Turkey Election Hi Cuanh Phu Le Theihpi Phu A Si

June 24. 2018 cu Turkey a hmailei kong biakhiahnak biapi tukmi an tuah lai. Cucu Election a si. President thar le cozah thar thimnak a si lai. Atu cozah le an president hi an thleng kho lai maw? Zeiruang ahdah thlen an duh? Tlawmpal in a chung kan lut lai i nan ruahnak van chim cio u.

President Erdogan an duh ti lo ruangah ui le mee bantuk a simi party pahnih an i fonh (a cung hmanthlak hi Erdogan a duh lomi pawl million pakhat hrawng june 23. i an iton lio a si.). President thar ding ah Muharram Ince timi kum 54 pa an duh, i 2002 in "de facto leader" of Turkey a si cangmi Recep Tayyip Erdoğan cu a tei ko lai tiah an zumh.

Turkey president Erdogan hi Dictator ah aa cang deng cang tiah a rammi tampi nih an ruah. Ralkap nih uknak chuh (coup) an rak i tim i an hlawhtlin lo caah ralkap tam ngai le biaceih bawi pawl telin cozah rianttuan 50000 hrawng rian a chuah hna, i fak taktak in dan a rak tatmi hna zong an um. Cu hnu ah phunghram remh in a nunchung Turkey uk aa tim nain rammi nih Referendum ah an duh lonak an rak langhter.

Erdogan cu hodah a si? 

Recep Tayyip Erdogan cu Feb. 26. 1954 ah a rak chuak i 2014 in nihin tiang Turkey president a ttuan. Asinain 2002 kum khan Aung San Suu Kyi bantuk "De facto leader" a ttuan cangmi a si. President a si hlan ah 2003 in 2014 tiang PM a rak ttuan. 2001 ah Justice and Development Party (AKP) a rak dirh i thimnak ah teinak a rak hmuhpi hna i 2014 i president a si tiang teinak a hmuhpi hna. Conservative Democrat aa ti nain Socialist phun le Liberal Economic Policies in a hruaimi cozah cu a kalpi.

Bawlung chuih thiam ngai a rak si i Turkey i min ngei Club a simi Kasımpasa FC ah 1994 i the Islamist Welfare party in Istanbul Mayor a si tiang a rak chuih. A rauh hlan ah Mayor dirhmun in an tthumh, political office in an bar pinah thla li chung thong an rak thlak. Politics le biaknak a hmuhning biazai a rak rel caah a si. Cucaah an party in a chuak lawlaw i 2001 ah party dang a rak dirh cu a si.

Europe le Vawlei Nih Kan Herhmi Merkel kong na rel cang maw?

Nitlak ram pawl le EU caah cun a rak ttha ngaingai. Aruang cu Erdogan nih Turkey hi Islam biaknak a biami an si nain USA le Israel cungah hawikom bantuk in a rak um khawh caah a si. Cun EU ah chungtel sinak zong a rak sok. Greece he aa ral tukmi an si nain Erdogan nih uknak a tlaih hnu in aa daw tthanmi an si pinah Greece nih EU luh khawh nakding tampi a chimrelpi. Asinain Gaza-strip 2007 hrawng i Israel he i kahnak ruang ah Israel cu fakpi in a rak mawh chiat.

Turkey i miphun fadeuh a simi Ethnic Kurdish pawl hi a biapi ngaimi political-issue a si lengmang. 2009 ah Erdogan cozah nih Turkey-Kurdish kar raltuknak cu daihter ding timhlamhnak a rak ngei. Hi ral nih minung 40000 leng a rak nawn hna. Cu cozah hmuitinh cu EU nih a rak dirkamh pinah Kurdish pawl nih anmah holh tein TV, Radio le Media ah politik kong chimrel khawhnak, an min, an bia le hla le an khua min pawl ah an holh tein hman khawh ding an rak zuampi hna. Erdogan nih Kurdish tapung tiah an tlaihmi tampi luatnak a rak pek hna.

2016 i uknak chuh an timh lio a thil tuahmi ruangah siseh, a hnuhnu cun minung covo a upat lo chin lengmang tiah a rammi siseh ram leng nih an ruah. Kurdish pawl zong nih an zum ngam tuk ti lo, a ruang cu uknak timi Nawlngeihnak hi a thlah siang ti rua lo tiah an ruah. Uknak sau tuk a tlaih cang tikah Journalist tampi an ram ah an thihmi zong hi amah ruangah a si tiah an ruah.

Cucaah tutan thimnak ah Kurdish thimfung hi a caah a biapi tuk lai tiah ruah a si.

Erdogan hi Muslim ram pawl nih nitlak lei bantuk in khua a ruat tiah a mawhchiat ngaingai i amah dotu pawl an bawmh hna. Erdogan hi a rammi tampi nih an duh ti lo, a minung pawl nih phaisa tamtuk an ei tiah an ruah. Cun an ram khuasaktintuk a har chin lengmang. Tu kum chung ah phaisa puarnak (Inflation) cu a sang chinchin. An ram a siifak chinchin.

EU nih an chungtel ah an lak duh lonak cu uknak fektuk in tlaih aa tim tiah an ruah caah a si.

Erdogan a dotu party kong tam kan thei lo. Asinain minung pakhat nih uknak sautuk a tlaih tikah a rammi nih zeibantuk harnak le tthatnak dah an tuar ti cu an hngalh bik. Hi thimnak ahhin dehcawh le thimfung fir a chuak kho, i cucu an ttih ngaimi a si.

Zei si hmanh ah a biapi ngaimi thimnak cu a si ko hnga lo maw?

Foto: Foxnews