Kum 60 leng ral ruang ah a vaimi Karen Refugee pawl cu thaizing kong a fiang ngai ko nain chuahkehnak ah an kir cuahmah ti a si. VOA ah zoh. Mah nih hin Malaysia/India Chin ralzam caah ruahchannak a pe maw pe lo?2018 August ah UNHCR nih Kawlram ah ral a thawhnak/ a buainak hmun an um rih ko nain Chinram cu cozah tang ah ralzam an him ko, a dai cang ko tiah an rak ti. India zong ah Chin ralzam an um nain Malaysia Chin ralzam hi biapi in an char i UNHCR runvennak an hmu ti lai lo, tiah thawng an thanh. Cu tlawmpal cun Malay um Chinmi UN Card a ngeimi zong palek nih tlaih le him lo ngai in an um caah Chin Human Rights Org. siseh Chin Community International nih biatak tein UN cu an nor tthan.
CHRO nih Geneva i UN zung ah kal in Chinmi kan kong le Malaysia-India um Chin Refugee kong an chimrel. Chin Community Internationl siseh BACI hruainak zong in NY i UN General Assymbly lio zong ah kal in chimrelnak an ngei. A hnubik ah Yangoon i UNHCR zung cu Kawlram Chinmi bu rianttuantu hna nih an ton tthan hna. A tang ah khin Yangon UNHCR an tonnak aa tial.
Asinain ruahchannak a um maw? A tang ah ca aa peh:
Chinmi hi Malay ah ralzam min keng in thongsawmthum leng kan um lai tiah an ruah. Delhi le India i ummi zong a thong tam ngai cu an si ve. Mah hna pawl hi atu Myanmar democracy lam kan timi thlennak nih a hrenmi hna an si ti khawh a si. An case zong hmual a ngei ti hna lo. Zeica tiah CNF nih daihnak an ser cang. A dang pakhat cu Kawlram pi huap in ramkipfonh bu hna nih bawmhnak siseh, a hramsih rianttuannak pawl an luhpi i pehtlaihnak ttha tein an tuah cang caah Myanmar cu a him ko tiah zakhat ah zakhat an pom khawh lo hmanh ah thlennak a um cuahmah ti an zumhmi hi a si.
Rohingya kong ah Kawlram a hun buai tuk i nitlak lei ram pawl nih heh tiah NLD le Suu Kyi an phomh, chawleh an phih pah cuahmah. Kawlram a buai tthanmi a hun lo ngai, a him ti lomi a hun lo ngai. Refugee caah ruahchannak pakhat bantuk hna a hun lo. Rohingya nih Kawlram thanchonak a dawnh timi capar na rel cang maw?
Asinain hi Rohingya buainak ruangah Suu Kyi le NLD cozah hi bawmhnak phih le Kawlram a hramsih rianttuannak pawl kan phih a si ahcun hi nakin an buai lai i hnu ah an kir lai tiah Japan ambassador nih october ah khan a rak chim. Mah nih a langhtermi cu Kawlram buai tthan ding le ralthawh tthan ding kha a si kho ti lo, Rohingya kong ah Suu Kyi mawhphurhter dih ding a si lo timi a si.
Mah cu zeidah aa pehtlai tiah million 60 leng an umnak Myanmar khi ramkipfonh bu pawl an mit a thi, company pawl an mit a thi. Cucaah ram a buai tthan lo ding heh tiah an i zuam hna. UN zong nih Europe le America pawl ralzam an duh bak ti lomi ruangah hin a si khawh chung in remdaihnak a um ding kha an duhmi a si. Hi lio ah Kawlram a chia tuk ko tiin refugee runveng seh, ram kip ah kuat piak seh, ram kip nih la hna sehlaw zeidah a cang hnga timi an ruah lo awk ttha lo.
A cungbik i video i Karen pawl kum 60 leng raltuknak ruang ah a vaimi hna an khua ram an hun kirnak video tawite a si. Hi hna pawl hi Vawleipi nih a theihpi mi ralzam, harnak a tong timi an si hna i Chinmi tluk in refugee in ramdang an phan lo. An ram ah kir an i thim cio ko hna. Zeibantuk harnak an ton lai timi a ralaimi caan ah ruah khawh ngai a si nain an ramte ah a kirmi an si hna.
Chinmi ralzam caah Chro, CCI le Yangon Chinmi bu pawl nih heh tiah UNHCR lungthlen an i zuammi hi ruahchannak a um maw? Cun Refugee in mi ram peem cuahmah le i timh peng rih hi ta Chin party le miphun nih tha kan pe rih ko maw? Zeibantuk timhtuahnak le miphun le ram sernak thinlung le program dah kan ngeih cio?
Zeitindah nan ruah?
Foto: The Star. com
Comments
Post a Comment