Ramhla Sak Lio A Dir Duh Lomi Kum Kua Nu Politician Nih Sianginn Phuah An Duh

Queensland ramtthen Brisbane khua i Kenmore South State School ah Australia ram hla sak lio ah a dir duh lomi siangngakchia kum kua nute cu poitician tthen khat nih sianginn phuah an duh, debate fak ngai in an tuah.

Thil sining cu:

The Courier Mail nih september 12. ah khan a ttial hmasa. Kum kua a simi Australian nute Harper Nielsen nih an ram hla a sak duh lonak a ruang cu Australia ram ngeitu "aborigine" pawl zeirellonak a si tiah a ruah caah a si.

Australia ramhla cu "Advance Australia Fair" ti a si i a hlabia ah "Australians all let us rejoice For we are young and free" ti in aa thawk. Mah cucu Harper a lungtling lo.

- A hlabia ah "We are young", tiah aa ttialmi hi ram a ngeitu "Aborigine" pawl kanmah hlanpi in an rak um cang timi kan philh. History kan cawnmi ah anmah hi kanmah hlan kum 50000 ah an rak um diam cang, tiah Harper nih a chim.

Australia milurel million 25 deng ah khin zatuak pahnih (2%) hrawng te lawng Australia ram ngeitu Aborigine pawl cu an um cang. An nunkhua a tawi, ngakchia a thimi zong an tam khun caah a rauh hlan kan chan chung ah an 1% hrawng lawng an taang lai tiah an ruah.

Right-wing politician pawl ko nih mah ti ramhla a sak duh lomi cu an huat. Senator Pauline Hanson hna nih cun video in social media ah "thluak ttawlmi siangngakchia", tiah a chim i singinn in chuah ding forhnak a tuah tiah BBC nih a ttial.

Prime minister hlun Tony Abbott zong nih Harper hi phung a zulh ding hrim a si. Ram hla sak lio i dirpiak cu thil ttha le aa dawhmi a si tiah a chim.

Queensland i Right-wing politician Jarrod Bleijie ko hi a thinhung khun i Harper a nu le pa cu fakngai in a ti hna. "A nu le pa an ninghmanh zak lo in an fanu cu politik caah an hman. Mah bantuk duhlonak langhter hi ngol zok u. Ram hla sak le dirpiak cu nan i uang tuk ding a si." tiah an khua media ah a chim.

Asinain Harper a pa, Mark Nielsen nih cun a fanu cu a sii lo. "Hi tluk kum note nih mah bantuk a dikmi le dik lomi na thleidan khawh caah ka khuaruah a har ngai. Keimah hmanh nih a ruah awk ka hngal lo." tiah a chim. Cun kan pomning, kan ruahning le kan duhmi zalong tein chimnak nawl hi ka dirpi peng ko lai tiah politician pawl nih a fanu ramhla sak lio a dir duhlomi kong i an chimmi cu a leh hna.

An ram hmun kip in Harper Nielsen cu ca an kuat. Aborigine pawl zong nih ca an kuat. Cu chung ah thapek le faknak a tampi bantuk in huatnak cakuat zong aa tel len.

Harper Nielsen a kainak sianginn hruaitu hna nih a zeiti lei hmanh in sianginn in Harper chuahnak a lam a um lo. Sianginn in chuah kan tim lo, tiah an chim.

Zeitindah na ruah ve?

Cc: BBC CCN The Courier