Laitlang In A Rami Ciammam

Mawtaw mawngh ka cawn lio ahhin kan inn hmai ah lever vung tiah fak tuk in ka lamh sual i inn le mawtaw rawk lak pah ding a simi ka saya nih break tlaih manh. A hmaisen a thinhung tuk ti ka theih i, "zeitik dah a man kan pek lai, tu zanlei zong ka van rawn khawh ko," tiah a holh hlan in ka van ti colh. "Bill/ phaisa in ka kaa na phih colh ko e, na thluak cu" a ka ti.

A lawi hnu ah khua ka ruat i ka ning zak ngai, atu hi kum 8 a rau nain ka hmuh paoh ah khua ka ruat kai phuhrung.

Minung nunnak ah kan tuahmi (action) hi a biapi tukmi a si. Na tuahmi hi zei lungput indah na tuah, zei dirhmun in dah na tuah, na lungfim lio maw na rit lio tuahmi dah a si tibantuk tampi a um i cu vialte nih a theipar (consequence) an ngei dih.

Ka palh, ka tuah sual ti ding khi ka si. Asinain zeihmanh a tuah lo bantuk in bill/phaisa in kai silhnalh. A taktak ah cun lau lengmang in inn ka pah dengmi cu saya nih a ka khamh manh caah ka pahlo. Asinain ka pah zong pah lo zong ah "ka tuah sual, sorry a si" ka rak ti lomi kha a rak palh deuhmi, ka tuahmi (action) ruang ah a chuakmi theitlai a tongtu caah a ttha lomi a si. Chin chap ah bill in kai silhnalh cu mu "cu pa cu laitlang rami ciammam' a ka ti ko lai cuh.

Civilized a simi, a lungfim komi, mifim si komi hna nih kan action ruangah thil a chuakmi cung ah a herh le ngaihthiam hal khomi kan si a herh ti ka cawn. Kan palh lo tiah kan i ruah caan zong a tampi ko lai, nain kan tuahsernak ruangah buainak a chuakmi/ ding a lianh lo ding a control khotu na si, na duh le duh lo a si.

Nihin social media ah status pawl ka zoh tikah lung a ttha lo. Kan tuahmi cung tuanvo kan lak lo tal ahcun i silhnalh tuk ding a si lo, kan tuahmi kha chimrel nakin a thangdeuh. Action speaks louder than words an ti le na action kha biapi si ko.