Pakistan i Khrihfa Asia Bibi timi nutung nu cu Islam biaknak na serhsat tiah tazacawi a rak si i thah ding in an rak hal. Caan saupi hnu ah a sihni pa nih an ram i a sangbik baicaihnak zung in an khamh khawh caah October thawk ah luatnak an pek. Mah cu thawngpang an theih tikah Pakistan muslim pawl cu an thinhung tuk i an khua lam khat in an chuak i Bibi thah ding le tlaih tthan ding an au. A herh ahcun lam ah siseh a inn ah thah ding an duh.
Islamist phu pawl nih an khuapi pawl ah lam zawh in Bibi luatnak a petu Supreme Court biacaih bawi thah kan duh tiah an au. Cuti an buai tuk caah atu hi Bibi cu ram dang ah tlawng kho lo, zaam kho lo ding in ram leng chuahnak nawl an pe ngam lo.
Bibi kong biacaih caan hi a sau ngaingai, i cu chung ah cun Bibi a runvengtu palek pahnih cu a thli in an rak thah cang hna. Bibi hi fa panga i an nu a si, nain 2010 hrawng ah khan a fale cu an rak thi. A ruang ttha tein an ttial lo nain an thah hna lai tiah ruah a si. Ram dang ah zam le i tthialnak nawl an pek lo a si ahcun a tuan le a rau lawng a si lai, a nunnak caah thinphang a si tiah ruah a si.
Amah lawng si lo, a sihni pa Saiful Mulook cu leng chuak ngam lo in zarh tam nawn aa thup. A nunnak caah a thinphang peng. Cu a si caah ram leng ah i dor chung ding in an chungte in an ram an chuah tak tiah Reuters nih a ttial. "Hawikom le theih hngalh ka hal cio hna i ram kan chuah tak ding an kan duhpiak cio", tiah Saiful nih a chim i "cozah le palek/ralkap nih kan in runven ko lai timi bia an ka pek a si ahcun ka kir tthan lai i ka rian felte in ka ttuan tthan lai", tiah a chim chih.
Anih cu a him cang. Asinain Asia Bibi caah khuaruah tam a si. Zeiruang ahdah taza an cawi, i zeicandah a rauh timi tawite in ka hun tial lai.
2018 october dih zarh ah Pakistan i biacaih zung sangbik (Supreme Court) nih Asia Bibi cu taza cawitu hna sual puhnak hi a si lomi a si, i zeibantuk tehte hmanh a um lo tiah kum kua deng thongthlak le tazacawinak in luatnak an pek.
2009 june ah Aasiya Noreen timi Asia Bibi cu cu thei hmin hrawn le ttuan a zat lio i a rianttuan tti hawi Musarat he bia an i alnak ah fak ngaiin i siknak a va chuak i a rianttuan hawi nih cun Islam biaknak na serhsat tiah zapi thei in a puh. A tawinak in: Noreen nih a rianttuan tti hawi dinti a din i a hawinu Muslim cu a thinhung (cu hlan a thinhun cianak um). Muslim nih an dinmi ti hi Muslim a si lomi nih an din ahcun Islam serhsat a si, a ti i an i sii colh. Khrihfa a si caah mi thiang lo a si, muslim mit ah.
Biacaih zung ah Noreen nih tihin a chim: Musarat nih tihin a ka ti, "A nangmah Kharihfa fihnung! Kan dinti cu na va din ve, cun mah hi kan Prophet na serhsat bia a si. Uico hrut nu, na Jesus nih hringtu pa ngaingai hmanh a ngei lo, lakfa a si kha na hngal lo maw?" Mah cu Khrihfa luhnak kong a chuak i Noreen nih "Ka biaknak le ka caah vailam i a thimi Jesus Khrihf hi ka zumh. Phophet Mohammed nih zeibantuk minung dah a khamh bal hna? Keimah hi Muslim ah kaa thlen ding nakin zeiruang ahdah nangmah tu Khrihfa ah naa thlen lo?" a ti. Mah khan cun nihin tiang Muslim pawl nih an bawh cang.
Pakistan cu muslim ram a si i an tthawn caah tazacawi in zung ah voi tampi a phan. An tlaih i thong an thlak. Islam serhsatnak ka tuah hrimhrim lo tiah a chim peng. 2010 november ah khan a umnak khua hrawng biacaih zung nih hri thlai in thah ding bia a caih piak. Sihmanhsehlaw, Lahore High Court nih nawl an pe hna lo, a ruang cu mah thawngpang cu Vawlei kil deng tiang a phan i International bu pawl nih an chimrel caah a si. Khrihfa a simi Noreen (Bibi) luatnak pek ding in ram kip Khrihfa pawl nih minthut 400000, cun Pope Benedict XVI le a hnu ah Pope Francis zong nih an chimrel. A cung hmanthlak khi Asia Bibi le Pop ton lio.
Pakistan innpa ram pawl le Muslim pawl nih cun a cung ah zangfahnak ngei lo in a rannak in rak that u tiah an rak au hnawh ve. Pakistan i miphun fa hruaitu le minister a simi Shahbaz Bhatti le Punjab i an Governor Salmaan Taseer cu Noreen luatnak caah rian an ttuan caah Islam serhsattu a bawmtu tiah a thli in an nawn hna. Noreen sahlawh rualchan vialte tlirhkhonh an tong, i Noreen hi thonginn in a chuah a si ahcun kan thah lai an ti. Muslim lei hruaitu Maulana Yousaf Qureshi nih Noreen a that khomi paoh phaisa tingnga kan pek hna lai tiah bia a chuah.
Cuti cun ramkip Khrihfa phu International Christian Concern, Open Doors, le Aid to the Church in Need siseh covo lei bu pawl nih an ttanpi, Pakistan cozah an chawnh biak lengmang caah that lo tein thonginn ah a um. Thah tlak sualnak a tuah maw, cun 2009 june i thei-hmung ttawh lio a ttuan hawi nih a puhmi hi hodah a hmutu le a theihpitu an si timi an hlat, an kawl lengmang i an hmuh ti lo caah Bibi timi Noreen cu an ram biacaihzung sangbik nih 2018 october 31. luatnak a pek. Khrihfa pawl an i lawm tuk, amah ko aa lawm lai.
Sihmanhsehlaw, Supreme Court nih luatnak an pek ni hnihnak November 2. ah Pakistan cozah cu Muslim an tthawn tuknak party Tehreek-e-Labbaik political party he an i tong i an ram a daih khawh nakding caah Asia Bibi (Noreen) nih Pakistan hi chuah tak hlah seh ti hnatlaknak min an thu diam. Mah hi party nih hin Asia Bibi thah an duhbik, i luatnak an pek caah Supreme Court biacaih bawi tiang kan thah lai an timi a si i lam zawh in an buai tuk caah cozah nih an duhnak an zulh piak hna. Pakistan prime minister Khan nih cun mah ti a buaimi pawl hi Islam caah aa pumpe le aa zuam ngaimi an si hlei lo, Islam caah ral tu an si tiah bia in cun a chim.
A sihni Saiful cu an chungte in an zam kho. Asinain Bibi cu a thaizing kong ah Pathian sin ah a pekchanh dah ti lo zeibantuk ruahchannak hmanh a ngei kho ti lo. Atu hi khawika a um timi media le zapi nih theih a si lo.
Pakistan ahhin Blasphemy timi biaknak serhsat, a hleiin Muslim pawl nih phung an ngeihmi a si, i kan biaknak na serhsat tiah lampi ah thah khawh an si, tazacawi khawh an si. Abik in mi tlawmdeuh a simi biaknak fadeuh pawl kha teinak namnehnak ah an hman hna. Pumpak i sik tthiat zong ah Muslim nih cun ka bianak na serhsat tiah biaknak dang kha a teinak ti a si. 1987 in 2014 tiang ah Blasphemy timi biaknak serhsat puhmi 1300 an um.
Noreen timi Bibi hi Pakistan ah a hmasabik nu Blaphemy an puhmi le thihnak tiang in biacaihmi a si. An thah a si ahcun Pakistan tuanbia ah pakhatnak a si lai.
Ram leng a chuah khawh a si ahcun Norway nih Asylum pek ding a si tiah Norway MP pawl nih an chim i cu MP hna lakah Pakistan mipeem chung in MP a si ve mi Abid Raja zong nih Asia Bibi hi Pakistan in a chuah khawh ahcu Norway nih runven le lak ding a si tiah a chim.
Note: Hi blog cabia hna hi Copy-Past tuah lo in a ttha tiah nan ruah ahcun Share le LIKE khawh a si.
 |
Islamists Nih An Tlaihhremmi Myanmar |
Cc: Voice of the Martyrs, NRK/Dagen, Aleteia,
Comments
Post a Comment