PRC: Vawleipi Nih Trump An Zumhnak A Zor Ngaingai

USA president Donald Trump nih kan hnu zarh ah khan leicung hruaitu hna an tlingnak UN General Assymbly ah bia a rak chim. USA tuanbia ah amah tluk in rian a ttuan khomi le thil a ti khomi president an um lo tiah a rak chim i a bia theitu pawl cu an i nih sek.

Tu zarh ah min ngei le zumhtlak a simi Pew Research Center (PRC)nih hlathlainak an tuahmi thawng an thanh i White House a luh thawk in atu tiang ah Vawleipi nih an zumhnak a zorh ngaingai tiah ram 25 ah ruahnak hal le research an tuah hnu ah an chim.

2017 i hlathlainak an rak tuahmi ah Trump president a si hnu in Vawlei ram tampi nih White HOuse cung zumhnak an ngeihmi a zor thluahmah ti a si. Mah ti a zornak a ruang cu Donald Trump nih ram dang pawl le vawleicung pehtlaihnak hi zei pipa ah a chiah lo caah a si bik. Cun USA hi kan Vawleipi buainak le ramkipfonh tonmi harnak kong ah i thlak le i tel a duh ti lo caah a si tiah an chim.

"America First" timi Trump nih 2016 Election ah a rak dirpimi, Mexican pawl tlaihhrem hmang le misual an si a ti hna, Mexico vampang kan chon lai tiah a rak thawk. Cucaah Mexico nih cun Trump cung ah ruahchannak an ngei lo. Cu hlan president cung i zumhnak an rak ngeimi a zatceo cu a zor tiah PRC nih an hmuh. Canada zong nih USA cung i zumhnak an ngeihmi cu 26% a ttum.

Norway cu PRC hlathlainak ah aa tel lo, nain nikum i hlathlainak ning ah Trump cu ramkipfonh rianttuan le pehtlaihnak caah ttihnung a si tiah mi tamdeuh nih an ruah. Sweden zong tutan ah USA cung zumhnak a ngeihmi 69% in 44% ah a ttum tiah PRC ning in hmuh khawh a si.

Asia ah cun Philippines pawl nih Trump hi an rak uarbik nain 92% in 83% ah an zumhnak a zor cang.

Mah hi hlathlainak nih a langhter ning ah USA hawi ttha a simi ram UK, Canada, Germany, France pawl cu Trump nih a kalpimi ramkipfonh polisi/politik hi thinphan dai lo a si tiah an ruah. France pawl nih Trump nih NATO ram a simi pawl cung ah siseh "International" politik ah biapi ah a kan chia lo an ti ve.

Donald Trump a zumbik ram cu Israel an si. Jerusalem ah American Embassy a tthial hnu in 56% in 69% ah Trump an zumhnak a kai.

Vawleicung ah Trump nakin Germany chancellor Angela Merkel le France president Emmanuel Macron cung ah zumhnak le ruahchannak an ngei deuh cang. "International politik" ah anmah tello in cun a buai tuk lai tiah an ruah.

Canada le USA cu sau nawn lungtlin lonak an ngei nain Canada nih a kianh i a rauh hlan ah NAFTA minsen an thu lai.

Fiang deuh in PRC website ah rel duhmi nih zoh khawh a si.

Foto: USNEWS.Com