Mah te i thah (Suicide) tha a pemi le a sual lo a titu hna sinah Teirialcatialtu Page ah ka rak ttialmi a si:
Khrihfa nih thih hnu nunnak hi kan zumh. Khrihfa tthen khat caah Pathian he zungzal umtti ding i ruahchannak hi mah tein ithahnak caah bawmtu a si kho men. Khrihfa biaknak ah cun mahte ithah cu kan cohlang lo. Nain kan nunnak i harnak kan ton tikah vanram kan timi phanh zau khawhnak ding ah ithah hi a lam pakhat bantuk ah a cang kho. Hi vawlei harnak le buainak hi tei khawh nakding ah ithah hi Khrifa pakhat caah a lam si kho men. Pathian hi vancung ah nuamte in kan um zau hnga.
Mi anmah tein an i thahnak a ruang hi khuasaktintuk harnak, aho theihpi lomi pumpak buaibainak le ningzah mualphonak, umhar, zawtnak, tlaihrem maw a ruang phun tampi a um ko. Lungdonghnak hna an si. Aa thatmi hna nih cu an tonmi cio nun harnak phisinnak caah an tuahmi a si tawn.
Pathian lawnglawng nih fiang tein aa thatmi hna an kong le an nun harnak cu a hngalh. Khrifa hi zei nih dah a nunnak a laakter khawh ti zong Amah lawng nih a hngalh. Ka zumhmi cu Pathian nih ngaihthiam khawh lomi a ngei lo, i a duh ahcun mahte in aa thatmi zong a ngaihthiam khawh ko. A vel cu ri a ngei lo tiah kan zumh.
Pathian bia nih a kan chimhmi cu kan thih tikah amah sin ah kan kal lai, i kan tuahsermi ning cio in bia a kan caih lai i vawlei kan nun lio kong a kan chimh lai. Pathian nih a kan pekmi thil ti khawhnak hi zeitindah kan hman cio? Kan minung hawi caah zeidah kan tuah cio? Pathian sunparnak langhtertu le a kan fialmi tehte ttha kan si maw?
Khrihfa a simi pakhat cu a nunnak i harnak le a tonnmi nun buainak (promblems) pawl a tuar khawh ti lo tikah aa that. Asinain cu vialte cu thihnak pinlei tiang aa kalpi tthiam timi Pathian bia nih a kan hmuhsak. A ruang cu kan tuahmi thil vialte hi Pathian hmai ah a phan dih lai. Pathian nih a kan caihpiak dih tthan lai.
Cu pinah a taang rihmi a nu le pa, a sahlawh le hawikom pawl kha thil rit le ngaihchiatnak a roh ta rih hna. Amah te aa thatmi a tamdeuh nih hin mah cu an ruat hnga maw ti ka ruat ttheo. Minung nih kanmah kong kan i ruah bantuk in nitin kan pehtlaihmi hna zawnruah chih hi minung sinak pakhat a si ve.
Mah te ithah hi "Mi na that lai lo." timi nawlbia cu buar a si tiah ka ruah. Nunnak vialte cu Pathian sermi a si, i kanmah minung nih kan nunnak le kan thihnak kong ah zeibantuk nawlngeihnak hmanh kan ngei lo. Khrhifa pakhat kan sinak in mahte i thah cu "Sual" a si tiah ka pom. Cuti ka ti tikah aa thatmi cu a thi (Hell a tlai lai.) ka ti duhnak cu a si lo. Zeitluk in a sualmi hmanh khi Jesus a cohlang i a ngaihthiamnak a cohlangtu cu an thi hlei lo. A nunnak Jesus a petu cu zungzal nunnak tu an hmu.
Khrifa biaknak chung i an i thah tikah Pathian nih zungzal thihnak a kan phak ter lai lo timi ruahnak an ngei kho men. Asiloah tthen khat an i thahnak a ruang cu Pathian hi a um lai lo, thih hnu nunnak a um lai lo, asiloah a um zong ah zeidah poi ti hi an ruatdeuh lai tiah ka ruah. Acheu nih an nunnak cu Amah sinah an pek cang caah ngaihthiam kan si lai tiah an i ruah khawh men. Asinain mah te i thah hi Jesus sin i nunnak pekchanh cu a si maw?
Mi tampi nih an nunnak i laak an duh caan te hi a um cio ko lai. Hi vawlei harnak, kan nunnak i buainak vialte hin i hlihphuah duak hi kan ruah caan a um cio ko lai. Keimah zong ka ruah caan a tampi ko. Asinain ithah lawng hi, cu vialte nun harnak le buainak in luatnak lam a si lo. Pathian nih kan caah timhpiakmi a kan ngeih. Mah le mah nunnak i laak duh tiang ruahnak na ngeih ahcun Pathian sinah bawmhnak hal. Na pawngkam na unau maw na Khrihfabu maw an dawtu an tampi ko, bawmh hal ko hna. Asiloah na umnak pawngkam ah cu bantuk bawmhnak tampi a um ko.
Cathiang ah fiang tein aa ttial. Pathian nih a kan ser chan hi "mahte in i thah" ding ah a si lo. Amah sunparnak langhter ding ah a si. "Mahte ithah" nih zeitindah Pathian sunparnak a langhter lai? "Lai nawng hlah" ti ah pei nawlbia a chuah leh cu. Bible ca thar ah "a dongh tiang zumhtlak tein um ding", "a dongh tiang a hmunmi lawng khamh nan si lai." ti kha kan rel khawh hna. Marka 13:13.
Salm 34:18-19 "Lung a dongmi kha Bawipa nih a umpi hna i ruahchannak a ngei lomi kha a khamh hna. Miṭha nih harnak tampi a in tawn, sihmanhsehlaw harnak a inmi chung khan Bawipa nih a khamh";
Luka: 18:20 ah "Lainawn/ mi thah cu a palh/sual."
Hebru: 13:5 ah "Kan kaltak lai lo i kan hlaw bal fawn lai lo."
2 Korin: 1:8–10 hngalh a duhmi nih nanmah tein rel te u.
1. John: 3:15 "A unau a huami poah cu lainawng a si i lai a nawngmi nih cun a chung ah zungzal nunnnak a ngei lo ti kha nan hngalh." Zungzal nunnak le lainawn cu an lam aa dang timi Bible ah fiangtein a lang.
Bible tuanbia chung ah amah tein aa thatmi hna hi Bawipa sinah kir ding lam a kawl duh ti lomi amah duhnak men in khua a ruatmi lawngte an si. Pathian umpinak zei an rel lo. Pathian khamhnak le a sermi thaizing caah an ruahchannak a dong. Mah hna cu Pathian he an i hlat, Bawipa duhnak kha an ruat ti lo. Cucaah a dongh tiang Pathian khamhnak le lamhruainak kha an zulh lo caah Jesus nih a chimmi vawlei dong tiang nan sin ah ka um lai, timi le vawlei hi ka tei cang, ttih hlah u a timi zei rel lomi an si. "Kan hlaw lai lo, kan kal tak lai lo." tiah Pathian nih a chimmi a zum lomi an si.
Pastor cheukhat i ralring ko u. "Mahte aa thatmi van ram an kai lai, Pathian nih a ngaihthiam khawh dih. Cu a si lo ahcun na biakmi na Pathian hi ruat tthan?" ti bantuk hna hi social media ah chim le mi ruak cung ah chim hi ttih a nung ngaimi a si. Na Khrihfabu le na pawngkam ah nunnak i lak duh tiang harnak a tongmi le a ruatmi an um tikah Pathian bia le an nunnak thlennak pakhat khat in bawmh khawh tu i zuam ding kan si. Mah bantuk lei zong ah Khrihfabu hi kan thiamdeuh a herh chin lengmang lai tiah ka ruah.
Kanmah chung zong aa thatmi an um ve ko. Hi kong chimrel hi a hartukmi a si. Zungzal nunnak na sung lai maw sung lai lo? timi chim ka duhmi a si lo, Pathian khamhnak na cohlan i na chung ah Bawipa a nun ko ahcun nangmah tein na hngalh lai. Cun Khrihfa hi harnak le buainak, cun hneksaknak in a luat hrim lai tinak a si lo, cu bantuk na ton tikah na lung dong lai, nain Pathian nih lam dang an chiah piak ko. Amah kha i bochan law, amah sinah na nunnak kha chia ko.
I bawm hna usih. Kan pawngkam ah hi bantuk a tam chin lengmang tikah ttha tein i ruah hna le i runvennak ding a lam si cio ding saduhthah he ka ttialmi a si.
 |
| Jesus A Thattu Ah Naa Tel Ve Maw? |
Comments
Post a Comment