An caih tthan dingmi thil pahnih cu Federal Army/military asiloah Tatmadaw timi Kawl lawng nih hruaimi ralkap si lo in miphun kip fonh ralkap ser ding timi le, atu ralkap lei in tlangcungmi pawl hi ramkomh bu in tthencheunak le chuahnak zeitihmanh ah nan sok in nan i tim lai lo timi kong hi a si.
October 16. ah an caihmi a biapi cu atu an tanh tami "chuah tak lo ding" le "miphun kip fonh ralkap" ser ding hi a si ko tiah hriamtlai phu hruaitu cheukhat nih an chim.
Dr. Lian Hmung Sakhong, Chin National Front vice president cu Meeting-room in a chuah ah reporters nih an but colh i an sinah, "Chuah lonak kong hi a biapi in kan ceihmi a si bantuk in NCA ah min a thu rih lomi kan hawile pawl he i chawnh tthan le i caihhmai tthan ding in Cozah cu kan hal hna. NCA minthu mi cu phu hra lawng kan si rih." tiah a chim.
EAOs halmi cu Cozah nih a lungtlinpi caah a ralaimi November ah hin an ton tthan ding in lungtlinnak an ngei colh.
Karan hruaitu Padoh Kwe Htoo Win nih cun "Ralkap pakhat lawng um timi cu kan lung a tling nain zeitindah kan form lai, zeitindah nawlngeihnak kan i tthenphawt lai timi hi kan caih khawh lomi a si", tiah a chim. "Cun 'chuak lo ding' timi hi kan phunghrampi cung ah aa hngat hnga, a dikmi democracy le kan duhmi federal- in a hram bunhmi phunghram a si ahcun kanmah tlangcungmi timi hna nihhin chuahnak cu kan sok in kan i tthen hnga lo", tiah a leh ve hna.
Self-determination le atu i 'chuah lo ding' timi cu aa dangmi a si ko ee tiah a chim. CNF nih a hramthawk in tein an rak dirpimi mah ram le miphun chung ah mah tein rorel khawhnak hi an khelmi a si.
NLD cozah an kai hnu in U Thein Sein chan lio remdaihnak sermi an ngol i a thar in an caih tthanmi cu atu hi kum hnih deng a hung si cang nain tutan an i tapnak zawnte ahhin an i tap peng ko.
Tutan an itonnak cathluan an chuahmi ah lungtlinnak pasarih an ngei kho. Cu hna cu: Union peace conference hi 2020 hlan ah tuah khawh ding, mah tikah democratic and federal tlaihtleng hna hi i hmaithlak cang ding; daihnak kong caihhmainak i hrengtu "deadlock" hi bauh ding; politik hi tluang le ttha tein i caihhmainak ngeih khawh ding, le lungtlinnak ngeihmi pawl hruaitu hna kar ah ttuan chuah khawh ding; runvennak/himnak kong ttuantti ding caihhmai thawk khawh ding; NCA ah min a thu rih lomi phu dang hna zong an i tel khawh ve nakding a lam kawl le kahdaihnak hi a fek i a hmunmi a si khawhnak ding pehzulh in caihhmainak tuah ding timi hna an si.
Padoh Kwe Htto Win nih cun "tutan ton biaruahnak hnu in chun a ralaimi cu i caihhmainak pawl ah kan tluang ngai cang lai", tiah a ruah.
A ni khatnak ni ah Gen. Min Aung Hlaing nih "Chuah lo ding" timi biatlang a sah i a hruai hna hnu ah chun hnu in a lawi tak hna i a ni hnihnak tonnak cu aa tel ti lo, Commander-in-chief Vice Senior General Soe Win le State Counselor Daw Aung San Suu Kyi nih tlangcung hriamtlaipu 10 EAOs timi hna cu an hruai hna.
 |
| "Tatmadaw" Pakhat Lawng Um Ding CNF A Lungtling, Nain |
Cc: Irrawaddy, A reporter who was in Nay pyi taw. Foto: Salai Lian Hmung Sakhong/ Thawng Tha Lian S, private/facebook
Comments
Post a Comment