Laimi hi "Violence" timi a kutthlak rang mi le a thinlung chia ngaimi kan si.
Voikhat cu hawi he Suu Kyi kong kan caih i sawiseltu an um, a ttanh bak mi an um ve. Caan a saudeuh i a thinhung mi an um, mah tikah a chimrel khodeuh nih a duhmi paoh biafak tete hmang in a chimrel khawh, i pakhat cu a kam a phau hlan ah a kut a zuang. I sik le i hmaichiat in kan ttian. Kawlram in a rami ciammam!
Laimi hi kan thin a chia, a tawi ngaingai. Zeiruang ahdah i velh, i vuak le kutsip thainek i kan ngeih khun hnga? Zuu hi an ding cio hna, miphun dang vialte zong, asinain buainak a tlawmte.
Laimi social media kan hmanmi le kan website pawl hin siseh kan catialning hin violence, thintawi, mi uk le control a duhmi kan si a lang bik. Zeidang kan comment pawl cu um rihseh, ca kan ttial tikah catialtu nih a ruahnak, a zumhmi, a duhmi, a uarmi le a tuahmi kha careltu nih rel hrimhrim seh, ei hrimhrim seh, i nunpi seh, uar ve seh tiin ca kan ttial, kan thlah. Mah bantuk ca pawl cu a reltu kan tam tuk caah ca a thlahtu he a reltu he kan i tlukceo.
Mah vialte hi Kawlram in a rami ciammam kan i hngalhnak an si ve. Zeiruang ahdah mah ti cun a si?
Kan sawisel tukmi Kawlram education pi kha Kawlram in kan chuah tak hnu zong ah kan i kalpi kan i phurh caah a si. America, Europe, Aussie le Asia ram pawl zong ah kan i nunpi rih hna caah a si. Cu kan i nunpi rih bu cun Kawlram fimcawnnak kha cu ee, cu ee kha ee, kan ti.
Kawlram fimcawnnak cu cozah le cathimtu hna nih an tining tein cawn, phit le awn a si. An chimmi, an ttialmi an kan cawnpiakmi kha nangmah nih zeitindah na ruah ve timi a um lo, na sawisel kho lo, na ruahnak na chim kho lo. Anmah uktu hna nih an ruahmi pin a dang kan cawn lo caah nihin Lai media le social media ah kan i nunpi: Hi ca hi rel hrimhrim, dr./rev. maw anih nih a chimmi hi a dik bak rel hrim, mah hi cu a ttha tuk, thawngpang chia a si, thawng ttha a si tibantuk hman a si. Cucu Kawlram education nakin a chiadeuh.
Thawngpang cu a chia le a ttha ti a um lo, a reltu le cu thawngpang cung ah aa hngat i a ttialtu nih a chia/tha ti cu careltu uk le control a si. Kawlram fimcawnnak bantuk lawngte kan hmang peng rih.
Violence kan uar tuk rih. Tha kan pe tuk rih timi kan social media hman ning ah a lang. A ruang cu Kawlram fimcawnnak ruang tthiam ah a si. Kawlram ah "Art timi zungthiamnak (ringawn, lam-khui, hlasak, zukthai le catial) le dawhnak" timi pawl cawnmi a tlawm tuk, a um lo tluk a si. Uktu nih anmah caah a ttha an timi lawng an kan cawnter, a cawngtu caah a ttha timi cawnter a si lo.
Art phun a simi Novel le tuanbia, zuk, ring-awn, lam le khui, hlasak te hna kan rel lo, kan tuah lo, kan thiam lo, kan cawn lo tikah minung hi a thinlung a nem kho lo, dawhnak kong kan cawn lo, kan rel lo kan hmuh a tlawm tuk tikah thinlung ah dawhnak le dawtnak a um kho lo. Carel kan tlawm tuk tikah mi kong, miphun dang kong kan hngal lo i zawnruahnak le dawtnak kan thinlung ah a tlawm tuk. Art timi cattialthiam, halsak, lamkhui, ringawn le zuksuai siseh dawh a uarmi pawl hi violence he an i ral ti a si.
Cucaah nihin Laimi hi Social Media hrawng i kan i zit peng, tuanbia le cauk dang tampi kan rel lo, hla tampi kan ngaih lo, lam le khui kan huam lo, dawhnak zei rel lo in kan um rih ahcun tu kanmah chan nih tampi kan miphun a hrawh lai. Hriamnam tlaih theng a herh lo, miphun caah thil lian nganpi na tuah khawh lo zong ah na tuah khawhmi thil ttha hi cu nangmah in thawk a herh tiah na ruat ve lo maw?
Laimi hi Action, Horror, Crime le violence aa telmi kan zoh tuk, kan uar tukmi zong hi kan society caah a ttha lo ngaimi a si. Romance, Love Story, family movie le Bio-film pawl zong Violence tampi action pawl kan zoh zat in zoh ve a herh ngai. Mah cu a si lo ahcun nitin kan nunnak ah kanmah tein kan i hngalh ko lai, zeibantuk thinlung dah kan put, kan thin zeicandah a si, kan kut a zaang maw, mi cung ah zawnruahnak, theihthiamnak, intuarnak kan ngei maw?
A tawinak rumro in ka ttial, i Kawlram in a rami ciammam, ka catial cu a bualtan bak hoi ko.
Zeitindah nan ruah ve, timi belte chim cio le comment in ruahnak i cheuh cio ka duh ko.
 |
| Lairam In A Rami Ciammam |
Comments
Post a Comment