Tuni i a bik in an caihmi cu "Ramkomh bu kawlram in chuah lo ding", tiah Gen. Min Aung Hlaing a halmi le "Tatmadaw" pakhat lawng a um lai timi kong hi an si.
A ni khatnak ni ah Gen. Min Aung Hlaing cu ni cheu lawng aa tel caah tlang hriamtlai daihnak a tuahmi phu pawl an thin hung ngai tiah theih a si. Pi Suu Kyi cu a dongh tiang a rak hmanpi hna.
Hriamtlai phu hna le Ralkap kar remdaihnak kong an iton le an caih a voi a hung tam cang i ram mipi hna i ruahchannak a zor chin lengmang mi a hung lo. Kan lung a sau kho tuk ti hna lo, keimah tel in. Hi nakin a tluang i a tthadeuhmi lam a um tiin a phunphun chuah a si cang.
Chin miphun dirhmun in CNF party hi chimrel kho le min a thumi an si caah zeitindah atu dirhmun hi an ruah ve hnga?
Dr. Lian Hmung Sakhong nih cun july ah khan "Ramkomh bu hin chuah kan i tim lo, i chunugtel tlangmi hna nih zeitikhmanh ah chuahnak kan hal ballo" tiah a rak chim. Cun hi NCA minthutmi hi kan miphun caah lam ttha a si ko tiah a chim.
Cuti a si ahcun "chuahlo ding" timi ralkap nih an halmi hi Tlangmi hna caah zeitluk indah a poi? Politics ah cun an duhmi pek ve, kan duhmi an kan pek ve khawh nakding a lam a um ko a si ahcun a zapi tein hui lo in duhsah tuin hmailei nor tthan khawh a si ko hnga. Abiana ah "Tatmadaw pakhat lawng a um lai", asinain hi Tatmadaw tel hi cu miphun pakhat lawng nih tlaih le hruai lo in Tlangmi hna hmunhma pek ding phung le zulhding hi ralkap nih lungtlin pi ve hna seh.
CNF party aiawh in Salai Kiip Kho Lian nih "Ralkap phunkhat lawng a um ding hi kan cohlan khawh ko. Zei ram hmanh pahnih, pathum a um lo. Asinain ram pakhat miphun tampi umnak ah Kawl lawng nih ralkap kong ah tthi thruai hi a si khawh lo kan hngalh caah Ralkap kong hi kan caih a herhnak a si." tiah October 15. BBC ah a chim.
Mah cu Mon-party hruaitu Naing Han Tar zong nih "Minung pakhat kut lawng ah ralkap chiah timi cu a si kho lo, kan cohlang lo", tiah a chim ve.
Mah hi "chuah tak lo ding," timi le "Tatmadaw pakhat lawng", timi kong ahhin a pekchanh khawh le i cohlan pi khawh lo ahcun zeidang a lam kawl ding a um ti lai lo. Mahhi a muru pi cu a si ko. Mah hi an lungtlin khawh a si ahcun phunghram zeimawzat an thlenremh khawh lai.
Sihmanhsehlaw, zakhat ah zakhat in an ngen veve an i kianh veve lo a si ahcun zeitik hmanh ah remdaihnak an ser kho lai lo.
 |
| Ramkomh Bu In Chuah le Chuah Lo Kong Dr. Ngun Cung Lian Hmuhning |
Comments
Post a Comment