Tu kar hrawng Chin state cozah thawngpang cu mi lung a la ngai. Rianṭuan kho ding aa tlaak mi (qualified) ti bia tete zong a chuak pah i kan politicians pawl hi hodah aa tlaakmi a um hnga ti zong ka ruat. An qualified caah maw an ṭuan?
Chin miphun nih kan nunnak le kan hmailei kong kan aiawh ceih piaktu ding ah kan thim cangmi hna an si i zeitluk hmanh in an vaa tlaak lo zong ah ṭuanvo an ngei cang. An kut ah kan ram le miphun a hmailei kong a um. Zeitindah kan ram kan remh lai? Kan miphun hi zeitindah kan ṭhanchoter lai, nun nuamdeuh kan nun khawh lai, i zeitindah kan i runven lai? (Ralkap theng in si lo. Caholh, thinlung ruahnak le nifatin buainak tibantuk pawl chung in zeitindah kan mipi kan runven lai?). An kut ah a um.
Cucu a herh si le an nunnak pek zong in an ttuan lai. An pumpak limhang nakin biapi ah an chiah lai. An paw nakin biapi ah an chiah hrimhrim lai. Mah cu a si lo cun hi ṭuanvo hi tuante in an rak i khinh awk a si lo.
Miphun le ram caah ttuanvo siseh nawlngeihnak aa cuhmi nih cun lungṭhawn a herh. Thil dik dirpi i ralṭha tein ṭuan ding a si. Nawlngeihnak a kut chung i a um komi hmanh a uan ngam lomi cu zeiruangahdah a si? Ziah an ral chiat? Minung hi a ruang um lo ah a ralchia mi cu an tlawmte.
Salai Isaac Khen nih "Kan rian chuah tak ding ah timh cia ka si." tiah a chimmi Chin Media nih an ṭial i amah pumpak ca cu chim lo kan miphun caah thil poimawh ngaingah a si. A qualified mi a si le si lo cu hi zawn ahhin tampi biakhiah khawh a si. Politicians a rak si lo ti fiang tein a lang. Acadamic lei asilole NGO hrawng ah rian a ṭuan ding ah aa tlaak.
NLD nih cozah an tlaih in Salai Isaac Khen hi MP a tling lo nain rian an pekmi a si, tiah ka theih i thil ṭha tuk ah ka rak ruah. Atu zong ah ka ruah ko, an party chung i qualified mi cu MP an tlin lo zongah rian pek ding um cun pek ding a si. Amah belte party mithmai belnang thuh lo ding a biapi. Cu nakin a poi rihmi cu NLD thimtu ram mipi caah a ṭhabik le a dikning in ṭuan lo hi a si. - Dr. Hmuh Thang cu USDP nih cozah an ser lio ah MP a rak tling lo nain Minister rian pek an rak timh i MP hmanh tlin lo i Minister post lak cu a rak duh lo, tiah amah he naihniam mi nih an rak chim. Aa dawh ngaimi a si fawn.
Minister pakhat a si cangmi nih fawi tuk in "rian chuah tak ding redi ka si," ti hi pakhatnak ah Party politics siseh pumpak zong in a der takmi khuaruahnak a si. Miphun lei in zoh ah nawlngeihnak a tlai kho lomi kan sinak a langhter. Rian a ṭuan kho lomi a si. A min men in maw naa tlaih? Mi an chimrelmi hi a dik ko tiah na cohlan tinak a si maw? Hi biahalnak hi a leh hau hnga. Politician nih tihin kalpi ding a si lo, dirhmun a ngei lomi bantuk an si i hmailei an Credit chiatnak a hrampi a si kho. A kum no tuk rih.
Hi bantuk caan ahhin Opposition Party a simi CNDP, USDP le CPP tibantuk an daih sawh awk a si lo. Miphun le ram an dawt tak a si ahcun MP tlin lo le cozah ser lo zong ah a cozah dodaltu, an rianṭuanmi cuaithlai hi an rian lianpi a si. Cozah an tlaih lio a si an duh paoh in ṭuan ko hna seh, kan tlaih ve tikah ti bantuk ruahnak ngeih a lo. Opposition party pawl caah atu bantuk hi nan caan ṭha a si, nan thazang chuah u, media he itong u, caṭial u. Parliament ah ṭha tein chimrel u.
 |
| 2015 Thimnak Hi Chin Parties Caah Politics Cawnnak Lawng A Si |
Kan Media pawl zong nih USDP, CNDP, CPP le a dang party le MP pawl nih zeitindah an ruah timi zong hal le hlat, i thlah chih lengmang ding a si. Nan Opinion telh hi a biapi tuk lo, news ah.
Politics is about power. Power timi nawlngeihnak cu lungthin ṭhawng ngaiin chiah i, tlaih i zuam ding a si.
Pathian nih thluachuah in pe ko hna seh.
Hmanthlak: Chinland Post
Comments
Post a Comment