Malaysia i Chinmi Refugee in Norway an phak ah Prime Minister a rak ttuanmi cu Chrihfa Party in Kjell Magne Bondevik timi a rak si. Ni kum khan kum 70 a rak tling. Hi pa hi pumpak zong in ka rak ton bal vemi a si i voi li a biachim ka va ngai bal. Laimi tampi a ton hna, i Laimi inn chung zong ah a tthu dirmi a si. (A cung hmanthlak hi 2016 April a si i Kawlram a tlawn i a kirka te a si. Rohingya kong ah Suu Kyi an thangchiatka te a si. Foto: BMLian/private).
Party fadeuh kan ti cu vanchiat ah Parliament an hruai kho ti lo i a Term dih hlan ah Prime Minister rian cu a chuahtak. The Oslo Centre for Peace and Human Rights timi cu 2006 ah a rak dirh. Aa tinhmi cu Vawleipi ah daihnak a um khawh nakding, minung covo caah le biaknak aa khat lo mi hna i theihthiamnak le cohlan khawhnak a um khawh ding hi a si bik.
Bondevik cu atu hi a dirhmi Oslo-Center in aa din cang lai ti a si. Rian tampi a ttuan manh. Atu zong, "thazang tampi ka ngei rih, cun i pumpeknak le lung a laa tukmi rian a si caah pehzulh rih ka duh ko. Asinain atu cu khuamawcaan te lawng ah meeting ka kai cang lai." tiah a chim.
Oslo-Center cu Bjørknes University College (Oslo lengdeuh) ah an tthial cang lai tiah theih a si. Hi sianginn hi Democracy le Peace lei ttha ngai in an chimhnak a si i kei zong zarh khat Research ka rak tuah bal. Min a ngei ngaimi sianginn a si i atu Oslo-Center an hun tthial le bang ah cun mi nih an theih chinchin ko lai.
Kjell Magne Bondevik Tuanbia Tawi:
 |
| 2016 April 1. Bondevik bia chim lio phone in ka thlakmi a si. Suu Kyi cu a runven ngaingai. |
1947 ah a rak chuak. MF Norwegian School of Theology, atu Laimi le Kawlram mi zeimawzah Bible sianginn an hung kainak le Norway khuasa Laimi zong an kai cuahmahnak ah khin sianginn a dih. Lutheran (Church of Norway) ah Rev. a hmu i Pastor a rak ttuan. Mah cu pah cun Christian Democratic Party ah a cawl cang i a hnu cun hruaitu a hun si.
1997-2000 tiang, 2001 in 2005 tiang hi Prime Minister a rak ttuan. Cucu Labour Party a si lomi Party chung in PM saubik a ttuanmi tiin atu tiang cu a min um rih, a sinain atu cozah a tlaimi hi a Term hnihnak a ttuan lio i ttha te a dih ahcun a teite lai tinak si.
A donghnak bik Prime Minister a ttuan lio ah Malaysia i Chinmi Norway rat khawh nakding biatak tein a chimrelmi a si tiah theihmi a si. Amah a ttuan chung ah Kawlram mi a hleiin Chinmi le Khrihfa tampi Norway nih a rak laak hna.
Bondevik cu Norway Parliament ah 1973 in 2005 tiang a tthu (MP a rak si.). 1989 in 1990 tiang Minister of Foreign Affairs a rak ttuan. Minister of Church and Education zong 1983 in 1986 tiang a rak ttuan i State Secretary at the Office of the Prime Minister rian cu 1972–1973 tiang a rak ttuan.
Norway cozah le politician hna lakah Kawlram a tlawn tambik mi hi Bondevik a si. Aung San Suu Kyi a tong tambik zong amah hi a si i Suu Kyi nih cun a dawtnak a philh khawh lo dingmi pakhat ah ka chiahmi pa a si. Nobel Prize an pek zong ah Ralkap a ton piaktu hi Bondevik a si ko. Suu Kyi innthong in a chuah hnu zong ah amah hi pehtlaihnak a tuah le a tong hmasa a rak si. Mi nih Suu Kyi an fawi len lio zong ah a ttanhtu cu amah hi a si.
2014 i Iran a rak tlawng ruang ah Donald Trump president an thim hnu 2017 January 31. i USA a kal ahhin ram chung luhnak an rak pe lo i tuanbia ah Politician le PM a ttuan balmi chung in USA luh an rak senh lomi a si. Mah lio kha Trump nih Muslim ram 7 a rak phih hna lio a si.
Kan khua Froland i Aung San Suu Kyi park onnak kan tuah lio zong ah cikhat te bia a chim. Cun Laimi voi tam ngai a ton hna.
A ralaimi June 14. hi amah ton ding ah Oslo kal an ka sawm i caan aa relrem ahcun kal kai tim.
A hnubik a biachimmi THE TIMES of ISAREL ah an ttialmi rak rel ve.
Comments
Post a Comment