Japan Pawl Sin Cawn Tlaak Nunphung Le Ziaza

Japan cu 1/8 final ah Belgium nih 3-2 in a tei i an khua ah an tlung cang. Japan nih zoh a nuammi bawlung puai an kan zohter. Asian nih kan lungthli in kan ttanh dih hna. Asinain, tutan World Cup ah bawlung puai leng i ceih le thangtthat a tongbik cu Japan mipi an si.

Cucu zeidah a si ti ahcun World Cup i Japan ttanh ding ah Russia a phanmi Japan miphun pawl ziaza le lungput hi a si.

Japan ttanhtu pawl cu World Cup (WC) chuih an zohmi a dih tikah an tonak in thawh i an tlunnak Hotel ah kir cio khawh a si ko nain cucu an tuahmi a si lo. An pawngkam hnawm an char ta dih cio an i chuahpimi kha TV ah hmuh khawh a si.

Mah bantuk lungput nih tutan WC ah cawntlaak le upat tlaak a kan hmuhsakmi a si. Bawlung chuih zoh pah in an eidinnak hnawm vialte an char ta. Thiang tein an kal taak.

Japan a phan balmi Laimi tampi kan um. Japan cu thianhlimnak a duh tukmi, a thiang hlim tukmi a si. An hmet tein an sianginn ah thiangte in an um, sianginn hnawmchar le thianh an saya te nih an cawn piak cang hna.

Chinmi nih kan i cawn khawh ding thil ttha a si. USA ah Park tepawl i Chinmi an thurhnawmh ruang i Chin le Myanmar minchiat te hna a tam tiah theih a si. Chinmi umnak hmun ah a thurhnawm timi si ti lo in Japan pawl an nunziaza hi a theih lawng si lo in cawn a tlaak tukmi a si tiah nan ruat ve maw?

Japan pawl an lungput cu tutan i World Cup ah ceih a tong, i thangthat a tong taktak.

Atang hi Japan team thil thlennak a si i an sungh hnu ah anmah tein an thianh ta dihmi a si. Zei World Cup team hmanh nih an thil thlinnak room an thianh ta lo.