A luancia kum 6 lio ah blog ka rak ser. Cucu google nih a ngeihmi blogger khi a rak si. Website timi rumro lung ah a rak caam caah blog tuai le tawlrel kha ka rak huam thai lo. Ka rak theihmi zong a rak tlawm tuk. Asinain Norway mi ka hawipa nih social media lei na lung a um ngai caah blog hin i thawk law a ttha tuk dakaw, tiah a rak ka forh caah ka rak thawkmi a si. Blogger hi a fawibik a si a rak ti, i atu ah biatak deuh in ka hman hnu in ka theih fawn.
Laimi cu blog a ngeimi kan rak tlawm tuk, atu zong a si ko. Blog luklak, a timi an tampi. An theih lo ruangah a si. Blog cu website bantuk in a phunphun ah hman khawh a si i mi tamdeuh nih cun anmah kong ttialnak, nitin an hmuh ton diary bantuk tialnak zong ah an hman. Hmanthlak, ca le a dangdang internet ah fimtawl khawhmi paoh ri ngei lo deng in chiah khawhnak a si. A man pek hau lomi blog a tampi i cu pawl blog hmang in phaisa an hmuhnak fawn caah blog cu an hmannak a si. Journalist tampi le politician tampi nih blog cu an hman.
Fashion le designer lei he ai pehtlaimi a huammi nu, nungak dawh pawl nih blog an i ser i fashion le design an caw-ngia. Mah ti cun thla khat ah dollar 1000 te hna an hmuh nak, i a cheu cu 2000 te hna an hmuh nak. Google Ads timi google nih a caw-ngia mi thil pawl kha an caw-ngia. Cu a si lo ahcun Ebay tibantuk le a dang internet market a tuahmi pawl le company pawl he hnatlaknak an ngei i caw-ngia in phaisa tampi an hmuhnak. Amah tu cu mirang holh in tuah a herh ve hnga, reltu tampi a herh caah. Cun Europe na um ahcun na umnak ram holh in na tuah a hau hnga. Laimi cu kan tlawm caah blog in phaisa hmuh cu a fawi lo.
Asinain blog cu zei caah a tthat i hawihnu pi ah ziah kan ngeih a herh ve ti ahcun, hmasabik ah theih lomi tampi theih i chapnak pakhat a si. Laica tamdeuh rel awk a um lai. Catial timi le carel timi tha a petu le a kan hrawtpitu a si lai. Blog cu zalong tein hmuhning, ruahnak le thil sining duhmi paoh kha ttialnak a si i freedom of expression timi cu blog hin an hman khun. Thil a si lo ning in ttial awk a si lo, aruang cu na blog kha nangmah na si cang. Cu tikah na ruahning, na dirpimi le nitin na tuahmi na ttialmi kha careltu nih rel huambik a si.
Blog hin mi tampi cattial an i thawk. Tahchunhnak ah mirang nih Freelance Writer an ti le press/media pawl ah rian an hmu lo, ca an ttial lo nain an blog ah thawngpang siseh nifatin a cangmi tuanbia pawl kha an ttial. Mah cu an ttialmi cu mekazin/tadinca siloah cauk chuahtu hna nih an rel i an uarmi paoh kha a man in an cawk tawn hna. Cu hnu ah rian zong an pek phah hna. Facebook i Note timi khi a hmangmi an tampi nain blog tluk in a nuam lo.
Cu bantuk freelance writer a siloah freelance journalist lakah minthang taktak a simi cu naite i USA/NSA nih a thli in mi a ngiatmi hna kong Snowden nih a pekmi pa Glenn Greenwald a si. Blogger pakhat si, i cachuah tampi ah ca a rak ttial nain a hnu cun amah lawng in a ttial. Cu hnu ah atu hi Guardian ah journalist a si beh. Phaisa tampi kan hmu lai lo, a hmuh zong kan hmu men lai lo. Asinain blog na tuah ve i zarh khat ah na ttialmi a reltu zeizah an si ti na hmuh le theih tikah cattial na huam deuh lai, i laica tein carel a duhtu an um timi ruahnak he blog na tuahmi nai chir hnga lo.
Blog na ngeih lo i tuah na duh ahcun, a fawibikmi cu atu i ka hmanmi blogger.com hi a si. Asinain blogger lawng hi ka hman ve caah von um rih law, blog caah a tthami a dang na zoh tthan hna lai. Blogger cu gmail na ngeih ahcun blogger.com ah kal in thawk colh a si ko. [HTML lei a thiammi nih cun an hmang duh theng lo, i HTML basic cawnnak ah a ttha ngaimi hi rak zoh chih te.]
Wordpress.com hi man pek lo in tuah khawh a si ve, i Laimi tlawmte nih an hman ve. Blogger.com cu a fawite ko nain Wordpress hi vawleicung ah an hmanbikmi a si. Wordpress nih blog tuahnak phun 2 a ngeih i wordpress.com le wordpress.org in an um. An i dannak cu Wordpress.com cu hosting hi wordpress server chung ah a um i wordpress.org cu hosting hi external server ah ai bunh. Zeisi hmanh ah phaisa hmuhnak le business tuahnak ah na herh lo ahcun wordpress.com hi hman ah a tthabik ko. Free a si hlei ah a fawite an ti, lai nungak pakhat zong nih a hman.
Tumblr.com zong hi mi tampi nih an hman. Blogger tluk deng in hmanmi a si. Tumblr a hmangmi pawl nih cun blogger nakin a fawi deuh an ti ve. A chung thilri le ttamhmoih ca belte ah blogger le wordpress tluk a si lo, cucaah Wordpress.com a siloah Blogger.com hi hman tthadeuh ngai an si lai.
Blog tuah duh ahcun a tam tuk ko lai, tuah khawhnak. Tahchunnak ah New York Times/ BBC le CNN ah khin blog an ngei. Mah an blog khi hman khawh an si, i an website ah link tuah chih a si. Malala hna kha BBC i blog an tialter hnu in mipi nih theihmi a si. Cu bantuk tthiam in business/marketing website pawl ah blog tuah in nan thil kan caw-ngia piak hna lai tiah hnatlaknak ngeih ahcun tuah a si fawn. Norway ah cun blogg.no hi an hman bik i minthang blogger pawl nih cun thlakhat ah Kr. 20000-30000 te hna an hmuhnak ti a si.
Mirang holh in Laimi kan kong le kan ram kong tampi blog tuah kan herh, kawlca zong in kan herh fawn ko. Cu ti a ttial kho ding dirhmun mirang holh le ca a thiammi USA, Australia le Europe lawng si lo in Asia zong nan tampi, i manh caah cattial hi ttan la ko hna usih. Holh dang tluk in kan holh tein ca tampi ttial kan i thawk hi a biapi tuk fawn. Cucaah blog tuah a huammi cu tha kan pek hna, zarh khat ah pakhat hnih tal cu ttial le tar chap peng tu cu a herh pah ve.
Theihmi tlawmte ka von ttialmi a si i tlawmte a tthathnem si cun kai lawm ve. Blog nuam ulaw. Happy weekend!!!!
Comments
Post a Comment