Nihin Bawlung Biathli Tawi Tete

World Cup chuih liopi a si nain Club pawl cu a ralaimi August i Football Season caah biatak tein timh tuahnak an ngei cuahmah. A linsa deuhdeuh mi thawngpang tawi tete kan hon khawmh:

Liverpool nih Real Madrid hmaikal Marco Asensio (22) caah an bank bauh an sian. Cucaah Liverpool nih Real Madrid hruaitu hna cu an chawnhbiak hna hi Spain hmaikal Asensio cu Euro million 170 hrawng in cun kan sian ko lai tiah an rak leh hna. Cucu Liverpool thawngca nih a ttial. Real Madrid nih i biatak in Neymar cawk an duh tthan caah phaisa an herh ngaingai.

Lyon alaikal Nabil Fekir hi Liverpool nih cawk an duh tukmi a si nain i theihthiam lonak ruangah Lyon a ngeitu nih Liverpool sin zuar an duh lo. Cucu Lyon club-president nih a chimning ah Real Madrid nih cawk an duh ve.

Manchester City le Paris Saint-Germain nih back ttha an herh caah Bayern Münich hnukham Jerome Boateng hi an i cuh tiah Germany thawngca nih an ttial. A tlawmbik Euro million 50 cu an chuah a herh lai ti a si.

Tottenham nih Anthony Martial hi United in chanhchuah an i timhmi cu an ngol tthan cang. Mauricio Pochettino Martial nakin Nice hmaikal Allasane Plea (25) khi Harry Kane bawmtu ding ah a tthabik lai tiah a zumh. Cucu the Sun nih a ttial.

Talksport nih a ttialning ah Tottenham lawng nih Plea hi an duh lo, Borussia Mönchengladbach zong nih cawk an zalh i an hal cuahmah lio hna a si.

Manchester City hi mi thar cawk an i tim cuahmah rih, i Napoli alaikal Jorginho (26) cawk an hal hna tiah Manchester Evening News. A man lungtlinnak an ngei kho rih lo ti a si.

Cristiano Ronaldo Nupi Ngeih A Duh Cang?

Ronaldo hi Real Madrid ah a um rih lai maw, a chuak lai timi biafiang a um rih lo. An manager thar Julen nih cun Messi a thiamdeuh a rak ti bal. Ronaldo a nungak belte cu tutan World Cup ah an ngiat ngaingai.

Ronaldo le a nungak Georgina Rodriguez hi i hamnak an tuah tiah zumh a si. Argentina miphun a simi Georgina Rodriguez cu a kut ah diamond zungbunh lianpi aa hruk. The Sun, Mirror te pawl nih i hamnak an tuah cang tiah an ttial.

Kum 24 lawng a si rihmi Rodriguez cu 2016 ah khan Model a rak ttuan i London ah mirang holh zong a rak cawng tiah theih a si. Ronaldo he an rak i ton hlan ah Madrid i Gucci timi dawr ah rian a rak ttuan.

2017 kum ah khan Rodriguez le Ronaldo cu fanu te an rak ngei. Cu hlan ah Cristiano Jr. (8), le faphir hna pahnih Eva Maria le Mateo hi mi bawmh chom in a rak hrin hna. Mi nauinn aa hlan tinak.

Critiano Jr. a nu belte ho a si hngalh a si rih lo.

Cu vial.

Share piak hmang pah u :P