Cu hna lak hmanh ah hodah a thiambik timi pakhatnak in 50nak tiang a thim rih hna. Mah hi 50 lak ah Premier League in minung pali cu top 10-list ah an i tel. Ferguson le Wenger belte hi thimnak ah an telh hna lo.
Pakhatnak cu Pep Guardiola (Manchester City) hi a si tiah FourFourTwo nih an thim. Manchester City cu Premier League a teipi colh hna pinah tuante in teitu an si a rak fiang. Goal tambik an sut, an luhtermi goal a tlawmte fawn. Cun an chuihmi puai pawl ah teinak tambik a hmu timi Statistic pawl zoh piak a si. Tu kum zong Pep a hruaitmi City cu an mak ko, Champions League belte a teipi ko hna hnga maw tiah a cung zumhnak a ngei theng lomi pawl nih cun an ruah. Cuti a si bu ah amah hi Barcelona, Bayern Munich le City a tuanbia zoh tikah a makbik si ko tiah hnatlaknak an ngei.
Pahnihnak cu Zinedine Zidane a si. Rian lo in a um lio a si, nain amah hi Football vawlei in a chuah chung lio, a duhmi Club a ngiat lio a si. Aa din in ttuan ti lo aa tim lo. Kum hnih le cheu chung Real Madrid a hruai manh i Champions League hrai pathum a cawipi khawh hna. La Liga voikhat a tei, i UEFAs Super cup voi hnih, Club-world cup pahnih le Supercopa de Espana voikhat a teipi hna. Cun a chuah tak hna.
- Keimah hi manager thiambik ka si lo, i ka chim lengmang ko lai, tiah Liverpool he Champions League final an chuih laite ah a rak chim.
Pathumnak Diego Simeone (Atlético Madrid) a si. Club lian ngai a si lem lomi Atletico Madrid cu 2011 in a tlaih hnu in Europe club lianlian lakah biatak tein zuamcawhtu a si ter khawh. Manager a sinak ah teitu a si lawng si loin player pawl he aa daw i an lung a lak khawh hna timi cu Antonie Griezmann siseh a dang min ngei player pawl kadang kal lo in tutiang a hman khawh hna.
Palinak cu Max Allegri (Juventus) a si. Kum li a peh in Serie A ah teinak a hmuhpi hna. Italy Cup a tei chih fawn. Champions League final zong an kai. Mi thar manfak in tampi a caw lo nain tutiang top ah a chiahpi hna. Tutan C. Ronaldo a cawkmi hi an Club ah manfakbik a si, i kum 22 chung Champions League tei an i zuammi tu kum an tei lai lo tiah hodah a chim kho?
Panganak cu Jurgen Klopp (Liverpool) a si. Liverpool cu Europe ah ttihmi CLub ah a ser khawh. Pep Guardiola hmanh nih Liverpool he iton lai ah a ttak-ttik a rak thlen. Liverpool FC lawng siloin Liverpool khua tiang a thlengtu tiah an ruahmi pa a si. Champions League final a kaipi hna, asinain nan theih cio bang a rauh hlan ah hrai zeimaw pakhat hnih tel cu a cawipi hna a herh lai.
Mahhi top 10 chung i a dang panga cu an si. Conte cu 13nak ah a um. Hika ahhin top 50 an zate in zoh khawh an si. Mourinho cu 25nak ah a um. Arsenal manager thar Unai Emery cu 31.nak a si.
25.nak Jose Mourinho (Manchester United).
Cc: FourFourTwo / Dagbladet
Comments
Post a Comment