-coach le captain tel in thimnak an tuah kum (FIFA tang a um hnu) ah khan journalist pawl nih Wesley Sneijder cu fiangpop in an rak thim ko nain World Cup in Argentina tuante ah a tlunpitu an captain Messi nih a rak co diam.

Ronaldo Suibawlung co he pehtlai in coach tampi an zai.
Ram kip in coach a ttuanmi hna nih thimfung thlaknak nawl an ngei i an rak thlak cio. Vote pe kho tu paoh nih an duhbikmi kha 5, a hang kha 3 le duhlobik kha 1, an pek hna. Vote an pekmi minung le an pek zah aa chinchiah kho lomi captain le coach cu an um theng lai lo dah.

Asinain Ronaldo nih suibawlung a co hnu ah vote petu hna le an pekmi minung cazin vialte cu official tein an von tar hna, kahin cazin cu zoh khawh a si. Mah cu cazin an tarmi a chuah bak in ahmasabik ah Kuwait coach Jorvan Vieira nih FIFA nih  ka thimfung thlakmi an thlen, tiah a chim colh. A thimmi hna cu Zalatan 5, Messi 3 le Ronaldo 1, an si. Nain FIFA nih Messi, Neymar le Ronaldo in an thlen piak tikah Neymar hrim hi vote ka pe lo, a ti hna.

Amah lawng a si lo, Albania, Malta le Fiji nih zong nih vote kan thlak ning in FIFA nih an tar lo caah mah hi cu kan vote ning cang lo ning in an tuahbi a si, an ti. Hi ram pawl cu min ngei lo, ram fa an si caah an holh kho lai lo tiin an tuah piakmi hna a si kho tiah comment a tam ngai. System a buaideuh hna a si kho men nain a poi tuk hnga.

A donghnak ah zeiti an va buai len ko zong ah Ronaldo cu an chut kho ti lai lo. Ronaldo nih a comi hi cophu hrimhrim a si. Ronaldo nih a co lo a si ahcun Zlatan lawng a taang cang tiah ka ruah. Cu a si lio ah a cung i kan chim cang bang in FIFA president Sepp Blatter nih Oxford University siangingakchia hmai bak ah Ronaldo tihramnak a chim tikah FIFA cu chalh le zumh lo a ton ning a rak fak tuk. Cu vialte i hmaimilhnak ding caah FIFA nih Ronaldo hi suibawlung an pekmi cu a si sual hnga maw? Suibawlung a va lak lio zong ah FIFA president le Ronaldo cu an i zoh huaha lo i an i chawn fawn lo. Vote pek kong lungtlin lonak pawl le a dangdang biathli ruangah lung cu a hring ko.

Kan theih lomi biathli a va tam tuk rih ko lai. Phaisa le nawlngeihnak a ngeitu pawl chung thil cu theih le phuan a har ko.

Ref: Wikipedia, Dailymail, FIFA, Goals, DB