USA ah a vung peem mi pawl ramri congtu nih an tlaih hna i upa cu thong an thlak hna i sianginn kai a cudeuh rih lomi ngakchia thongkhat leng cu a dang tein an chiah hna. Mah cu kong ah American an lung a ttha lo ngaingai. Cu hna lak ah President nupi Melania aa tel ve.
- Mrs. Trump nih chung aa tthenmi kan hmuhmi hna hi cu ka hua tuk ee, tiah a chimmi amah aiawh biachimtu nu nih zarhpi ni ah khan a chim. Cucaah a si khawh chung in Republican le Democrats pawl lungrualte hi kong ah rian nan ttuan tti a herh tiah a chim chih.
President nupi ah amah lawng hi mipeem ngakchia pawl kong i bia a chimmi a si lo.
– Zawnruahnak a ngei bak lomi mah hi politik hi cu a poi ko. Ziaza tthat lo (immoral) a si, i ka lung a khuai, tiah Laura Bush nih Washington Post ah cabia a hun ttial. Laura cu republican le preident George W. Bush nupi a si.
The Wahshington Post i a ttialmi ah USA ramri runven a biapi tuk ti cu a chim, a sinain ngakchia le an nu le pa tthen riangmang in a dangte chiah hna cu US tuanbia ah ningzak ngaimi a si tiah a chim. Ralpi pahnihnak lio i Japan pawl an rak tuah tomi hna kha philh ding a si lo tiah a chim chih.
Laura Bush nih American pawl cu "a ziaza tthami ram" kan si timi philh hlah usih tiah tha a pek hna. Ram puitling pakhat kan si ahcun kan ttuanvo cu hi ngakchia pawl hi an nu le pa he hmunkhat ah umter tthan hna ding a si. Cun fale le nu le pa tthenter timi hi kan tuah lo ding hrimhrim a si ee, tiah a ttial.
UN siseh American tampi nih Trump cozah an hun mawhchiat ngaingai hna. Ngakchia le hringtu tthen hna cu a si khawh ttung lo, a rannak in tonter hna u tiah USA hmun tampi ah an au len.
Justics minister Sessions nih Bible aa tlaihning:
Zei upadi hmanh ah catlap lo in a lutmi mipeem pawl an fale he tthen hna ding timi a um lo. Asinain may 7. khan Jeff Sessions nih cun mipem pawl caah zei zawnruahnak hmanh a um kho lo tiah a rak chim i phung lo in a lutmi vialte cu tlaih dih hna i an fale laak piak hna ding tiah a rak chim.
Cu le cangka atu bantuk in a tuah hi a si a rammi le UN mawhchiatnak cu Bible in aa khamnak.
- Paul cakuat chung bia hi fiang tein chim ka duh. Rome 13. ah cozah kha an nawl ngai hna u, aruang cu Pathian nih amah caah a sermi cozah an si, tiah Sessions nih cun a chim. Phun dang in chim ah cun Trump cozah le politik cu Pathian nih a dirhmi a si, zeica tiah cozah cu Pathian hnatlakpimi a si.
Mah cu bia cu Trump nupi nih tihin a leh.
Ram pakhat nih cun phungphai le upadi vialte a zulh ding a herh tukmi a si, nain cozah nih cun "Thinlung he" a uk ding a si, tiah a chim.
Trump nih a nupi le Laura Bush cu tihin a leh hna:
- Democrats pawl le an hawile Republican cheukhat cu ramri himnak le runvennak caah rian an ttuan tti zawk a herh. A ralaimi Election hngak hlah u, aruang cu nan sung lai, tiah Twitter ah a ttial.
Share.
foto: Ap
foto: Ap
Comments
Post a Comment