Norway Ah Voikhat Thih Ah Reindeer 323 An Thih Ning

2016 august ah khan Norway ah ttek a rak tlaa i Reindeer timi saram phun aa tiami lawngte kawng 323 cu hmunkhat te ah voikhat thih ah an rak thi. Mah ti voikhat ah an thihnak hmun cu 50-80 meter a kaumi chung ah a si caah an ruun in an um lio a si caah a si lai ti a fiang. An pawng i a tlami ttek ruang lawng ah mah vialte thih cu a si hnga maw tiah cu vialte Reindeer thluak cu an laak i siibawi te le tirawl zohfeltu hna nih an check. 

Tutan ah a phi a hun chuak.

Kokek a simi saram le thingram hna kilkawinak ah a thiambik le phaisa tambik hmangmi hna lakah Norway hi pakhatnak a si lengmang. Thingram kilvennak ah USD million 500 in 1000 kar hi kum tin nawn in a hman i ram siifak pawl nih an thinghram an kilvennak caah a pekmi a tam.

Hi vialte Reindeer an thihmi hi zawtnak ruangah a si hnga maw tiah an thluak an check hi a si. Kum hnih deng an rau. Phaisa tampi an dih. An kawlmi zawtnak cu Chronic Wasting Disease (CWD) timi a si i 1967 ah khan Colorado i Sakhi, Zuk le Neng tibantuk he aa lomi saram zuatnak/ hlathlainak an tuahmi ah an rak hmuh. Ramlak a tlongmi saram ah hi zawtnak an hmuh hmasat cem hi 1981 ah khan a si.

Siibawi te le tirawl zohfeltu hna nih CWD zawtnak ruang ah hi vialte Reindeer an thihmi a si lo, tiah tu zarh khan bia an fehter tiah NRK nih a ttial. Atu bantuk in zawtnak ruangah an thihmi a si lo ti kan theih cu hna a ngam, tha a dam tuk tiah siibawi te nih an chim.

Reindeer cu Norway ah caw le a dang sattil zuat bantuk in an zuat khawh. Pawcawmnak ah an hman. A sa a thaw i a phaw hi a lum caah a kihnak ram a simi Norway le chaklei ram paoh ah cun an uar ngai.

Norway i Sami timi Ethnic Group (Myanmar i Chin bantuk) pawl nih cun thil phurtu zong ah an hman i a sa zong an ei, an chawlehnak biapi tukmi pakhat a si. Sami pawl cu Norway cozah nih anmah tein rorelnak a pek hna, Parliament an ngei, cozah an ngei. Economic le Defence lawng Norway nih a uk. An miphun a ttanh taktak mi an si. An sin in cawn ding hi a tampi.

Sami pawl nih an Parliament an sak ahhin an pupa chan in an rak sakmi inn muisam keng in an sak. An kutzung an upat. An nunphung hi an Parliament ah an langhter ngaingai. Chinmi he cun kan idang ko. A hmanthlak click law miphun dang parliament Chin parliament inn hi zoh ve.

Sami Parliament Cu An Pupa Kutzung in An Sak. Chin MP Pawl Nih Ziah American An i Hruhpi?

Foto: Visitnorway, NRK, SNO