Zeiruang Ahdah State Counselor Pi Suu Kyi Chinram A Tlawn?

October 26. kha State Counselor pi Suu Kyi cu Kanpalat a vung tlawng i hlunghlai taktak in an ton. CM Lian Luai le Pu Zo Bawi nih an zulh. Mi zapi he tonnak a rak ngei kho lo nain Lam le khui, kan phunglam hna he an rak don lawng si loin kan fingtlang hna kai in an pathian a va bia, cun Park pawl siseh khua chung dawr tiang a va leng timi a hmanthlak pawl in hmuh khawh a si.

Chinram hi hnihthum a tlawng cang nain Kanpalet hi tutan lawng a tlawn a si. State Counselor facebook page ah Kanpalet i a tuahmi tete an ttialmi rel tikah zeihuaha cu a um lo. Khonumtung tlang i an pathian va biak te hna, Asean Heritage Park va len ta te hna khi an si. Hi Khonumtung a lennak hi biapi ngai pakhat ah a cang.

Khonumtung tlang cu thingram a hual ngaimi le tlang sang ngai a si caah Vawlei ro pakhat bantuk in The world heritage convention nih a chiah caah ttha tein zohkhenh le kilven a herh zia zong Pi Suu Kyi nih a chim tiah BBC nih a ttial. Asinain hi kong ah zeibantuk hlawknak le tinco ding ram ngeitu Chinmi hna nih kan ngeih timi fiang in a um lo. Chin State cozah siseh Chin Party hna nih kan khuaram, kan thinghram, thli le ti kong ah ram ngeitu hna nih kan tem le kan co ding um lo in zeitindah mi ram le vawleicung bu pawl nih nawl an ngeih? Zeibantuk lungtlinnak dah Chin State cozah le Nay Pyi Taw nih a ngeih timi hi mipi nih kan theih a herh ngaimi a si.

November i caan karlak thimnak cu a nai chin lengmang. Kanpalet hi Kawlram pumpi tonak a lawngmi caan karlak thimnak hmun hleithum (13) chung ah pakhat aa telmi a si. Cucaah cozah a tlai liomi party hruaitu pakhat sinak in i thim hlan ah cun Kanpalet tlawn lo ding a si tiah ruahnak a chuah caah khuami hna he zong biaruah le tonpumhnak ngei lo in a zanlei ah an rak kir colh hi a si.

Sihmanhsehlaw, NLD caah hlawknak a um. Khuami hna nih State Counselor le cozah sin i an duhmi vialte an chim kho lo nain an duhmi an ttialnak cauk cu Nay Pyi Taw ah pi Suu Kyi nih aa phurh.

A ralaimi november caan karlak thimnak ah Chin Party aa fonh tharmi CNDP aa cuh ding a si. Chinmi caah a biapi tukmi hmun a si cang. USDP le NLD nih maw an co lai Chin party nih ah an co lai ti cu Chinmi cung ah aa hngat. Asinain thimnak tuah hlan ah Pi Suu Kyi nih Kanpalet a tlawnmi cu mi lemsawinak a si lo a ti ko nain an party caah hlawknak a um ko.

Cucu CPP party hruaitu (Atu cu CNDP ah aa fonh) Pu No Than Kap nih, "Tutan i pi Suu Kyi a khualtlawnnak hi cozah lutlai hna khualtlawnnak a si i mi lemsawinak a si lo tiah an ti ko nain vote kawl le mi lemsawi ah a ratmi a si ko tiah kan ruah lo awk a ttha lo", tiah BBC ah a chim.

State Counselor pi Suu Kyi nih Chinram a tlawnmi cu lunglawmh tuk ding a si. Zei bantuk bawi an si zong ah Chinram an tlawn ahhin thil ttha lei peng a si ko, chan thar ah cun. Cucaah president zong a rauh hlan ah a kan tlawn ahcun i lawmh ngai ding a si, nain Vice president a rinhdeuh cang rua, Chinram cu phak manh dawh a si ti lo.

Kanpalet nan hawile sinah Chin party vote thlak ding caihpi le thapek ttang cio hna u sih.

Foto: Myanmar State Counselor facebook page/BBC