California Meikang Kong Ah Trump Bia An Lehmi

Hollywood minthang Gerard Butler inn ciam dih in a kangh. Gerard cu "300" le "Law Abiding Citizen" in a min langmi a si. Malibu i Hollywood minthang pawl inn tampi a kang.

Tu zarh i California a kangh hi cu hlan nakin ttih a nung, a kangh faak ko tiah mei a phalhtu nih an chim. Ciam lak in a kanghmi inn le thingram cu a tam tuk hringhran i atu tiang ah minung 25 an thi cang. A thi maw an nung ti hngalh lomi 100 an um rih.

Biatak te a kanghnak cu California state i Paradise timi khuapi hi a si, i a thimi lak i 23 cu hi khua ah hmuhmi an si.

Cawn nithum zing hrawng khan mirum le hollywood minthang tambik an umnak Malibu ram a kang i mi ruak pahnih an char cang. Mirum inn thatha 170 leng ciam lakin a kangh. An zate in hmun dang kalding an fial dih hna.

Donald Trump cung ah California pawl an thinhung ngaingai.

Tutan mah ti meikang a chuahnak a ruang hi an hngal rih lo, asinain president Trump cu zalong tein chimrelnak a ngeihmi a hman i fak ngaiin meithat pawl le thinghram zohkhenhtu pawl fak ngaiin a sawisel hna:

– Mah vialte mi an thih le hi tluk thilri inn le lo a kangh dihmi hi thingram zohkhentu daithlan a si tiah Twitter ah a chim. Cun, dollar million tampi thingram zohkhennak ah kum tin kan in pek hna, hi vialte an thihmi hi thinram le tupi nan zohkhenh lo caah a si. Arannak in remh u, mah lo cun federal phaisa kan in bawm ti hna lai lo, a ti hna.

Kangut a tongmi hna le thingram zohkhenhtu an thin a khenh.

– President nih California bawm tim lo in a do tu in a doh. Bawmhnak pe lo ding in a kan hrocer tiah a chim. Cun president a chimmi hi a dik lomi a si, mah tluk a harmi caan ah nu he pa he maialh hmai ah dir in rian kan ttuan ee, tiah Brian Rice timi California Professional Firefighters captain nih a chim.

– President nih a theih a herhmi cu California thingram zohkhennak hi Federal nih 60% deng an uk, cun a tangmi 1/3 hi private nih an ukmi a si. A luancia kum pawl ah khan federal cozah nih thingram zohkhenhnak phaisa le a herhmi vialte an tthumh, an kan pe ti lo, tiah a chim.

California hi a kangh tam ko cang. Tutan hi 1991 in atu tiang ah mi thi an tambik kum a si, nain a fakbik 15 lak ah pakhat lawng a si ti a si.

US president Trump cu Europe a tlawng i a kir in zeidah a tuah hnga?