Switzerland Nih Tatmadaw Dantatnak A Tuah Kong He Pehtlai In

Tatmadaw le hriamtlai phu hna kahdaihnak le a hmunmi remdaihnak an ser cuahmah lio a si nain ramkomh bu Myanmar ah raltuk le huatnak meici a chuak lengmang ko rih. Rohinghya buainak lawng si lo in Tatmadaw nih tlangmi hna cung le a ram chung i covo buarnak hna ruang ah Switzerland nih dantatnak a tuah ve. Switzerland nih mah bantuk a tuah hi aa bengbai ngaimi a si.

Tatmadaw hi hruaitu hna hi abik in dan a tatmi hna a si i cucu European Union nih naite in dantatnak a tuahmi kha a zulh vemi a si. EU rianngei pawl tu thla Myanmar an phan lai i ramchung an rianttuannak pawl an ngol a si ahcun NLD cozah le rammi caah a poi ngai kho.

Switzerland nih dantatnak le phihnak a tuahmi lakah hin ralkap nih mipi hremnak le covo khamnak ah a biapi i hmanhmi thilri pawl tatmadaw nih an cawk khawh lo ding le an sinah zuar khawh lo ding hi a biapi in phihmi a si. Phone siseh online in maw a rammi hna an thil tuahmi ngiathlai khawhnak le thawng ngaih khawhnak thilri le Software pawl Tatmadaw sinah zuar lo ding a si.

Switzerland cozah nih Ralbawi pasarih hna cu an ram chung luhnak nawl an pek hna lo pinah Switzerland bank i an chiahmi thilri pawl zong 'Controll' an tuah piak lio hna a si tiah Finance minister (SECO) nih thawngthanhnak a tuah. Switzerland cu Vawleicung bank tthabik a si tiah theihmi a si i ram kip in phaisa le thil mansung an chiahnak a si.

Zeitluk indah Tatmadaw nihin tiang covo an buar rih tiah cun october 1. ah khan Shan ram i lothlo pakhat cu an kah. I pheh lo in khuami pakhat cu "kan kah sualmi pa hi hosi kan thei lo, khuami va chim hna law ho a si theihternak tuah hna seh", an rak ti i a thimi pa a nu an vung auh.

Ralkap nihhin a rammi kah timi cu a phung hrim a si lo. Cu hlan cu mipi thimmi cozah kan ngeih hlan, ral chan a si. Atu tiang hi Ralkap nih sualnak an tuah peng rih. Cu sualnak an tuahmi cu a thup in a si ti lo, chun laipi ah tuahmi a si cang.

An kahmi pa a nu cu 'report' na tuah kho lo, na tuah ahcun nan chungkhar caah harnak a chuah pinah na fapa cu a nung tthan hlei ti lai lo, tiah ralkap nih ralrinnak an pek chin tiah reporter pakhat nih Shan Human Rights phu sinah a chimmi Frontier nih a ttial chin.

Kawlram ralkap cung ah phihnak tuah lo in a bawm lengmang rihmi Democracy ram pawl zong an um pah rih. Abiana ah Australia nih kan hnu thla tiang a bawmh hna. USA zong nih phihnak fak ngaiin a tuahmmi a um lo.

Israel nih ni kum le tu kum thawk tiang i Tatmadaw sinah a zuarmi Tank le meithal pinah tilawng tiang a rak ngol lo. Cu hlei ah Tatmadaw siseh Kawlram nih Israel ah duhpaoh luh umkal khawhnak ding hnatlaknak a tuahpi.

Israel nih Tatama Sin A Zuarmi Hriamnam Pawl