Mah cu a si caah an manager Julen Lopetegui caah zan mangchia bantuk a si. Nai zarhteni i Levante nih an inn cia ah an tei hna caah Real Madrid-president Florentino Pérez nih manager le an upat ngaimi captain Sergio Ramos cu a auh hna i meeting a tuahpi hna.
Nihin tiang cu Julen rian chuah a si rih lo. Tu zan ah Vitoria Plzen he Champions League an chuih lai i Real Madrid nih a tei hrimhrim a herh lai. Asilo ahcun a ralaimi El Clasico hlan ah manager thlen dawh in a um.
- Media nih Real Madrid manager nan thleng kho lai lo, tiah Isco nih cun an manager cu a aukanh rih.
Asinain sport media pawl nih Real Madrid manager a si kho ding an chim chung cang:
 |
| Real Madrid Ruang ah World Cup chuih laite ah Spain Coach a rian an chuah kong |
Santiago Solari: Kum 42 a simi Real Madrid player hlun le atu i Castilla coach a ttuan liomi hi Zidane bantuk in A-team ah a hung kai kho ve lai tiah zumh a si. Mardrid i sport-news Marca nih a tialning ah Solari hi Julen chawngtu ding ah a lam tambik, a ruang cu a club hi a theih tuk cangmi a si tiah an ttial.
Roberto Martínez: Kum 45 a si, i Belgium coach a si nain Real Madrid manager ding ah aa tlak tiah an ruah. World Cup pathumnak a tlaihpi hna, Swansea (2007–09), Wigan (2009–13) le Everton (2013–16) a tlaih chung ah a hlawh tling ngaimi a si.
Antonio Conte: Kum 49 a si. Real Madrid manager ding ah an zumh ngai. Juventus le Chelsea ah a hlawh tling ngaimi a si i Chelsea nih an chuah hnu in rian lo in a um nain club tampi nih an duh ngaimi pa a si. Italy media nih an ttialning ah Real Madrid nih Conte agent cu tu thla chung ah voi hnih an chawnh cang.
José Mourinho: Manchester United pawl an thinphang kho men, kum 55 a si cangmi Mourinho hi Real manager a si kho ding ah zumhmi cazin ah aa tel. Manchester United nih thindomh peng in a caan a liam lio a si. 2010 in 2013 tiang a rak hruaimi Real a chuah tak lio ah player pawl he fak nawn in an rak i rem lo caah a kir tthan ding cu bawlung vawlei lihninh he aa lo kho tiah an chim.
Mauricio Pochettino: Tottenham manager a simi Pochettino (46) hi Real Madrid nih an duh nak a sau ngai cangmi a si, nain tthal ah khan kum nga um chap ding in Tottenham he min an rak thut. Asinain Real president Perez nih cun a duh peng rih caah Conte hi a laak lomi a si tiah an purhdah. A ruang cu Conte nih cikhat ca lawng si lo in a tlawmbik kum nga tel minthut a duh. Cu a si caah caan tawite Real Madrid hruai chung kho ding ah Solari hi thim ko i Pochettino hi duhsah tein leem ding in aa zuam tiah Independent nih a ttial.
Comments
Post a Comment