NLD Party Nih UN General Assymbly An Kai Lo

State Counselor le Foreign minister a simi pi Suu Kyi nih UN General Assymbly ah NLD party chung si lo in ralkap a aukanh zungzaltu pa a thlah. 

Chin Website pawl ah UN General Assymbly (UNGA) kong rel awk a um lo ti awk a si. News an charmi cio cu mah le huamci cio a si lai. Vice president Henry Van Thio cu UN Assymbly a kai tthan lai tiah a ttialtu Lai website ah an rak um. Asinain tutan cu NLD party minung hohmanh New York ah an kal ngam lo.

"Pi Aung San Suu Kyi cu UN GA ah kal aa tim lo." tiah September 12. ah khan Kyaw Tin nih reuters ah a chim. A ruang belte an chim chih lo. Ni kum zong a rak kal lo i Vice President Henry Van Thio a rak thlah. Chinmi caah a sunglawi ngaimi tuanbia pakhat a rak si.

UN Ah Henry Van Thio (Vice President) biachimnak:

Tutan zong Pi Suu Kyi a kal lo ahcun Pu Henry Van Thio hi a thlah tthan te ttheo lai tiah ruah a rak si nain mi dang tu an kai lai. Mah hi Rohingya buainak he pehtlai in NLD cozah nih Vawleipi hmai an khah lo caah UNGA cu an kai ngam lo tiah international media pawl nih an purhdah. Hi zawn ahhin NLD party nih an rak i ruahning bantuk in ram an hruai kho lo, uknak an tlai kho lo ti a hung lang. 

State Counsellor zong a si i Minister of Foreign Affairs zong a simi Pi Suu Kyi nih Vawleicung hruaitu vialte an tlinnak UNGA ah kal lo derthawm ngai a si. UN zung New York ah rian a rak ttuan balmi Pi Suu Kyi nih hin Kawlram cozah hruaitu dirhmun in UNGA hi kai a duh tuk ve ko lai. A luancia kum hnih, NLD cozah an tlaihka te ah a rak kai ve i bia a rak chim ve. Amah a kal khawh cun hmual a ngei khun ding a si ko. A hiar tuk ko lai. A kai ding zong a si tiah ka ruah. 

Asinain, tutan UNGA ah Suu Kyi nih a thlahmi pa cu NLD party a si lomi cu hlan kum kul leng Ralkap pawl vawleipi hmai ah a ttanh i an sual a thuh piak lengmang tu a simi Kyaw Tint Swe a kai lai. Amah hi Independent politician a si i State Counsellor zung ah minister a ttuan liomi a si. Myanmar Ambassador to United Nations siseh a dang riansang tampi a tlai balmi a si. 

Kyaw Tint Swe a kalmi hi cu ralkap a dirkamh lengmang tu a rak si bantuk in tutan International Criminal Court ah ralkap pawl an biaceih ding UN siseh nitlak ram pawl nih an aupi cuahmah lio a si tikah ralkap pawl caah hnangam ngai a si kho. Hi bantuk caan hna ahhin Pi Suu Kyi kal in biachimrel kho sehlaw hmual a ngei ngai ding a si. Nain zeinihdah a ttemttawn hnga? 

Rohingya kong cu dang khat a si. Kawlram pumpi remdaihnak ding le mipi kut uknak a phak khawhnak ding caah a lam a ummi paoh in a ttuan rua lai, an ttuan ttheo lai tiah kan ruahmi Pi Suu Kyi le NLD party hi a ralaimi thimnak ah zeitindah kan ruah te hna lai? 

Myanmar aiawh in UN General Assymbly ah bia a chim ding cu Friday (USA, NY times) zanlei ah a chimte lai.