David Beckham Nih Aa "Chir Bikmi" A Chim

David Beckham cu a chan lailing ah Vawleicung i bawlungchuih thiam min thangbik le a larbik pakhat a rak si. Fashion le design lei zong in thil thar tampi a chuah lengmang mi pa style taktak a si.

Manchester United, England, Real Madrid le PSG pinah LA zong ah bawlung a rak chuihmi a si. Hlawhtlinnak tampi a hmuh bantuk in bawlung a chuih chung ah huatnak a tonmi a um len, tahchunnak ah 1998 World Cup i England le Argentina an chuih ah Beckham nih Diego Simeone a chuih caah Red-card a hmu i an rak chuah, England an sung beh. England mipi nih an rak huat tuk. - Real Madrid aa tthial hlan ah Ferguson nih kedan in a chuih hnawh i a cal thi chuak.

Aa chir bik ding hi zeidah a si hnga tiah nan ruah?

Nai hrawng cu an siangpahrang te chung zulhkhalh pah in Australia ah a tlawng ve. The Sunday Project nih caan ttha la in David Beckham cu intervio an tuah i a chan lailing kong tampi an hal.

An biahalmi lakah "na no lio i na tuahmi chung in naa chir bikmi zeidah a si?" timi aa tel i a tanglei bantuk hin a leh hna;

– Kan inn ah Nelson Mandela he kan iton lio i kan i thlakmi hmanthlak kaa chiah peng. Cu hmanthlak chung ah ka sam fa tete in kaa phir, tiah a nih pah in The Sunday Project intervio ah cun a chim.

– Cu hmanthlak chung ah cun khuaruahhar a simi, zohchun tlak le mi tampi caah thazang a simi pa he kan to tti. Mah ah cun ka sam cu ka va phir ee!! tiah David Beckham nih aa chir bikmi thil an halmi kong ah a chim.

Beckham hi bawlung vawlei in aa dinhnak kum nga a si cang nain a form ttha tuk rih tiah an ttial.

Zeiruang ahdah a thau khawh lo, a body fit peng rih timi kong ah Sunday Project nih an halmi cu tihin a leh hna;

– Kum khua an upat cun caan hmante in fale sianginn don-thlah hi a har tuk. Asinain zohchunthlak si hi a herh ngai, tiah Beckham nih a chim i a fanu te hi ke in a thlah i a don peng. Mawtaw le Cycle zong an ngei ko nain ke in don le thlah a hmanmi hi a pum caah a ttha khun tiah a ruah.

Kum 43 a si cang. Traing-center kal hi phaisa a dih tuk tiah mi rum a simi David nih a chim, i ke in kal hi a tthabik tiah a nolh.

England caah puai 117 a chuih. Atu hi USA ah Club a ngei i a min ah Inter Miami CF ti a si, 2020 in cun MLS ah an lut kho lai tiah timhtuahnak a ngei.