INTERPOL timi bia hi Film/movie a zoh ngaimi pawl nih cun theih ngaimi a si. Pink Panther timi movie ko ah anmah rianttuannak lawngte aa tel. INTERPOL hi movie chung bantuk ngaingai in rian an ttuan maw?. Mi tlaihnak nawl an ngei maw? Meithal tlaihnak nawl an ngei maw?
1923 ah International Criminal Police Commission (ICPC) tiin an rak thawk i 1946 in INTERPOL tiin a min an thlen tthan. An Headquater cu Lyon, France ah a um.
A tuanbia:
Kum zabu 20 chung luhka ah ramkip fonh palek pawl rianttuan tti in misual (Criminal) pawl kawl le tlaih ding rianttuan tti an rak i thawk nain an hlawh a rak tling lo. Cucaah 1914 ah Monaco ah avoi khatnak International Criminal Police Congress an rak tuah, cun 1922 ah New York ah Conference an rak tuah tthan. Monoco i an tuahmi Congress cu Palek thiamsang an rak telh hna lo i politician le phung thiam pawl lawng an telh hna caah an hlawh tling lo. New York i Conference zong nih zeihmanh a rak chuahpi lo.
1923 ah a thar in Vienna, Austria ah an rak tuah i (ICPC, a hnu cun Interpol) cu tlamtling tein an rak dirh khawh. Mah hi Interpol a dirhtu hna ram cu Palek thiamsang lawngte Austria, Germany, Belgium, Poland, China, Egypt, France, Greece, Hungary, Italy, the Netherlands, Romania, Sweden, Switzerland le Yugoslavia an rak si. UK cu 1928 in aa tel ve, i USA cu 1938 lawng in INTERPOL ah chungtel a lut.
Germany ah Headquater an rak chiah i Nazi nih a ukmi ram a si hnu in ram tamdeuh nih cun Interpol bawmhnak an pekmi an rak ngol. 1930 in 1945 tiang ICPC president cu SS general lawngte an si, (SS cu nazi ralkap). An dih lakin ralpi pahnihnak a dih hnu ah Nuremberg Trials timi ral-phung buarmi pawl biaceihnak ah an rak thah hna.
Ralpi 2.nak a dih hnu 1945 in Belgium, France, Scandinavia le the United Kingdom hruainak in INTERPOL cu a thar an chuah. 1989 kum in Lyon ah an Headquater cu tthial a si.
INTERPOL president hi a min chiami an um len. 2010 ah interpol president Jackie Selebi cu South Africa nih ziknawh a ei tiah a bia an rak caih. A tlawmbik in USD 155000 cu ritsii a zuarmi pawl sin in a rak ei ti a si. South Africa palek nih a kong an rak tawlrel i president in a rak chuak.
Atu i Tuluk cozah nih an tlaihmi Meng Hongwei hi 2016 in INTERPOL president ah an thim i amah zong Tuluk a si. 2020 tiang ttuan ding a si nain tu kum september ah khan Tuluk cozah nih an tlaih Tuluk party sikan zohfeltu hna nih an hren, biahalnak phunphun an tuah. October 7. ah khan INTERPOL nih an website ah "Meng Hongwei nih email in rian chuahnak a hal." tiah thawng an thanh. Amah zaka ah South Korea pa Kim Jong Yang cu "Acting" president ah an thim.
INTERPOL hi 2013 ah khan an budget Euro 78 million a rak si, i 2017 ah khan cun € 113 million a si. Chungtel ram 192 nih kum tin an thawhmi a si. Rian a ttuanmi hi ram 100 chung in minung 756 an si tiah a hnubik cazin in theih a si.
An rian le an tuah khawhmi, tuah khawh lomi pawl.
INTERPOL nih ramkip ah kal in misual pawl va tlaih khawhnak nawl an ngei lo. An rian cu INTERPOL chungtel a simi ram pawl ah misual (criminal) an um tikah cu ram palek nih fawite in an tlaih khawh nakding hlathlaipi, ram dang an zam tikah kawlpiak le a herhmi information vialte kawl piak le pek hi an rian bik cu a si. Ramkipfonh in misual a kawltu lawng an si.
Meithal an i ken lo. INTERPOL cu meithal i ken in misual an dawi lo. Ram pakhat asiloah palek bawi pakhat nih nawl a pek dah ti lo cun meithal an i ken lo. Chungtel a simi ram pakhat nih misual a kawlmi "Wanted person" pawl kawl piak le a si khawh chung in an kong hlat hi an rian a si. Palek nawlngeihnak timi "Police power" an ngei lo. Ram kip palek kuttang ah a ummi a si.
INTERPOL chungtel a lut lomi ram hi an tlawmte. Myanmar zong a lut. A lut lomi ram cu Bhutan, Kiribati, North Korea, Micronesia, Palau, Samoa, San Marino, Solomon Islands, Taiwan, Tajikistan, Turkmenistan, Tuvalu, Vanuatu le Vatican an si.
Cc: https://www.interpol.int/FAQs
What Do Interpol Agents Really Do?
Is Interpol real?
Can Interpol agents make arrests?
Comments
Post a Comment